Read Biblia SEPT Xuíces 15 Bible Online

Xuíces 15 - Biblia SEPT bible

Xuíces 15

¹Pasado algún tempo, polos días da ceifa do trigo, foi Sansón visitar a súa muller, levando consigo un cabrito, e dixo: —"Voume acaroar á miña muller no seu cuarto". Pero o pai dela non lle consentiu entrar

²e dixo: —"Cheguei ó convencemento de que lle colleras odio e deilla ó teu amigo. Oes!, e logo súa irmá a máis nova non está mellor ca ela? Cóllea para ti no sitio da outra!"

³E dixo Sansón: —"Desta vez quedarei por inocente verbo dos filisteos, aínda que lles faga mal".

⁴E foi Sansón e pillou trescentas raposas, e, collendo uns fachos, amarrou os rabos daquelas e puxo un facho no medio de cada dous rabos.

⁵E prendeu lume nos fachos e guindou as raposas contra os cereais dos filisteos, de xeito que queimou desde os palleiros ata as colleitas, e mesmo as vides e as oliveiras.

⁶E preguntaron os filisteos: —"Quen fixo isto?" E responderon: —"Sansón, o xenro do timnita, porque este colleu a muller del e deulla a un amigo". Entón subiron os filisteos e prendéronlle lume a ela e mais a seu pai.

⁷E díxolles Sansón: —"Xa que fixestes dese xeito non hei parar ata que me vingue de vós".

⁸E mallou neles, por riba e por baixo, e fixo un grande estrago. Despois baixou e foise meter nunha fenda da Rocha de Etam.

⁹E subiron os filisteos e acamparon en Xudá e avanzaron ata Lehí.

¹⁰E dixeron os homes de Xudá: —"Por que subistes contra nós?" E responderon eles: —"Subimos para prender a Sansón e facer con el o mesmo que el fixo connosco".

¹¹E baixaron tres mil homes de Xudá á fenda da Rocha de Etam, e dixeron a Sansón: —"E logo ti non sabes que os filisteos domean sobre nós? Como entón nos fixeches isto?" E respondeu el: —"Segundo me fixeron eles, así lles fixen eu.

¹²Daquela dixéronlle: —"Baixamos para prenderte e entregarte nas mans dos filisteos". E díxolles Sansón: —"Xurádeme que non me mataredes vós mesmos".

¹³E responderon eles: —"Non, senón que te amarraremos e te entregaremos nas mans deles; pero matar, non te mataremos". E amarrárono con dúas cordas novas e subírono da Rocha.

¹⁴Cando chegou a Lehí, os filisteos foron engadados ó seu encontro; pero entrou nel o espírito de Iavé e, daquela, as cordas que levaba sobre os seus brazos foron para el coma fíos de liño cando lles prenden lume, e as correas das mans ceibáronse.

¹⁵E atopou unha queixada de burro fresca, e, alongando a man, colleuna e escangallou con ela a mil homes.

¹⁶E dixo Sansón: —"Coa queixada dun burro, un burro, dous burros, coa queixada dun burro, arreeilles a mil homes".

¹⁷E, cando rematou de falar, soltou a queixada da súa man, e chamou a aquel lugar Ramat—Lehí.

¹⁸E tivo sede de abondo, e clamou polo Señor, dicindo: —"Ti puxeches nas mans do teu servo esta gran vitoria. E agora vou morrer de sede, e caer nas mans dos incircuncisos?"

¹⁹Entón Deus fendeu unha pía que había en Lehí e deitou auga dela. E bebeu, recuperou o seu ánimo, e xa alentou. Daquela púxolle de nome á fonte En—Hacoré (e existe en Lehí ata o día de hoxe).

²⁰E Sansón xulgou a Israel en tempos dos filisteos durante vinte anos.