Read Biblia Sacra juxta Vulgatam Clementinam Psalmi 69 Bible Online

Psalmi 69 - Biblia Sacra juxta Vulgatam Clementinam bible

Psalmi 69

¹In finem. Psalmus David in rememorationem, quod salvum fecerit eum Dominus.

²Deus, in adjutorium meum intende ; Domine, ad adjuvandum me festina.

³Confundantur, et revereantur, qui quærunt animam meam.

⁴Avertantur retrorsum, et erubescant, qui volunt mihi mala ; avertantur statim erubescentes qui dicunt mihi : Euge, euge !

⁵Exsultent et lætentur in te omnes qui quærunt te ; et dicant semper : Magnificetur Dominus, qui diligunt salutare tuum.

⁶Ego vero egenus et pauper sum ; Deus, adjuva me. Adjutor meus et liberator meus es tu ; Domine, ne moreris.