Read Biblia SEPT Apocalipse 5 Bible Online

Apocalipse 5 - Biblia SEPT bible

Apocalipse 5

¹E vin na dereita do que estaba sentado no trono un libro escrito por fóra e por dentro, pechado con sete selos.

²E vin un anxo forte, que clamaba con gran voz: "Quen pode abrir o libro e desenlear os seus selos?"

³E ninguén no ceo nin na terra nin debaixo da terra, daba aberto o libro nin lido nel.

⁴E eu choraba moito, porque non se atopaba ninguén digno de abrir o libro nin de ler nel.

⁵Pero díxome entón un dos anciáns: "Non chores, velaquí o león da raza de Xudá e rebento da raíz de David: venceu, e deste xeito pode abrir o libro e os seus sete selos".

⁶E vin no medio do trono e dos catro animais e diante dos anciáns, un Año en pé, coma se estivese degolado, con sete cornos e sete ollos, que son os sete espíritos de Deus, mandados a toda a terra.

⁷O Año achegouse ó trono e recibiu o libro da man dereita de quen está sentado no trono.

⁸Cando o colleu, os catro animais e os vinte e catro anciáns axeonlláronse diante do Año, con cadansúa cítara e con frascos de ouro cheos de perfumes, que son as oracións do pobo santo.

⁹E cantaban un canto novo: "Ti es merecente de recibir o libro, e de abrir os selos, porque te degolaron e adquiriches para Deus co teu sangue xentes de toda raza, lingua, pobo e nación.

¹⁰E fixeches deles un reino de sacerdotes para o noso Deus e reinarán na terra".

¹¹E vin e oín a voz de moitos anxos arredor do trono e dos animais e dos anciáns: o número deles era de milleiros e milleiros.

¹²Proclamaban con forte voz: "Merecente é o Año, por estar degolado, de recibir o poder, a riqueza, a sabedoría, a forza, a honra, a gloria e a bendición".

¹³E oín que todas as criaturas que están no ceo e na terra e debaixo da terra e enriba do mar e todas as cousas que hai nelas, proclamaban: "Para quen está sentado no trono e para o Año: a bendición, a honra, a gloria e o poder polos séculos dos séculos".

¹⁴E os catro animais dicían: "Amén" e os anciáns caeron en adoración.