Read Biblia Sacra juxta Vulgatam Clementinam Sapientia 2 Bible Online

Sapientia 2 - Biblia Sacra juxta Vulgatam Clementinam bible

Sapientia 2

¹Dixerunt enim cogitantes apud se non recte : Exiguum et cum tædio est tempus vitæ nostræ, et non est refrigerium in fine hominis, et non est qui agnitus sit reversus ab inferis.

²Quia ex nihilo nati sumus, et post hoc erimus tamquam non fuerimus. Quoniam fumus flatus est in naribus nostris, et sermo scintilla ad commovendum cor nostrum :

³qua extincta, cinis erit corpus nostrum, et spiritus diffundetur tamquam mollis aër ; et transibit vita nostra tamquam vestigium nubis, et sicut nebula dissolvetur quæ fugata est a radiis solis, et a calore illius aggravata.

⁴Et nomen nostrum oblivionem accipiet per tempus, et nemo memoriam habebit operum nostrorum.

⁵Umbræ enim transitus est tempus nostrum, et non est reversio finis nostri : quoniam consignata est, et nemo revertitur.

⁶Venite ergo, et fruamur bonis quæ sunt, et utamur creatura tamquam in juventute celeriter.

⁷Vino pretioso et unguentis nos impleamus, et non prætereat nos flos temporis.

⁸Coronemus nos rosis antequam marcescant ; nullum pratum sit quod non pertranseat luxuria nostra :

⁹nemo nostrum exsors sit luxuriæ nostræ. Ubique relinquamus signa lætitiæ, quoniam hæc est pars nostra, et hæc est sors.

¹⁰Opprimamus pauperem justum, et non parcamus viduæ, nec veterani revereamur canos multi temporis :

¹¹sit autem fortitudo nostra lex justitiæ ; quod enim infirmum est, inutile invenitur.

¹²Circumveniamus ergo justum, quoniam inutilis est nobis, et contrarius est operibus nostris, et improperat nobis peccata legis, et diffamat in nos peccata disciplinæ nostræ.

¹³Promittit se scientiam Dei habere, et filium Dei se nominat.

¹⁴Factus est nobis in traductionem cogitationum nostrarum.

¹⁵Gravis est nobis etiam ad videndum, quoniam dissimilis est aliis vita illius, et immutatæ sunt viæ ejus.

¹⁶Tamquam nugaces æstimati sumus ab illo, et abstinet se a viis nostris tamquam ab immunditiis, et præfert novissima justorum, et gloriatur patrem se habere Deum.

¹⁷Videamus ergo si sermones illius veri sint, et tentemus quæ ventura sunt illi, et sciemus quæ erunt novissima illius.

¹⁸Si enim est verus filius Dei, suscipiet illum, et liberabit eum de manibus contrariorum.

¹⁹Contumelia et tormento interrogemus eum, ut sciamus reverentiam ejus, et probemus patientiam illius.

²⁰Morte turpissima condemnemus eum ; erit enim ei respectus ex sermonibus illius.

²¹Hæc cogitaverunt, et erraverunt : excæcavit enim illos malitia eorum.

²²Et nescierunt sacramenta Dei : neque mercedem speraverunt justitiæ, nec judicaverunt honorem animarum sanctarum.

²³Quoniam Deus creavit hominem inexterminabilem, et ad imaginem similitudinis suæ fecit illum.

²⁴Invidia autem diaboli mors introivit in orbem terrarum :

²⁵imitantur autem illum qui sunt ex parte illius.