Read Biblia SEPT Efesios 6 Bible Online

Efesios 6 - Biblia SEPT bible

Efesios 6

¹Os fillos obedecede a vosos pais no Señor, que iso é de razón.

²Honra a teu pai e a túa nai, é o primeiro mandamento que trae emparellada unha promesa:

³de xeito que todo che saia ben e vivas moitos anos na terra.

⁴E vós, pais, non sexades rigorosos de máis cos vosos fillos; non: educádeos na disciplina e na doutrina do Señor.

⁵Escravos, obedecede escrupulosamente ós vosos amos neste mundo con sinceridade coma a Cristo;

⁶e non só para que vos vexan, para compracer ós homes, senón coma escravos de Cristo que cumpren de corazón a vontade de Deus,

⁷servindo de boa gana, coma se fose ó Señor e non a homes,

⁸sabendo que quen fai o ben, escravo ou libre, recibirá recompensa do Señor.

⁹E vós, amos, facede o mesmo con eles, prescindindo de ameazas, sabendo que eles e vós tedes un Señor no ceo, e que El non anda con favoritismos.

¹⁰E remato. Fortalecédevos no Señor e na puxanza do seu poder.

¹¹Revestídevos da armadura de Deus, para que poidades resistir as estrataxemas do demo.

¹²Porque non é a nosa loita contra homes de carne e óso senón contra os principados, contra as potestades, contra os que dominan neste mundo tenebroso, contra os espíritos do mal, que andan polo aire.

¹³Por iso, collede a armadura de Deus, para lles poder facer fronte no día malo, e, despois de superalo todo, quedar aínda en pé.

¹⁴Estade, logo, en pé: cinguídevos co cinto da verdade, revestidos coa coiraza da xustiza

¹⁵e calzados os pés co afervoamento do Evanxeo da paz.

¹⁶Tede sempre no brazo o escudo da fe, que con el poderedes apagar todos os dardos incendiarios do maligno.

¹⁷Collede o casco da salvación e a espada do Espírito, que é a palabra de Deus,

¹⁸con toda clase de oracións e de súplicas, orando decote no Espírito e velando por iso con asiduidade e súplicas por todos os cristiáns,

¹⁹e tamén por min, a fin de que se me dea a palabra en abrindo a miña boca, para anunciar abertamente o misterio do Evanxeo

²⁰do que son pregoeiro, mesmo na cadea; que teña valor para anuncialo abertamente, como debo.

²¹Para que tamén vós saibades que é de min e como me vai, informaravos de todo iso Tíquico, o noso irmán benquerido e axudante fiel no Señor.

²²Mándovolo para que saibades de nós e para que vos anime.

²³Paz ós irmáns e amor con fe, de parte de Deus Pai e do Señor Xesús Cristo.

²⁴Que a graza acompañe a todos os que aman ó noso Señor Xesús Cristo con amor indefectible.