Read Biblia Sacra juxta Vulgatam Clementinam Canticum Canticorum 2 Bible Online

Canticum Canticorum 2 - Biblia Sacra juxta Vulgatam Clementinam bible

Canticum Canticorum 2

¹Ego flos campi, et lilium convallium.

²Sponsus Sicut lilium inter spinas, sic amica mea inter filias.

³Sponsa Sicut malus inter ligna silvarum, sic dilectus meus inter filios. Sub umbra illius quem desideraveram sedi, et fructus ejus dulcis gutturi meo.

⁴Introduxit me in cellam vinariam ; ordinavit in me caritatem.

⁵Fulcite me floribus, stipate me malis, quia amore langueo.

⁶Læva ejus sub capite meo, et dextera illius amplexabitur me.

⁷Sponsus Adjuro vos, filiæ Jerusalem, per capreas cervosque camporum, ne suscitetis, neque evigilare faciatis dilectam, quoadusque ipsa velit.

⁸Sponsa Vox dilecti mei ; ecce iste venit, saliens in montibus, transiliens colles.

⁹Similis est dilectus meus capreæ, hinnuloque cervorum. En ipse stat post parietem nostrum, respiciens per fenestras, prospiciens per cancellos.

¹⁰En dilectus meus loquitur mihi. Sponsus Surge, propera, amica mea, columba mea, formosa mea, et veni :

¹¹jam enim hiems transiit ; imber abiit, et recessit.

¹²Flores apparuerunt in terra nostra ; tempus putationis advenit : vox turturis audita est in terra nostra ;

¹³ficus protulit grossos suos ; vineæ florentes dederunt odorem suum. Surge, amica mea, speciosa mea, et veni :

¹⁴columba mea, in foraminibus petræ, in caverna maceriæ, ostende mihi faciem tuam, sonet vox tua in auribus meis : vox enim tua dulcis, et facies tua decora.

¹⁵Sponsa Capite nobis vulpes parvulas quæ demoliuntur vineas : nam vinea nostra floruit.

¹⁶Dilectus meus mihi, et ego illi, qui pascitur inter lilia,

¹⁷donec aspiret dies, et inclinentur umbræ. Revertere ; similis esto, dilecte mi, capreæ, hinnuloque cervorum super montes Bether.