Read Biblia SEPT 1 Samuel 9 Bible Online

1 Samuel 9 - Biblia SEPT bible

1 Samuel 9

¹Había un home de Benxamín que se chamaba Quix, fillo de Abiel, fillo de Seror, fillo de Becorat, fillo de Afíah, un benxaminita de boa posición.

²Tiña un fillo chamado Xaúl, un mozo garrido e lanzal, coma non había outro en Israel. Sobresaía entre todos dos ombreiros para arriba.

³O seu pai Quix extraviáranselle unhas burras e díxolle ó seu fillo Xaúl: —"Leva contigo un criado e vai na pescuda das burras".

⁴Atravesaron a montaña de Efraím e a bisbarra de Xalixah, pero non as atoparon. Cruzaron por Xalim, e non estaba. Atravesaron despois Benxamín, e tampouco estaban alí.

⁵Chegados á terra de Suf, Xaúl díxolle ó criado que ía con el: —"Imos dar a volta, non sexa que meu pai, deixando a cousa das burras, estea inquedo por nós".

⁶O criado respondeulle: —"Xustamente nesta cidade hai un home de Deus de moito creto. Todo o que anuncia acontece. Vamos alí onda el. O mellor dános razón do que estamos buscando".

⁷Xaúl reparou: —"Mais, de ir, que lle daremos a ese home? Non nos queda pan nas alforxas e non temos ningún agasallo que ofrecerlle ó home de Deus. Que nos queda?"

⁸O criado respondeulle: —"Aquí gardo aínda un cuarto de siclo de prata. Darémosllo ó home de Deus e el mostraranos o camiño".

⁹Antes en Israel, cando alguén ía consultar algo con Deus, tiña o costume de dicir: —"Vaiamos onda o vidente", porque ó profeta de agora chamábaselle antes vidente.

¹⁰Entón Xaúl asentiu: —"Está ben o que dis. Vamos alá". E entraron na cidade, onde estaba o home de Deus.

¹¹Cando subían a costa da cidade, encontráronse cunhas rapazas que saían a coller auga, e preguntáronlles: —"Está aquí o vidente?"

¹²—"Está", respondéronlles elas. "Aí vai, diante de vós. Dádevos présa. Hoxe veu á cidade, porque o pobo celebra hoxe un sacrificio no outeiro.

¹³En canto entredes na cidade, atoparédelo. Despois subirá ó outeiro para xantar. A xente non xantará mentres non chegue, pois é el quen bendicirá o sacrificio que despois comerán os convidados. Agora subide, que deseguida o encontraredes".

¹⁴Subiron eles á cidade e, ó entraren nela, atopáronse con Samuel, que pasaba diante deles para subir ó outeiro.

¹⁵A véspera da chegada de Xaúl, o Señor fixéralle a Samuel esta revelación:

¹⁶—"Mañá destas horas mandareiche un home do país de Benxamín, para que o unxas por xefe do meu pobo Israel. El librará este meu pobo da man dos filisteos, pois fixeime na mágoa do meu pobo, os seus berros chegaron onda min".

¹⁷Cando Samuel viu a Xaúl, o Señor indicoulle: —"Ese é o home que che dixen, o que gobernará ó meu pobo".

¹⁸Xaúl achegouse a Samuel, preto da porta da cidade, e preguntoulle: —"Dime, se fas o favor, onde é a casa do vidente".

¹⁹Samuel respondeulle: —"O vidente son eu. Sube ó outeiro canda min. Hoxe xantaredes comigo e mañá cedo despedireite e direiche o que hai no teu corazón.

²⁰Tocante ás burras que se che perderon hai agora tres días, non te inquietes por elas; xa apareceron. Amais, a quen pertence o máis prezado de Israel, senón a ti e á túa familia?"

²¹A iso dixo Xaúl: —"Non son eu un benxaminita, da máis pequena das tribos de Israel, e o meu clan dos máis insignificantes dos clans de Benxamín? Por que, logo, me falas así?"

²²Entón conduciu Samuel ó comedor a Xaúl e ó seu criado e sentounos á cabeceira de todos os convidados, unhas trinta persoas.

²³E díxolle ó cociñeiro: —"Trae a ración que che entreguei e que che mandei que gardases á parte".

²⁴O cociñeiro trouxo un pernil enteiro e serviullo a Xaúl. E Samuel díxolle: —"Estaba gardado para ti. Come, pois reservárase para esta ocasión, para que comas cos convidados". E Xaúl xantou aquel día con Samuel.

²⁵Despois baixaron do outeiro á cidade, e Samuel estivo de conversa con Xaúl no seu terrado.

²⁶Xaúl durmiu alí. O amencer, Samuel foino chamar: —"Érguete, que quero despedirte". Xaúl ergueuse, e saíron os dous xuntos para fóra.

²⁷Cando saían da cidade, Samuel díxolle a Xaúl: —"Dille ó criado que vaia diante, e ti agarda unha miga, que quero comunicarche a palabra de Deus".