Read Biblia SEPT Xosué 15 Bible Online

Xosué 15 - Biblia SEPT bible

Xosué 15

¹E tocoulle a partilla á tribo dos fillos de Xudá, segundo as súas familias, no lindeiro de Edom, ó sur do deserto de Sin, no extremo meridional.

²E foi o seu lindeiro sur o extremo do Mar do Sal, desde a lingua que miraba cara ó mediodía

³e saía cara ó sur da subida de Acrabim, pasaba por Sin e subía polo sur de Cadex—Barnea; pasaba por Hesrón, subía cara a Adar e xiraba cara a Carcáah;

⁴pasaba por Asmón, prolongábase ata o torrente de Exipto, e saía á beira do mar. Este era o seu lindeiro sur.

⁵O seu lindeiro oriental era o Mar do Sal ata a foz do Xordán;

⁶subía a Bet—Hoglah, pasaba polo norte de Bet—Arabah, e rubía á Rocha de Bohán, o fillo de Rubén,

⁷e continuaba cara a Debir, desde o Val de Acor. E, polo norte, ía cara a Guilgal, que está enfronte da subida de Adumim ó sur do torrente; despois pasaba a pé das augas de En—Xémex, indo saír a En—Róguel.

⁸E o lindeiro subía polo Val de Ben—Hinnóm, pola beira sur dos iebuseos —isto é, de Xerusalén—; e rubía polo cume do monte que dá polo oeste a Gue—Hinnom, e polo norte ó extremo do Val dos Refaím.

⁹Desde o cume do monte, continuaba cara á fonte de auga de Neftóah, e saía ás vilas da montaña de Efrón; seguía cara a Baalah —que é Quiriat—Iearim—,

¹⁰xiraba desde Baalah contra o occidente, ó monte Seir, pasaba pola aba norte da montaña de Iearim —que é Quesalón—, baixaba a Bet—Xémex e ía cara a Timnah;

¹¹corría polo flanco norte de Ecrón, continuaba cara a Xiquerón, e pasaba ó monte de Baalah, prolongábase ata Iabneel e remataba no mar.

¹²E o lindeiro occidental ía dar ó Mar Grande e á súa praia. Esta é a fronteira que circundaba o territorio dos fillos de Xudá, segundo as súas familias.

¹³E a Caleb, fillo de Iefuneh, deulle unha parte no medio dos fillos de Xudá, de acordo co mandato do Señor a Xosué: Quiriat—Arbá, do pai de Anac, que é Hebrón.

¹⁴E botou de alí Caleb ós tres fillos de Anac: a Xexai, Ahimán e Talmai.

¹⁵E subiu desde alí contra os veciños de Debir (o nome de Debir era antes Quiriat—Séfer);

¹⁶e dixo Caleb: —"A quen ataque a Quiriat—Séfer e a conquiste, dareille por muller a miña filla Acsah".

¹⁷Conquistou a vila Otoniel, fillo de Quenaz e irmán de Caleb; e Caleb deulle por muller a súa filla Acsah.

¹⁸Aconteceu que, ó convivir con ela, incitouna a pedirlle a seu pai un campo; e baixou do asno, e díxolle a ela Caleb: —"Que tés?"

¹⁹Respondeulle ela: —"Anda, faime un favor: pois me deches terra árida, dáme algunha fonte de auga". E foi el e deulle a fonte de arriba e mais a de abaixo.

²⁰Esta é a herdanza da tribo dos fillos de Xudá, segundo as súas familias.

²¹E foron as cidades, desde o remate da tribo dos fillos de Xudá ata o lindeiro de Edom, no Négueb, Cabseel, Éder e Iagur,

²²Quinah, Dimonah, Adadah,

²³Quédex, Hasor, Itnán,

²⁴Zif, Télem, Bealot,

²⁵Hasor, Hadatah, Queriot, Hesrón —que é Hasor—,

²⁶Amam, Xemá, Moladah,

²⁷Hasar—Gadá, Hexmón, Bet—Pálet,

²⁸Hasar—Xual, Beer—Xeba, Bizioteiah,

²⁹Baalah, Iim, Sem,

³⁰Eltolad, Quesil, Hormah,

³¹Siclag, Madmanah, Sansanah,

³²Lebaot, Xilhim, Ain e Rimón: no total, vintenove cidades coas súas aldeas.

³³E na Xefelah, Extaol, Sorah, Axnah,

³⁴Zanóah, En—Ganim, Zapúah, Enam,

³⁵Iar—mut, Adulam, Socoh, Azecah,

³⁶Xaaraim, Aditaim, Guederah e Guederotaim: catorce cidades, coas súas aldeas.

³⁷Senán, Hadaxah, Migdal—Gad,

³⁸Dileán, Mispeh, Iocteel,

³⁹Láquix, Boscat, Eglón,

⁴⁰Cabón, Lahmás, Quitlix,

⁴¹Guederot, Bet—Dagón, Naamah e Maquedah: dezaseis cidades coas súas aldeas.

⁴²Libnah, Éter, Axán,

⁴³Iefté, Axnah, Nesib,

⁴⁴Queilah, Aczib e Marexah: nove cidades coas súas aldeas.

⁴⁵Ecrón, coas súas vilas e as súas aldeas.

⁴⁶Desde Ecrón ata o mar, todo o que está a carón de Axdod e mais as súas aldeas;

⁴⁷Axdod, as súas vilas e as súas aldeas: Gaza, as súas vilas e as súas aldeas, ata o torrente de Exipto, tendo como lindeiro o Mar Grande.

⁴⁸Na montaña, Xamir, Iatir, Sócoh,

⁴⁹Danah, Quiriat—Sanah, —que é Debir—;

⁵⁰Anab, Extemoh, Anim,

⁵¹Goxén, Holón e Guilón: once cidades coas súas aldeas.

⁵²Arab, Rumah, Exán,

⁵³Ianum, Bet—Zapúah, Afecah,

⁵⁴Humtah, Quiriat—Arbá —que é Hebrón— e Sior: nove cidades e as súas aldeas.

⁵⁵Maón, Carmel, Zif, Iutah,

⁵⁶Iezrael, Iocdeam, Zanóah,

⁵⁷Caín, Guibah e Timnah: dez cidades, e as súas aldeas.

⁵⁸Halhul, Bet—Sur e Guedor;

⁵⁹Maarat, Bet—Anot e Eltecón: seis cidades e as súas aldeas.

⁶⁰Quiriat—Baal (que é Quiriat—Iearim) e Rabah: dúas cidades e as súas aldeas.

⁶¹No deserto, Bet—Aarabah, Midín e Secacah,

⁶²Nibxán, a Cidade do Sal e En—Guedi: seis cidades e as súas aldeas.

⁶³No tocante ós iebuseos veciños de Xerusalén, non puideron botalos fóra os fillos de Xudá: e habitaron cos fillos de Xudá en Xerusalén ata o día de hoxe.