Read Biblia SEPT Xosué 18 Bible Online

Xosué 18 - Biblia SEPT bible

Xosué 18

¹E toda a asemblea dos fillos de Israel congregouse en Xiloh, e estableceu alí a Tenda do Encontro; e o país quedoulles sometido.

²Pero quedaban aínda sete tribos de entre os fillos de Israel sen recibiren a súa partilla.

³E dixo Xosué ós fillos de Israel: —"Ata cando continuaredes sendo lacazáns para pasar a herdar a terra que vos deu o Señor, Deus de vosos pais?

⁴Escollede de entre vós tres homes por tribo. Eu enviareinos, e eles ergueranse e irán polo país, e tomarán nota del no tocante á vosa herdanza, e volverán despois onda min.

⁵Eles dividirán o país en sete partes. Xudá quedará co seu territorio ó sur; e a casa de Xosé quedará co seu territorio ó norte.

⁶E vós faredes a descrición do país en sete lotes, e traerédesma a min, e eu sinalareivos as porcións aquí, diante do Señor, o noso Deus,

⁷porque os levitas non teñen parte ningunha entre vós —pois a súa parte é o sacerdocio do Señor—, e Gad e Rubén e mais a media tribo de Menaxés colleron os seus eidos na outra banda do Xordán, ó oriente, e déullela a eles Moisés, o servo do Señor".

⁸Erguéronse os homes, e emprenderon camiño. E Xosué mandáralles describir a terra, dicindo: —"Ide, e percorrede a terra, e describídea: logo tornade onda min, e aquí escolmarei os lotes para vós, diante do Señor, en Xiloh".

⁹E foron os homes e percorreron o país, e describírono no libro por cidades, en sete partes; e tornaron onda Xosué ó campamento, en Xiloh.

¹⁰E Xosué partillou lotes para eles, en Xiloh, diante do Señor, e repartiu alí Xosué o país para os fillos de Israel, de acordo coas súas divisións.

¹¹E saíu o lote da tribo dos fillos de Benxamín, segundo as súas familias, e tocoulle o lindeiro da parte deles entre os fillos de Xudá e os fillos de Xosé.

¹²E saía o seu lindeiro norte desde o Xordán, continuaba pola montaña ó oeste, e saía ó deserto de Bet—Aven.

¹³Despois ía cara a Luz, e pasaba a carón de Luz, polo sur da cidade (de Betel), e baixaba a Atarot—Adar, na montaña que está ó sur de Bet—Horón de Abaixo.

¹⁴O lindeiro ía para adiante e volvía á beira do mar polo Sur, desde a montaña que está enfronte a Bet—Horón polo sur, e saía a Quiriat—Baal (que é Quiriat—Iearim, cidade dos fillos de Xudá), no tocante ó cuadrante occidental.

¹⁵En canto ó cuadrante sur, partía do remate de Quiriat—Iearim, e ía cara ó oeste, saíndo ás fontes das augas de Neftóah.

¹⁶Baixaba ata o remate da montaña que está enfronte do Val de Ben—Hinnom (ó norte do Val dos Refaím), ía polo val de Hinnom —a carón dos iebuseos, polo sur—, e baixaba a En—Róguel.

¹⁷Continuaba polo norte e saía a En—Xémex; ía dar a Guelilot —que está enfronte da subida de Adumín—, e baixaba á Rocha de Bohán, fillo de Rubén.

¹⁸Despois pasaba á outra banda —a da Arabah—, polo norte, e baixaba ata a Arabah;

¹⁹pasaba a carón de Bet—Hoglah, polo norte, e saía ó norte da lingua do Mar do Sal, ó sur da desembocadura do Xordán (éste é o lindeiro meridional).

²⁰E polo leste lindaba co Xordán. Esta é a herdanza dos fillos de Benxamín, segundo os seus lindeiros circundantes e segundo as súas familias.

²¹E correspondéronlle á tribo de Benxamín, segundo as súas familias, as cidades de Xericó, Bet—Hoglah, Émec—Quesis,

²²Bet—Arabah, Semaraim, Betel,

²³Avim, Parah, Ofrah,

²⁴Quefar—Amonai, Ofni e Gaba: doce cidades coas súas aldeas.

²⁵Gabaón, Ramah, Beerot,

²⁶Mispeh, Quefirah, Mosah,

²⁷Requem, Irpeel, Taralah,

²⁸Selá, Élef, Iebusi —que é Xerusalén—, Guibat e Quiriat: catorce cidades e as súas aldeas. Esta é a herdanza dos fillos de Benxamín, segundo as súas familias.