Read Biblia SEPT Xosué 21 Bible Online

Xosué 21 - Biblia SEPT bible

Xosué 21

¹E achegáronse os cabezas de familia dos levitas ó sacerdote Elazar e a Xosué, fillo de Nun, e ós cabezas de familia das tribos de Israel,

²e faláronlles en Xiloh, na terra de Canaán, deste xeito: —"O Señor, por medio de Moisés, mandou que se nos desen pobos para residirmos, con pradairos para o noso gando".

³E déronlles os fillos de Israel ós levitas da súa herdanza, pola palabra do Señor, estas vilas e as súas praderías:

⁴Saíu a sorte para as familias dos quehatitas e sacaron para os fillos levitas do sacerdote Aharón trece vilas, do lote da tribo de Xudá, da tribo de Simeón, e da tribo de Benxamín.

⁵E para os restantes fillos de Quehat, das familias da tribo de Efraím, da tribo de Dan e da media tribo de Menaxés correspondéronlles na sorte dez vilas.

⁶E para os fillos de Guerxón, das familias da tribo de Isacar, da tribo de Axer, da tribo de Naftalí e da media tribo de Menaxés no Baxán tocáronlles en sorte trece vilas.

⁷Para os fillos de Merarí, segundo as súas familias, da tribo de Rubén, da tribo de Gad, e da tribo de Zebulón, doce vilas.

⁸E deron os fillos de Israel ós levitas estas vilas cos seus pastos en sorte, segundo mandara o Señor por medio de Moisés.

⁹E déronlles, da tribo dos fillos de Xudá e da tribo dos fillos de Simeón, esas vilas que van chamadas polo nome:

¹⁰Para os fillos levitas de Aharón, das familias dos quehatitas —pois a eles correspondera o primeiro lote—,

¹¹déronlles Quiriat—Arbá (a vila do pai de Anoc —que é a cidade de Hebrón—, na serra de Xudá), coas praderías dos seus arredores.

¹²Pero a zona verde da cidade e das súas aldeas déronllas a Caleb, fillo de Iefuneh, en propiedade.

¹³E ós fillos sacerdotes de Aharón déronlles Hebrón (para cidade de refuxio do homicida) e os seus pastos, e Libnah e os seus pastos.

¹⁴Iatir cos seus pastos, Extemoa cos seus pastos,

¹⁵Holón cos seus pastos, Debir cos seus pastos,

¹⁶In cos seus pastos, Iutah cos seus pastos, e Bet—Xémex cos seus pastos: nove vilas, escolmadas daquelas dúas tribos.

¹⁷E da tribo de Benxamín, Gabaón cos seus pastos, Gueba cos seus pastos,

¹⁸Anatot cos seus pastos e Almón cos seus pastos: catro cidades.

¹⁹Todas as cidades dos sacerdotes fillos de Aharón, eran trece, cos seus pastos.

²⁰E ás familias dos levitas fillos de Quehat —os outros fillos de Quehat—, déronlles un lote de cidades escolmadas da tribo de Efraím:

²¹Xequem (para cidade de refuxio do homicida, na serra de Efraím) cos seus pastos, Guézer cos seus pastos,

²²Quibsaim e os seus pastos, e Bet—Horón e os seus pastos: catro cidades.

²³E da tribo de Dan, Eltequé e os seus pastos, Guibetón e os seus pastos,

²⁴Aialón e os seus pastos, e Gat—Rimón e os seus pastos: catro cidades.

²⁵E da media tribo de Menaxés, Taanac e os seus pastos, e Ibleam e os seus pastos: dúas cidades.

²⁶No total, dez, cos seus pastos, para as restantes familias dos fillos de Quehat.

²⁷E para as familias dos levitas fillos de Guerxón partillaron da media tribo de Menaxés Golán (no Baxán, como cidade de refuxio do homicida) cos seus pastos, e Bet—Axtarah cos seus pastos: dúas cidades.

²⁸E da tribo de Isacar, Quixón, cos seus pastos, Daberat cos seus pastos,

²⁹Iarmut cos seus pastos e mais En—Ganim cos seus pastos: catro cidades.

³⁰E da tribo de Axer, Mixal cos seus pastos, Abdón cos seus pastos,

³¹Helccat cos seus pastos, e Rehob cos seus pastos: catro cidades.

³²E da tribo de Naftalí, Quédex (en Galilea, para cidade de refuxio do homicida) cos seus pastos, Hamot—Dor cos seus pastos e Cartán cos seus pastos: tres cidades.

³³Todas as cidades dos guerxonitas, segundo as súas familias, eran trece, cos seus pastos.

³⁴E para as familias do resto dos levitas fillos de Merarí, escolmaron da tribo de Zebulón Iocneam cos seus pastos, Cartah cos seus pastos,

³⁵Dimnah cos seus pastos e Nahalal cos seus pastos: catro cidades.

³⁶Da tribo de Rubén, Béser e os seus pastos, Iahsah e os seus pastos,

³⁷Quedemot e os seus pastos e Mefáat e os seus pastos: catro cidades.

³⁸E da tribo de Gad, Ramot (en Galaad, para cidade de refuxio do homicida) cos seus pastos, Mahanaim e os seus pastos.

³⁹Hexbón cos seus pastos, Iazer cos seus pastos: no total, catro cidades.

⁴⁰A suma de todas as cidades que lles tocaron ós fillos de Merarí para as súas familias —para os que quedaban das familias de levitas—, foi de doce cidades.

⁴¹E o número de cidades dos levitas na propiedade dos fillos de Israel, foi de corenta e oito cos seus pastos:

⁴²como tiña cada unha os pastos arredor, así os tiña o resto delas.

⁴³E deu o Señor a Israel toda a terra que xurara ós seus devanceiros que había de darlles: e herdárona e viviron nela.

⁴⁴E o Señor deulles acougo á redonda, como prometera ós seus devanceiros, e non houbo inimigo que resistise diante deles: o Señor púxoos a todos nas súas mans.

⁴⁵Non fallou unha de todas as boas promesas que fixera o Señor á casa de Israel: todiñas se cumpriron.