Read Biblia SEPT Xosué 1 Bible Online

Xosué 1 - Biblia SEPT bible

Xosué 1

¹Despois da morte de Moisés, servo de Deus, díxolle o Señor a Xosué, fillo de Nun, servo de Moisés:

²—"O meu servo Moisés morreu; así que agora, érguete, e pasa o Xordán con todo este pobo, cara ó país que eu lles dou a eles, ós fillos de Israel.

³Calquera lugar que pise a planta dos vosos pés, volo entrego, tal como lle teño dito a Moisés.

⁴Os vosos lindeiros irán desde o deserto e mais o Líbano Leste, ata o Río Grande (o Éufrates), e todo o país dos hititas, ata o Mar Grande, no Occidente.

⁵Ninguén se che poderá arrepoñer durante toda a túa vida. Do mesmo xeito que estiven con Moisés, estarei tamén contigo: non te fallarei nin te abandonarei.

⁶Se rexo e valoroso, pois ti farás herdar a este pobo a terra que xurei ós seus devanceiros que lles había de dar.

⁷Soamente has de ser rexo e afoutado, para cumprir toda a Lei que dispuxo o meu servo Moisés. Non te desvíes dela nin á dereita nin á esquerda, de xeito que teñas boa andanza en todo o que acometas.

⁸Endexamais non arredarás da túa boca o libro desta Lei: meditaralo de día e mais de noite, de xeito que cumpras todas as súas prescricións, pois daquela daráseche ben o teu camiño e terás boa andanza.

⁹Logo non cho dixen xa?: se rexo e valoroso; non teñas medo nin te empequenezas, pois o Señor, o teu Deus, estará contigo en todo o que acometas".

¹⁰Entón Xosué deu esta orde ós oficiais do pobo:

¹¹—"Ide polo medio do campamento, e pregoádelle á xente o seguinte: collede provisións, pois dentro de tres días atravesaredes este Xordán, para tomardes posesión da terra que o Señor, o voso Deus, acordou que herdedes".

¹²E ós rubenitas, ós gaditas e á media tribo de Menaxés, díxolles Xosué:

¹³—"Lembrade aquilo que vos mandou Moisés, servo do Señor: O Señor, o voso Deus, concédevos acougo, dándovos esta terra.

¹⁴As vosas mulleres, os vosos rapaces e mais o voso gando, ficarán xa na terra que vos deu Moisés nesta banda do Xordán; pero vosoutros, todos os guerreiros, pasaredes armados diante de vosos irmáns, e axudarédelos,

¹⁵Ata que o Señor lles dea acougo como a vós, e tomen posesión tamén eles da terra que o Señor, o voso Deus, lles entregou. Daquela, volverdes á terra da vosa herdanza, e tomaredes posesión dela —da que vos deu Moisés, servo do Señor—, na banda oriental do Xordán".

¹⁶Eles respondéronlle a Xosué: "Faremos todo canto nos mandaches, e iremos a onde queira que nos envíes.

¹⁷Do mesmo xeito que obedecemos a Moisés, obedecerémosche a ti; abonda con que o Señor, o teu Deus, estea contigo como estivo con Moisés.

¹⁸Quen—quera que se arrepoña contra as túas decisións, e non escoite as túas palabras todo o que nos mandes, será entregado á morte. Ti soamente se rexo e valoroso".