Read Biblia Sacra juxta Vulgatam Clementinam Sapientia 6 Bible Online

Sapientia 6 - Biblia Sacra juxta Vulgatam Clementinam bible

Sapientia 6

¹Melior est sapientia quam vires, et vir prudens quam fortis.

²Audite ergo, reges, et intelligite ; discite, judices finium terræ.

³Præbete aures, vos qui continetis multitudines, et placetis vobis in turbis nationum.

⁴Quoniam data est a Domino potestas vobis, et virtus ab Altissimo : qui interrogabit opera vestra, et cogitationes scrutabitur.

⁵Quoniam cum essetis ministri regni illius, non recte judicastis, nec custodistis legem justitiæ, neque secundum voluntatem Dei ambulastis.

⁶Horrende et cito apparebit vobis, quoniam judicium durissimum his qui præsunt fiet.

⁷Exiguo enim conceditur misericordia ; potentes autem potenter tormenta patientur.

⁸Non enim subtrahet personam cujusquam Deus, nec verebitur magnitudinem ejus cujusquam, quoniam pusillum et magnum ipse fecit, et æqualiter cura est illi de omnibus.

⁹Fortioribus autem fortior instat cruciatio.

¹⁰Ad vos ergo, reges, sunt hi sermones mei : ut discatis sapientiam, et non excidatis.

¹¹Qui enim custodierint justa juste, justificabuntur ; et qui didicerint ista, invenient quid respondeant.

¹²Concupiscite ergo sermones meos ; diligite illos, et habebitis disciplinam.

¹³Clara est, et quæ numquam marcescit, sapientia : et facile videtur ab his qui diligunt eam, et invenitur ab his qui quærunt illam.

¹⁴Præoccupat qui se concupiscunt, ut illis se prior ostendat.

¹⁵Qui de luce vigilaverit ad illam non laborabit ; assidentem enim illam foribus suis inveniet.

¹⁶Cogitare ergo de illa sensus est consummatus, et qui vigilaverit propter illam cito securus erit.

¹⁷Quoniam dignos se ipsa circuit quærens, et in viis ostendit se hilariter, et in omni providentia occurrit illis.

¹⁸Initium enim illius verissima est disciplinæ concupiscentia.

¹⁹Cura ergo disciplinæ dilectio est, et dilectio custodia legum illius est ; custoditio autem legum consummatio incorruptionis est ;

²⁰incorruptio autem facit esse proximum Deo.

²¹Concupiscentia itaque sapientiæ deducit ad regnum perpetuum.

²²Si ergo delectamini sedibus et sceptris, o reges populi, diligite sapientiam, ut in perpetuum regnetis :

²³diligite lumen sapientiæ, omnes qui præestis populis.

²⁴Quid est autem sapientia, et quemadmodum facta sit, referam, et non abscondam a vobis sacramenta Dei : sed ab initio nativitatis investigabo, et ponam in lucem scientiam illius, et non præteribo veritatem.

²⁵Neque cum invidia tabescente iter habebo, quoniam talis homo non erit particeps sapientiæ.

²⁶Multitudo autem sapientium sanitas est orbis terrarum, et rex sapiens stabilimentum populi est.

²⁷Ergo accipite disciplinam per sermones meos, et proderit vobis.