Read Biblia Sacra juxta Vulgatam Clementinam Sapientia 5 Bible Online

Sapientia 5 - Biblia Sacra juxta Vulgatam Clementinam bible

Sapientia 5

¹Tunc stabunt justi in magna constantia adversus eos qui se angustiaverunt, et qui abstulerunt labores eorum.

²Videntes turbabuntur timore horribili, et mirabuntur in subitatione insperatæ salutis ;

³dicentes intra se, pœnitentiam agentes, et præ angustia spiritus gementes : Hi sunt quos habuimus aliquando in derisum, et in similitudinem improperii.

⁴Nos insensati, vitam illorum æstimabamus insaniam, et finem illorum sine honore ;

⁵ecce quomodo computati sunt inter filios Dei, et inter sanctos sors illorum est.

⁶Ergo erravimus a via veritatis, et justitiæ lumen non luxit nobis, et sol intelligentiæ non est ortus nobis.

⁷Lassati sumus in via iniquitatis et perditionis, et ambulavimus vias difficiles : viam autem Domini ignoravimus.

⁸Quid nobis profuit superbia ? aut divitiarum jactantia quid contulit nobis ?

⁹Transierunt omnia illa tamquam umbra, et tamquam nuntius percurrens,

¹⁰et tamquam navis quæ pertransit fluctuantem aquam, cujus cum præterierit non est vestigium invenire, neque semitam carinæ illius in fluctibus ;

¹¹aut tamquam avis quæ transvolat in aëre, cujus nullum invenitur argumentum itineris, sed tantum sonitus alarum verberans levem ventum, et scindens per vim itineris aërem : commotis alis transvolavit, et post hoc nullum signum invenitur itineris illius ;

¹²aut tamquam sagitta emissa in locum destinatum, divisus aër continuo in se reclusus est, ut ignoretur transitus illius :

¹³sic et nos nati continuo desivimus esse ; et virtutis quidem nullum signum valuimus ostendere, in malignitate autem nostra consumpti sumus.

¹⁴Talia dixerunt in inferno hi qui peccaverunt :

¹⁵quoniam spes impii tamquam lanugo est quæ a vento tollitur, et tamquam spuma gracilis quæ a procella dispergitur, et tamquam fumus qui a vento diffusus est, et tamquam memoria hospitis unius diei prætereuntis.

¹⁶Justi autem in perpetuum vivent, et apud Dominum est merces eorum, et cogitatio illorum apud Altissimum.

¹⁷Ideo accipient regnum decoris, et diadema speciei de manu Domini : quoniam dextera sua teget eos, et brachio sancto suo defendet illos.

¹⁸Accipiet armaturam zelus illius, et armabit creaturam ad ultionem inimicorum.

¹⁹Induet pro thorace justitiam, et accipiet pro galea judicium certum ;

²⁰sumet scutum inexpugnabile æquitatem.

²¹Acuet autem duram iram in lanceam, et pugnabit cum illo orbis terrarum contra insensatos.

²²Ibunt directe emissiones fulgurum, et tamquam a bene curvato arcu nubium exterminabuntur, et ad certum locum insilient.

²³Et a petrosa ira plenæ mittentur grandines ; excandescet in illos aqua maris, et flumina concurrent duriter.

²⁴Contra illos stabit spiritus virtutis, et tamquam turbo venti dividet illos ; et ad eremum perducet omnem terram iniquitas illorum, et malignitas evertet sedes potentium.