Read Biblia Sacra juxta Vulgatam Clementinam Sapientia 12 Bible Online

Sapientia 12 - Biblia Sacra juxta Vulgatam Clementinam bible

Sapientia 12

¹O quam bonus et suavis est, Domine, spiritus tuus in omnibus !

²Ideoque eos qui exerrant partibus corripis, et de quibus peccant admones et alloqueris, ut relicta malitia credant in te, Domine.

³Illos enim antiquos inhabitatores terræ sanctæ tuæ, quos exhorruisti,

⁴quoniam odibilia opera tibi faciebant per medicamina et sacrificia injusta,

⁵et filiorum suorum necatores sine misericordia, et comestores viscerum hominum, et devoratores sanguinis a medio sacramento tuo,

⁶et auctores parentes animarum inauxiliatarum, perdere voluisti per manus parentum nostrorum :

⁷ut dignam perciperent peregrinationem puerorum Dei, quæ tibi omnium carior est terra.

⁸Sed et his tamquam hominibus pepercisti, et misisti antecessores exercitus tui vespas, ut illos paulatim exterminarent.

⁹Non quia impotens eras in bello subjicere impios justis, aut bestiis sævis, aut verbo duro simul exterminare :

¹⁰sed partibus judicans, dabas locum pœnitentiæ, non ignorans quoniam nequam est natio eorum, et naturalis malitia ipsorum, et quoniam non poterat mutari cogitatio illorum in perpetuum.

¹¹Semen enim erat maledictum ab initio ; nec timens aliquem, veniam dabas peccatis illorum.

¹²Quis enim dicet tibi : Quid fecisti ? aut quis stabit contra judicium tuum ? aut quis in conspectu tuo veniet vindex iniquorum hominum ? aut quis tibi imputabit, si perierint nationes quas tu fecisti ?

¹³Non enim est alius deus quam tu, cui cura est de omnibus, ut ostendas quoniam non injuste judicas judicium.

¹⁴Neque rex, neque tyrannus in conspectu tuo inquirent de his quos perdidisti.

¹⁵Cum ergo sis justus, juste omnia disponis ; ipsum quoque qui non debet puniri, condemnare, exterum æstimas a tua virtute.

¹⁶Virtus enim tua justitiæ initium est, et ob hoc quod Dominus es, omnibus te parcere facis.

¹⁷Virtutem enim ostendis tu, qui non crederis esse in virtute consummatus, et horum qui te nesciunt audaciam traducis.

¹⁸Tu autem dominator virtutis, cum tranquillitate judicas, et cum magna reverentia disponis nos : subest enim tibi, cum volueris posse.

¹⁹Docuisti autem populum tuum per talia opera, quoniam oportet justum esse et humanum ; et bonæ spei fecisti filios tuos, quoniam judicans das locum in peccatis pœnitentiæ.

²⁰Si enim inimicos servorum tuorum, et debitos morti, cum tanta cruciasti attentione, dans tempus et locum per quæ possent mutari a malitia :

²¹cum quanta diligentia judicasti filios tuos, quorum parentibus juramenta et conventiones dedisti bonarum promissionum !

²²Cum ergo das nobis disciplinam, inimicos nostros multipliciter flagellas, ut bonitatem tuam cogitemus judicantes, et cum de nobis judicatur, speremus misericordiam tuam.

²³Unde et illis qui in vita sua insensate et injuste vixerunt, per hæc quæ coluerunt dedisti summa tormenta.

²⁴Etenim in erroris via diutius erraverunt, deos æstimantes hæc quæ in animalibus sunt supervacua, infantium insensatorum more viventes.

²⁵Propter hoc tamquam pueris insensatis judicium in derisum dedisti.

²⁶Qui autem ludibriis et increpationibus non sunt correcti, dignum Dei judicium experti sunt.

²⁷In quibus enim patientes indignabantur per hæc quos putabant deos, in ipsis cum exterminarentur videntes, illum quem olim negabant se nosse, verum Deum agnoverunt ; propter quod et finis condemnationis eorum venit super illos.