Read Biblia SEPT Santiago 1 Bible Online

Santiago 1 - Biblia SEPT bible

Santiago 1

¹Santiago, o servidor de Deus e do Señor Xesús Cristo, saúda as doce tribos que están na emigración.

²Cando vos vexades envoltos en diferentes tentacións, meus irmáns, tédevos por moi ditosos,

³porque xa sabedes que aquilo que somete a proba a vosa fe xera paciencia.

⁴Pero cómpre que a paciencia vaia acompañada de boas obras, de xeito que sexades perfectos e completos sen fallardes en cousa ningunha.

⁵Se algún de vós está necesitado de sabedoría, que lla pida a Deus, que llela dá a todos abondosamente e sen roñar;

⁶e a ese tal tamén lla ha dar. Pero cómpre que pida con fe e sen dubidar para nada, que quen dubida é coma as ondas do mar, que o vento abala e leva de aquí para acolá.

⁷Un home así non pense recibir cousa ningunha do Señor:

⁸é un indeciso e un inconstante en todos os seus camiños.

⁹Que o irmán de condición humilde se glorie da súa gran dignidade;

¹⁰e o rico, da súa humillación, porque pasará coma a flor da herba:

¹¹soérguese o sol coa súa fogaxe e queima a herba, cáelle a flor e pérdese a súa fermosa aparencia; pois así mesmiño murchará o rico nas súas empresas.

¹²Benia o home que resiste na tentación, porque, como a supere, recibirá o premio da vida, que Deus prometeu ós que o aman.

¹³Que ninguén diga ó se ver tentado: "Deus é quen me tenta", porque nin o mal tenta a Deus nin Deus tenta a ninguén.

¹⁴A cadaquén téntao a súa cobiza cando o arrastra e engaiola:

¹⁵despois a cobiza concibe e pare o pecado; e o pecado, en consumándose, xera morte.

¹⁶Non vos trabuquedes, irmáns queridiños.

¹⁷Todo bo regalo e toda dádiva perfecta vén de arriba, do Pai dos luceiros, en quen nin hai cambios nin tempos de sombras.

¹⁸Pola súa vontade tróuxonos á vida coa palabra da verdade, para que fósemos como as primicias das súas criaturas.

¹⁹Xa o sabedes, meus irmáns benqueridos: que todo home sexa espelido para escoitar, calmo para falar e calmo tamén para o anoxo,

²⁰porque o anoxo do home non leva á conduta que Deus pide.

²¹Polo tanto, rexeitando calquera lixo ou resto de ruindade, acollede docilmente a Palabra enxertada en vós, que pode salvar as vosas vidas.

²²Sede cumpridores da Palabra e non vos contentedes con escoitala xustificándovos con razóns enganosas.

²³Porque quen escoita a Palabra e non a pon en práctica é coma o home que se puxo a ollar a súa propia cara nun espello;

²⁴mirouse ben nel pero, ó que deu media volta, esqueceulle como era.

²⁵En cambio, quen afonda no coñecemento da lei perfecta, a que dá a liberdade, e se mantén nela, non para a escoitar e a esquecer deseguida, senón para a poñer por obra, ese será feliz na súa actuación.

²⁶Se alguén se tiver por home relixioso sendo un badueiro que engana o seu propio corazón, a súa relixiosidade sería baleira.

²⁷A relixión limpa e sen lixo ningún ós ollos de Deus Pai é esta: mirar polos orfos e polas viúvas nas súas coitas e gardarse da contaminación deste mundo.