Read Biblia Sacra juxta Vulgatam Clementinam Sapientia 3 Bible Online

Sapientia 3 - Biblia Sacra juxta Vulgatam Clementinam bible

Sapientia 3

¹Justorum autem animæ in manu Dei sunt, et non tanget illos tormentum mortis.

²Visi sunt oculis insipientium mori, et æstimata est afflictio exitus illorum,

³et quod a nobis est iter exterminium ; illi autem sunt in pace :

⁴etsi coram hominibus tormenta passi sunt, spes illorum immortalitate plena est.

⁵In paucis vexati sunt, in multis bene disponentur, quoniam Deus tentavit eos, et invenit illos dignos se.

⁶Tamquam aurum in fornace probavit illos, et quasi holocausti hostiam accepit illos, et in tempore erit respectus illorum.

⁷Fulgebunt justi et tamquam scintillæ in arundineto discurrent.

⁸Judicabunt nationes, et dominabuntur populis, et regnabit Dominus illorum in perpetuum.

⁹Qui confidunt in illo intelligent veritatem, et fideles in dilectione acquiescent illi, quoniam donum et pax est electis ejus.

¹⁰Impii autem secundum quæ cogitaverunt correptionem habebunt : qui neglexerunt justum, et a Domino recesserunt.

¹¹Sapientiam enim et disciplinam qui abjicit infelix est : et vacua est spes illorum, et labores sine fructu, et inutilia opera eorum.

¹²Mulieres eorum insensatæ sunt, et nequissimi filii eorum.

¹³Maledicta creatura eorum, quoniam felix est sterilis ; et incoinquinata, quæ nescivit thorum in delicto, habebit fructum in respectione animarum sanctarum ;

¹⁴et spado qui non operatus est per manus suas iniquitatem, nec cogitavit adversus Deum nequissima : dabitur enim illi fidei donum electum, et sors in templo Dei acceptissima.

¹⁵Bonorum enim laborum gloriosus est fructus, et quæ non concidat radix sapientiæ.

¹⁶Filii autem adulterorum in inconsummatione erunt, et ab iniquo thoro semen exterminabitur.

¹⁷Et si quidem longæ vitæ erunt, in nihilum computabuntur, et sine honore erit novissima senectus illorum :

¹⁸et si celerius defuncti fuerint, non habebunt spem, nec in die agnitionis allocutionem.

¹⁹Nationis enim iniquæ diræ sunt consummationes.