Read Biblia SEPT Hebreos 7 Bible Online

Hebreos 7 - Biblia SEPT bible

Hebreos 7

¹Este Melquisedec, rei de Salén, sacerdote do Deus Supremo saíu ó encontro de Abraham, cando volvía de derrotar os reis, e bendiciuno.

²Abraham con el repartiu a décima parte de todo. En primeiro lugar, o seu nome quere dicir: "Rei de xustiza"; logo, o título Rei de Salén quere dicir "Rei de paz".

³O feito de se nos presentar sen o nome do pai, nin o da nai, sen xenealoxía, sen a data do comezo dos seus días nin a da fin da súa vida, faino semellante ó Fillo de Deus e dá a entender que permanece sacerdote para sempre.

⁴Ollade que grande tivo que ser este a quen o patriarca Abraham lle deu unha décima parte do mellor do seu saqueo.

⁵Mentres ós fillos de Leví, que reciben servizo de sacerdotes, a Lei lles manda que lle cobren unha décima parte ó pobo escollido (isto é, ós seus irmáns, aínda que son coma eles fillos de Abraham),

⁶Melquisedec, que non ten unha ascendencia sacerdotal, recibe de Abraham a décima parte e bendí a aquel a quen Deus lle fixo as promesas.

⁷Ora, está fóra de toda discusión que todo aquel que bendí é máis có que é bendito.

⁸No caso dos fillos de Leví, os que reciben a décima parte son homes que morren; pero no caso de Melquisedec recíbea un de quen se testemuña que vive.

⁹Por así dicir, o mesmo Leví, que recibe a décima parte, veuna pagar na persoa de Abraham

¹⁰pois xa estaba presente en seu pai, cando lle foi ó encontro Melquisedec.

¹¹Certo que, se a perfección da salvación viñese polo sacerdocio levítico, xa que en relación con el recibiu o pobo a Lei, que necesidade habería aínda de que xurdise outro sacerdote na liña de Melquisedec e de que non se chamase "da liña de Aharón"?

¹²Porque, ó cambiar o sacerdocio, hai que cambiar necesariamente a Lei.

¹³Pero este de quen fala o salmo é doutra tribo, na que ninguén estivera ó servizo do altar.

¹⁴Porque é máis que coñecido que o noso Señor vén da tribo de Xudá, tribo da que nada dixo Moisés tocante ó sacerdocio.

¹⁵Pero aínda é máis claro se xorde outro sacerdote á semellanza de Melquisedec,

¹⁶quen non resulta sacerdote por unha Lei que preceptúa acerca da liñaxe, senón por unha forza que vivifica para sempre,

¹⁷pois así o testifica Deus: "Ti es sacerdote para sempre, na liña de Melquisedec".

¹⁸Por un lado, Deus abroga un precepto pasado, porque xa non ten forza obrigante nin utilidade,

¹⁹isto vese no feito de que a Lei non levou nada á perfección; e, polo outro, introduce unha esperanza máis poderosa, xa que por medio dela podemos achegarnos a Deus.

²⁰Ademais, Xesús, polo feito de o constituíren sacerdote cun xuramento (porque ós sacerdotes xudeus constituíronos sen xuramento,

²¹mentres que a El constituíuno cun xuramento dicíndolle: "Xurouno o Señor, e non cambiará de pensar: Ti es sacerdote para sempre"),

²²por ese feito resultou ser fiador dunha alianza de moita máis valía.

²³Aqueles foron moitísimos sacerdotes, porque a morte non os deixaba ser duradeiros;

²⁴pero este ten un sacerdocio imperecedoiro, xa que dura para sempre.

²⁵Por iso pode levar á plenitude da salvación para sempre ós que por El se achegan a Deus, xa que en todo momento vive para interceder por eles.

²⁶Pois era xustamente deste xeito o sacerdote que nós precisabamos: santo, sen ruindade e sen pecado, separado dos pecadores e levantado a unha gloria máis alta có mesmo ceo.

²⁷Non necesita ofrecer sacrificios cada día, en primeiro lugar polos seus pecados e logo polos do pobo, coma os outros Sumos Sacerdotes; pois isto fíxoo dunha vez para sempre, ofrecéndose a si mesmo.

²⁸En síntese, a Lei constitúe Sumos Sacerdotes a homes débiles, mentres que o xuramento que vén despois da Lei constitúe Sumo Sacerdote ó Fillo que logrou a salvación plena para sempre.