Read Biblia SEPT Apocalipse 20 Bible Online

Apocalipse 20 - Biblia SEPT bible

Apocalipse 20

¹Logo vin que outro anxo baixaba do ceo, coa chave do abismo e unha cadea grande na man.

²Con ela amarrou forte ó dragón, serpe antiga, que é Satán e Satán, e encadeouno para mil anos.

³Botouno no abismo e pechou e púxolle selo á pechadura diante do dragón para que xa non extravíe máis as nacións ata que se cumpran os mil anos; despois hano soltar unha miguiña de tempo.

⁴Logo vin uns tronos. Os que sentaban neles déuselles o poder de xulgar. Vin tamén as ánimas dos degolados por mor do testemuño de Xesús e da palabra de Deus e mais as dos que non se prostraron para adorar a besta nin a súa imaxe nin recibiron a marca da besta na súa fronte nin nas súas mans. Estes volveron vivir e comezaron a reinar con Cristo mil anos.

⁵O resto dos mortos non volveron á vida ata completaren os mil anos: esta é a primeira resurrección.

⁶Benaventurado e santo o que participa nesta primeira resurrección! Sobre eles non ten poder a morte segunda: serán sacerdotes de Deus e de Cristo e reinarán con El mil anos.

⁷Cando se completen os mil anos, Satán vaise ver ceibe da súa cadea

⁸e sairá para engaiolar os xentís das catro esquinas do mundo, a Gog e a Magog, para os xuntar para a guerra. O número destes é coma o das areas do mar.

⁹Subiron por todo o ancho do mundo e rodearon o campamento dos santos e mais a cidade amada. Pero baixou do ceo lume e consumiunos.

¹⁰E, despois de os engaiolar, ó demo botárono na lagoa de lume e xofre, onde xa estaban a besta e mais o falso profeta. Alí hanos castigar día e noite polos séculos dos séculos.

¹¹Logo vin un gran trono branco e vin quen estaba nel sentado: da súa presenza fuxiron o ceo e a terra e deles non quedou nin rastro.

¹²Logo vin os mortos, grandes e pequenos, de pé diante do trono; e abríronse uns libros. Abriuse tamén outro libro, o libro da vida é ós mortos xulgáronos polo escrito nos libros, conforme as súas obras.

¹³O mar entregou os mortos que nel había; e a Morte e o Hades entregaron os mortos que neles había; e a cadaquén xulgárono polas súas obras.

¹⁴A Morte e ó Hades botáronos na lagoa de lume. Esta é a Morte segunda: a lagoa do lume.

¹⁵A quen non apareceu inscrito no libro da Vida botárono na lagoa do lume.