Read Biblia SEPT Xuíces 13 Bible Online

Xuíces 13 - Biblia SEPT bible

Xuíces 13

¹E volveron os fillos de Israel facer o mal diante do Señor e púxoos Iavé nas mans dos filisteos durante corenta anos.

²Había un home de Sorah, da familia dos danitas, chamado Manóah. Súa muller era estéril e non procreara.

³E aparecéuselle á muller un mensaxeiro do Señor e díxolle: —"Velaquí que ti es estéril e non xeraches; pero concibirás e parirás un fillo.

⁴E agora gárdate de beber viño e bebidas fermentadas e non comas nada impuro,

⁵pois velaquí que concibirás e parirás un fillo, e non subirá a navalla pola súa cabeza, pois o neno será nazir de Deus desde o ventre: e el comezará a salvar a Israel das mans dos filisteos".

⁶E foi a muller e díxolle a seu marido: —"Un home de Deus veu onda min e a súa semellanza era a dun anxo de Deus, terrible de abondo; e non lle preguntei de onde era nin el me manifestou o seu nome.

⁷E díxome: Velaquí que concibirás e parirás un fillo. E agora non bebas viño nin bebidas fermentadas, e non comas nada impuro, pois o neno será nazir de Deus desde o ventre ata o día da súa morte".

⁸E suplicou Manóah a Iavé deste xeito: —"Rógoche, meu Señor, que volva onda nós o home de Deus que enviaches e nos mostre o que temos que facer co neno cando naza".

⁹E escoitou Deus a voz de Manóah e volveu o anxo de Deus onda a muller, cando ela estaba sentada no campo (e Manóah —seu home—, non estaba con ela).

¹⁰Incorporouse axiña a muller e botou a correr, e contoulle a seu marido: —"Velaquí que se me apareceu o home que viñera onda min o outro día".

¹¹Entón Manóah ergueuse e foi detrás de súa muller e chegou a carón do home e díxolle: —"Logo ti es o home que lle falou a esta muller?" E respondeulle el: —"Si, son eu".

¹²E dixo Manóah: —"Cando se cumpra a túa mensaxe, que procedemento haberá que seguir co neno de xeito que llo apliquemos?"

¹³E dixo o anxo de Iavé a Manóah: —"De todo o que dixen á muller, gardarase:

¹⁴de todo o que saia da vide do viño, non comerá; e non beberá viño nin bebidas fermentadas nin comerá nada impuro. Todo o que che mandei, que o garde".

¹⁵E dixo Manóah ó anxo do Señor: —"Anda!, deixa que te reteñamos e que che sirvamos un cabrito".

¹⁶E dixo o anxo de Iavé a Manóah: —"Aínda que me retiveses, non comería do teu manxar; mais se queres ofrecer un holocausto a Iavé, podes facelo (pois Manóah aínda non se decatara de que era un anxo de Iavé)".

¹⁷E dixo Manóah ó anxo do Señor: —"Como te chamas?, de xeito que te honremos cando se cumpran as túas palabras".

¹⁸E díxolle o anxo de Iavé: —"A que vén iso de preguntarme polo meu nome, sendo el oculto?"

¹⁹E colleu Manóah o cabrito e mais a oblación, e ofreceullos enriba da pedra a Iavé, facedor de marabillas, que contemplaron Manóah e mais a súa muller.

²⁰E aconteceu que, ó subir a lumarada sobre o altar cara ó ceo, apareceu o anxo de Iavé na lumarada do altar; e Manóah e súa muller, ó velo, caeron de xeonllos.

²¹(E xa non volveu aparecer o anxo de Iavé a Manóah e a súa muller). Entón decatouse Manóah de que era o anxo de Iavé,

²²e díxolle Manóah a súa muller: —"De certo imos morrer, pois vimos a Deus".

²³E respondeulle súa muller: —"Se quixese o Señor facernos morrer, non acollería o holocausto e a ofrenda das nosas mans, nin nos faría ver todo isto, nin nos faría escoitar tales cousas neste intre".

²⁴E pariu a muller un neno e puxéronlle de nome Sansón; e o rapaz fíxose grande, e bendiciuno Iavé.

²⁵E o espírito do Señor comezou a movelo ás veces, no campamento de Dan, entre Sorah e Extaol.