Read Biblia SEPT 1 Tesalonicenses 4 Bible Online

1 Tesalonicenses 4 - Biblia SEPT bible

1 Tesalonicenses 4

¹Polo demais, irmáns, pedímosvos con insistencia coma cristiáns que, xa que aprendestes de nós como cómpre andar para contentar o Señor, que sigades así e que progresedes aínda máis.

²Porque ben sabedes que instrucións vos temos dado de parte do Señor Xesús.

³Pois esta é a vontade de Deus, a vosa santificación: que vos arrededes da fornicación,

⁴que cada un de vós saiba controlar o seu propio corpo santa e respectuosamente,

⁵sen se deixar gobernar pola paixón coma os xentís, que non coñecen a Deus.

⁶Que ninguén se exceda nin asoballe a seu irmán neste asunto, pois o Señor vinga todas estas cousas, como xa vos temos dito e asegurado.

⁷Que non nos chamou Deus á impureza, senón á santidade.

⁸Por iso, quen rexeita estas instrucións, non rexeita a un home senón a Deus, que é quen vos dá o seu Espírito Santo.

⁹Verbo da caridade non precisades que vos escriba porque Deus mesmo vos ensina a vos amardes uns a outros,

¹⁰cousa que practicades con todos os irmáns ó longo da Macedonia; rogámosvos que sigades progresando:

¹¹que areledes vivir sosegados, ocuparvos dos vosos asuntos e traballar coas vosas mans, conforme vos temos mandado;

¹²deste xeito a vosa conduta será correcta ante os de fóra e non precisaredes de ninguén.

¹³Non queremos, irmáns, que esteades desinformados verbo dos mortos, para que non vos agoniedes coma os outros, os que non teñen esperanza.

¹⁴Porque, se cremos que Xesús morreu e que resucitou, do mesmo xeito Deus, por medio de Xesús, levará con El os que xa morreron.

¹⁵Iso é o que vos dicimos apoiados na palabra do Señor: que nós, os que vivimos, os que quedemos para a Vinda do Señor, non teremos vantaxe sobre os que xa morreron;

¹⁶pois a un sinal de mando, á voz do arcanxo e ó son da trompeta de Deus, o Señor en persoa baixará do ceo: entón os cristiáns defuntos resucitarán primeiro;

¹⁷despois, nós, os que quedemos vivos, seremos arrebatados xunto con eles nas nubes, para irmos ó encontro do Señor no aire e así estaremos sempre co Señor.

¹⁸Polo tanto, consoládevos uns a outros con estas palabras.