Read Biblia SEPT Filemón 1 Bible Online

Filemón 1 - Biblia SEPT bible

Filemón 1

¹Paulo, preso por Cristo Xesús, e mais o irmán Timoteo saudámoste a ti, o noso querido amigo e colaborador Filemón,

²e saudamos tamén a irmá Apia, o noso camarada Arquipo e á comunidade que se xunta na túa casa.

³Desexámosvos a alegría e a paz de Deus, o noso Pai, e do Señor Xesús Cristo.

⁴Doulle grazas decote ó meu Deus, ó me lembrar de ti nas miñas oracións,

⁵porque oio falar do amor e da fidelidade que tes ó Señor Xesús e a todos os membros do pobo santo.

⁶Pido que a solidariedade da túa fe se poña en marcha, ó comprenderes que todo o ben que temos é para Cristo.

⁷Alegroume e animoume moito a túa caridade, meu irmán: grazas a ti o pobo santo está máis confortado.

⁸Por iso, aínda que teña liberdade en Cristo para che mandar o que veña ó caso,

⁹cádrame máis pedircho, apelando á túa caridade. Así, sen máis título que ser eu Paulo, un vello que agora está preso por Cristo Xesús:

¹⁰pídoche por Onésimo, o meu fillo, que xerei estando na cadea.

¹¹En tempos foiche inútil, mais agora vai ser un verdadeiro "Onésimo", é dicir, útil para ti e para min tamén.

¹²Velaí cho mando. Velaí che vai unha parte de min. Recíbeo!

¹³Pensei en me quedar con el, para que me axudase no teu lugar, mentres estou preso polo Evanxeo.

¹⁴Pero non quixen facer nada sen contar co teu consentimento, para que non fagas este ben á forza, senón porque che sae de dentro.

¹⁵Igual por iso marchou de onda ti algún tempo: a fin de que agora o recuperes para sempre,

¹⁶non xa coma escravo, senón coma algo máis ca escravo: coma un irmán benquerido. Para min é moi querido; moito máis o vai ser para ti, coma home e coma cristián!

¹⁷Así que se me consideras un amigo, acólleo coma a min.

¹⁸Se en algo te prexudicou ou se algo che debe, pono na miña conta.

¹⁹Eu, Paulo, firmo co meu puño e letra: pagareino eu. Iso para non falar de que ti mesmo te me debes.

²⁰Anda, irmán; que eu saque algo de ti no Señor. Tranquilízate ti coma cristián.

²¹Escríboche fiando en que me vas facer caso e sabendo que has de facer máis do que che eu digo.

²²Ai, e vaime preparando onde parar, que, grazas ás vosas oracións, ides ter o regalo de que eu vaia aí.

²³Recordos de Epafras, o meu compañeiro de cadea, en Cristo Xesús.

²⁴Saúdos dos meus colaboradores: Marcos, Aristarco, Dimas e Lucas.

²⁵A graza do Señor Xesús Cristo sexa convosco!