Read Biblia SEPT 2 Tesalonicenses 1 Bible Online

2 Tesalonicenses 1 - Biblia SEPT bible

2 Tesalonicenses 1

¹Paulo, Silván e mais Timoteo, á Igrexa dos tesalonicenses, en Deus, noso Pai, e no Señor Xesús Cristo;

²desexámosvos a graza e a paz de Deus Pai e do Señor Xesús Cristo.

³Temos que lle dar grazas seguido a Deus por vós, irmáns, e é de xustiza porque a vosa fe vai medrando a cada paso máis e porque o amor que vos tedes todos uns a outros segue aumentando;

⁴tanto que nós mesmos presumimos de vós ante todas as igrexas de Deus pola vosa paciencia e pola vosa fe en todas as persecucións e apuros que estades a pasar.

⁵Esa é a proba do xusto xuízo de Deus, de que vos vai considerar dignos do seu Reino polo que estades a padecer;

⁶como é xusto que Deus pague con tribulacións ós que vos aflixen

⁷e que a vós, os aflixidos, vos dea acougo xunto connosco, cando se revele o Señor Xesús, vindo do ceo cos anxos do seu poder,

⁸con labaradas de lume para lles dar o castigo ós que non queren recoñecer a Deus e ós que non obedecen o Evanxeo do noso Señor Xesús.

⁹O castigo deles vai ser a perdición eterna, lonxe da presenza do Señor e do esplendor da súa gloria,

¹⁰naquel día, cando veña para manifestar a súa gloria nos seus santos e para manifestar as súas marabillas nos que abrazaron a fe. Ora, vós aceptastes o noso testemuño.

¹¹Por iso rogamos decote por vós, para que o noso Deus vos faga dignos da chamada e para que co seu poder faga realidade todo propósito de facer o ben e toda empresa de fe.

¹²Dese xeito vós daredes gloria ó noso Señor Xesús Cristo e el a vós conforme a graza do noso Deus e do Señor Xesús Cristo.