Read Biblia SEPT Xosué 13 Bible Online

Xosué 13 - Biblia SEPT bible

Xosué 13

¹E Xosué ía xa vello, eivado cos anos, e díxolle o Señor: —"Ti volvícheste vello, entrado en anos, e queda aínda moita terra por conquistar.

²Esta é a terra que falta: todo o territorio dos filisteos e todo o país dos guexuritas.

³Desde Xihor, que está enfronte de Exipto, ata o lindeiro de Ecrón, polo norte —que se ten por cananeo—, os cinco principados dos filisteos: o de Gaza, o de Axdod, o de Axquelón, o de Gad e o de Ecrón, a maiores dos hivitas.

⁴Desde o sur, toda a terra dos cananeos, e Mearah —que está a carón dos sidonios—, ata Afec, lindeiro dos amorreos;

⁵A rexión guiblita e todo o Líbano polo nacente do sol, desde Baal—Gad —a pé do monte Hermón—, ata a entrada de Hamat;

⁶todos os habitantes da montaña, desde o Líbano ata Misrefot—Maim, todos os sidonios. Eu botareinos a todos diante dos fillos de Israel. Ti soamente tes que repartir a terra como herdanza para Israel, segundo che teño mandado.

⁷E agora fai as partillas da herdanza para as nove tribos e mais a media tribo de Menaxés.

⁸Con estes colleron tamén os rubenitas e os gaditas a súa herdanza, que llela dera Moisés na outra banda do Xordán, no oriente, tal como dispuxera Moisés, servo do Señor.

⁹Desde Aroer —que está á beira do torrente Arnón—, e o pobo que está no medio do torrente, e toda a terra cha que vai desde Medeba ata Dibón,

¹⁰e mais todas as cidades de Sihón, rei dos amorreos —que reinou en Hexbón—, ata o lindeiro dos fillos de Amón;

¹¹Galaad e o territorio dos guexuritas e os macateos, toda a montaña do Hermón e todo o Baxán ata Salcah.

¹²No Baxán, todo o reino de Og, que reinou en Axtarot e mais en Edrei, e que era o reducto dos Refaím ata que Moisés os venceu e expulsou.

¹³Non obstante, os fillos de Israel non botaron fóra ós guexuritas nin ós macateos, e habitou Guexur e Macat no medio de Israel ata o día de hoxe.

¹⁴Soamente á tribo de Leví non lle deu terra Moisés: a súa herdanza é o lume do Señor, Deus de Israel, tal como El lles prometera.

¹⁵Deu Moisés herdanza á tribo dos fillos de Rubén, de acordo coas súas familias.

¹⁶E os lindeiros deles foron desde Aroer, que está á beira do torrente Arnón, e o pobo que está ó fondo do torrente, toda a terra cha que está a pé de Medebá;

¹⁷Hexbón e todas as súas vilas da terra cha; Dibón, Bamot—Baal, Bet—Baal—Meón,

¹⁸Iahsah, Quedemot, Mefáat,

¹⁹Quiriataim, Sibmah, e Séret—Xáhar, no outeiro do val;

²⁰e Bet—Peor, Axdot—Pisgah e Bet—Ieximot.

²¹E todas as vilas da terra cha e todos os dominios de Sihón, rei dos amorreos, que reinou en Hexbón, e que o venceu Moisés a el e mais ós príncipes de Madián: Eví, Réquem, Sur, Hur, e Reba, oficiais de Sihón e veciños do país.

²²E a Balaam, o adiviño, fillo de Beor, matárono os fillos de Israel coa espada, o mesmo ca a outros.

²³E foron os lindeiros dos fillos de Rubén, o Xordán e a súa ribeira. Estes eran os eidos dos fillos de Rubén, segundo as súas familias: as vilas e aldeas.

²⁴E deu terras Moisés á tribo de Gad —ós fillos de Gad—, segundo as súas familias.

²⁵E foron os lindeiros deles Iazer e todas as cidades de Galaad, e a metade do país dos fillos de Amón ata Aroer, que está enfronte de Rabah;

²⁶e, desde Hexbón, ata Ramah—Mispeh e Betonim; e, desde Mahanaim, ata o límite de Debir.

²⁷E no val, Bet—Aram, Bet—Nimrah, Succot, Safón, o resto do reino de Sihón —rei de Hexbón—, o Xordán e a súa ribeira, ata o remate do mar de Quinéret, pola outra banda do Xordán, ó oriente.

²⁸Esta é a herdanza dos fillos de Gad, segundo as súas familias: as vilas e as aldeas.

²⁹E deu terras Moisés á media tribo de Menaxés. E foron os lindeiros da media tribo de Menaxés, segundo as súas familias,

³⁰desde Mahanaim todo o Baxán, todo o reino de Og, rei do Baxán, e todos os lugares de Iaor que hai no Baxán: sesenta pobos.

³¹E medio Galaad, Axtarot e Edrei, cidades do reino de Og, no Baxán, foron para os fillos de Maquir, fillo de Menaxés, ou máis ben para a metade dos fillos de Maquir, segundo as súas familias.

³²Estes son os eidos que distribuíu Moises na terra cha do Moab, na outra banda do Xordán, ó oriente de Xericó.

³³E á tribo de Leví non lle deu Moisés eido ningún. O Señor, Deus de Israel, El é a súa herdanza, segundo lles prometera El".