Read Biblia SEPT Apocalipse 19 Bible Online

Apocalipse 19 - Biblia SEPT bible

Apocalipse 19

¹Despois disto oín no ceo coma unha forte voz dunha gran multitude, que dicía: "Aleluia! A salvación, a gloria e o poder son do noso Deus,

²porque verdadeiras e xustas son as súas sentencias. El condenou a gran Prostituta, que coa súa prostitución corrompeu o mundo, El vingou o sangue dos seus servos, que ela tiña no seu poder".

³Logo repetiron: "Aleluia! O fume do seu castigo sobe por todos os séculos".

⁴Entón os vinte e catro anciáns e os catro animais prostráronse para adoraren a Deus, que se sentaba no trono, e dicían: "Amén! Aleluia!"

⁵E do trono saíu un berro que dicía: "Loade o noso Deus, todos os seus servidores; tamén os que o respectades, pequenos e grandes!"

⁶Logo oín algo coma o algareo dunha gran multitude, coma o ruxido das augas abundantes e coma o estrondo dun forte trono, que dicía: "Aleluia! Porque comeza o Reino do Señor, o noso Deus, que todo o sostén.

⁷Alegrémonos e relouquemos e glorifiquémolo, porque chegaron as vodas do Año, e a súa esposa xa se preparou.

⁸Concedéuselle vestir de liño fino, ben curado e limpo, pois o liño fino son as obras boas do pobo santo".

⁹Logo o anxo díxome: "Escribe: Benia os que están convidados ó xantar das vodas do Año!". E volveume dicir: "Estas son cousas verdadeiramente propias de Deus".

¹⁰Boteime ós seus pés para o adorar; pero el díxome: "Non, non o fagas! Son un servo de Deus igual ca ti e cós teus irmáns, que manteñen o testemuño de Xesús. Adora a Deus, que dar testemuño de Xesús é ter espírito profético".

¹¹Despois vin o ceo aberto. E apareceu un cabalo branco; o cabaleiro que o monta chámase Fiel e Verdadeiro, xulga e loita con xustiza.

¹²Ten os ollos coma chamas de lume, na cabeza ten moitas diademas; e escrito un nome que ninguén coñece, fóra del mesmo.

¹³Leva posto un manto tinxido de sangue e o seu nome é "Palabra de Deus".

¹⁴Os exércitos celestes, vestidos de ben curado liño branco, van tras el en cabalos brancos.

¹⁵Da boca sáelle unha espada ben afiada, para ferir con ela os xentís: ha de os rexer cun caxato de ferro e pisa a moxega do viño rabioso da ira de Deus, que todo o sostén.

¹⁶Ten escrito no seu manto e na súa coxa un nome: "Rei de reis e Señor de señores".

¹⁷Logo tiven unha visión e vin un anxo de pé no sol. A grandes berros chamou por todos os paxaros que voan polo medio do ceo, dicíndolles: "Vide aquí, xuntádevos para o gran banquete de Deus!

¹⁸Para comer a carne de reis, de xenerais, de valentes, de cabalos e de cabaleiros; carne de todos os homes: libres e escravos, de pequenos e de grandes".

¹⁹Logo vin que a besta, os reis do mundo e mais os seus exércitos se xuntaban para faceren a guerra contra o cabaleiro do cabalo e contra o seu exército.

²⁰Colleron presos a besta e mais o falso profeta que estaba con ela: o que fixo os prodixios, cos que descamiñou ós que recibiron a marca da besta e adornaron a súa imaxe; botáronos vivos ós dous na lagoa de xofre ardendo.

²¹Os outros matáronos coa espada que saía da boca do cabaleiro que ía montado de a cabalo. Todos os paxaros quedaron fartos da súa carne.