Read Biblia SEPT 1 Xoán 4 Bible Online

1 Xoán 4 - Biblia SEPT bible

1 Xoán 4

¹Meus amigos, non fiedes en calquera espírito; máis ben, poñede á proba os espíritos, para ver se veñen de Deus. Porque de entre nós saíron polo mundo moitos falsos profetas.

²O Espírito de Deus podémolo distinguir nisto: vén de Deus todo espírito que profesa que Xesús Cristo veu en carne mortal;

³non pode vir de Deus todo espírito que non profesa a Xesús; ese é o espírito do Anticristo, de quen oístes dicir que ía vir e agora xa está no mundo.

⁴Meus filliños, vós sodes de Deus, e tedes os anticristos sometidos a vós, porque o que está en vós é maior có que está no mundo.

⁵Eles son dos do mundo, falan ó xeito do mundo e por isto escóitaos o mundo.

⁶Nós, en troques, somos dos de Deus: quen coñece a Deus, escóitanos; quen non é dos de Deus, non nos escoita. Nisto é onde coñecemos o Espírito da verdade e o espírito do error.

⁷Meus amigos, amémonos uns ós outros, porque o amor vén de Deus; e todo aquel que ama naceu de Deus e coñece a Deus.

⁸O que non ama, aínda non coñece a Deus, porque Deus é amor.

⁹O amor de Deus fíxose ver entre nós en que Deus mandou ó mundo o seu Fillo Unixénito, para que nos dese a súa vida.

¹⁰Hai amor dentro de nós, non porque nós teñamos amado a Deus, senón porque El nos amou a nós e mandou o seu Fillo para que expiase os nosos pecados.

¹¹Meus amigos, se Deus nos amou tanto, tamén nós nos temos que amar uns ós outros.

¹²A Deus non o deu visto nunca ninguén; pero, se nós nos amamos uns ós outros, Deus está en comuñón connosco e o seu amor faise realidade cumprida en nós.

¹³Coñecemos que estamos en comuñón con El e El connosco, en que nos deu parte no seu Espírito.

¹⁴Nós mesmos o contemplamos e por iso testemuñamos que o Pai mandou o seu Fillo coma salvador do mundo.

¹⁵Se un profesa que Xesús é o Fillo de Deus, Deus está en comuñón con el e el con Deus.

¹⁶Pero nós xa o coñecemos e temos posta a nosa fe neste amor: o amor que Deus mantén vivo entre nós. Deus é amor e quen permanece no amor, permanece en Deus e Deus permanece nel.

¹⁷Nisto chega o amor a ser realidade cumprida en nós: en que miramos para o día do xuízo con confiada seguridade porque, tamén nós vivimos neste mundo ó xeito de Cristo.

¹⁸No amor non hai temor. Antes ben, o amor perfecto bota fóra o temor, pois o temor é temor dun castigo: quen ten medo non chegou a un amor perfecto.

¹⁹Nós somos capaces de amar, porque El nos amou primeiro.

²⁰Se un di: "Eu amo a Deus", pero odia a seu irmán, é un mentireiro. Porque quen non ama a seu irmán a quen está vendo, non pode amar a Deus, a quen nunca viu:

²¹este é xustamente o mandamento que temos recibido del: que quen ama a Deus, ame tamén a seu irmán.