Read Biblia Sacra juxta Vulgatam Clementinam Ecclesiasticus 1 Bible Online

Ecclesiasticus 1 - Biblia Sacra juxta Vulgatam Clementinam bible

Ecclesiasticus 1

¹Prologus Multorum nobis et magnorum per legem, et prophetas, aliosque qui secuti sunt illos, sapientia demonstrata est, in quibus oportet laudare Israël doctrinæ et sapientiæ causa, quia non solum ipsos loquentes necesse est esse peritos, sed etiam extraneos posse et dicentes et scribentes doctissimos fieri. Avus meus Jesus, postquam se amplius dedit ad diligentiam lectionis legis, et prophetarum, et aliorum librorum qui nobis a parentibus nostris traditi sunt, voluit et ipse scribere aliquid horum quæ ad doctrinam et sapientiam pertinent, ut desiderantes discere, et illorum periti facti, magis magisque attendant animo, et confirmentur ad legitimam vitam. Hortor itaque venire vos cum benevolentia, et attentiori studio lectionem facere, et veniam habere in illis, in quibus videmur, sequentes imaginem sapientiæ, deficere in verborum compositione. Nam deficiunt verba hebraica, quando fuerint translata ad alteram linguam : non autem solum hæc, sed et ipsa lex, et prophetæ, ceteraque aliorum libro(...)

²Arenam maris, et pluviæ guttas, et dies sæculi, quis dinumeravit ? altitudinem cæli, et latitudinem terræ, et profundum abyssi, quis dimensus est ?

³sapientiam Dei præcedentem omnia, quis investigavit ?

⁴Prior omnium creata est sapientia, et intellectus prudentiæ ab ævo.

⁵Fons sapientiæ verbum Dei in excelsis, et ingressus illius mandata æterna.

⁶Radix sapientiæ cui revelata est ? et astutias illius quis agnovit ?

⁷disciplina sapientiæ cui revelata est et manifestata ? et multiplicationem ingressus illius quis intellexit ?

⁸Unus est altissimus, Creator omnipotens, et rex potens et metuendus nimis, sedens super thronum illius, et dominans Deus.

⁹Ipse creavit illam in Spiritu Sancto, et vidit, et dinumeravit, et mensus est :

¹⁰et effudit illam super omnia opera sua, et super omnem carnem, secundum datum suum, et præbuit illam diligentibus se.

¹¹Timor Domini gloria, et gloriatio, et lætitia, et corona exsultationis.

¹²Timor Domini delectabit cor, et dabit lætitiam, et gaudium, et longitudinem dierum.

¹³Timenti Dominum bene erit in extremis, et in die defunctionis suæ benedicetur.

¹⁴Dilectio Dei honorabilis sapientia :

¹⁵quibus autem apparuerit in visu diligunt eam in visione, et in agnitione magnalium suorum.

¹⁶Initium sapientiæ timor Domini : et cum fidelibus in vulva concreatus est : cum electis feminis graditur, et cum justis et fidelibus agnoscitur.

¹⁷Timor Domini scientiæ religiositas :

¹⁸religiositas custodiet et justificabit cor ; jucunditatem atque gaudium dabit.

¹⁹Timenti Dominum bene erit, et in diebus consummationis illius benedicetur.

²⁰Plenitudo sapientiæ est timere Deum, et plenitudo a fructibus illius.

²¹Omnem domum illius implebit a generationibus, et receptacula a thesauris illius.

²²Corona sapientiæ timor Domini, replens pacem et salutis fructum :

²³et vidit, et dinumeravit eam : utraque autem sunt dona Dei.

²⁴Scientiam et intellectum prudentiæ sapientia compartietur, et gloriam tenentium se exaltat.

²⁵Radix sapientiæ est timere Dominum, et rami illius longævi.

²⁶In thesauris sapientiæ intellectus et scientiæ religiositas : execratio autem peccatoribus sapientia.

²⁷Timor Domini expellit peccatum :

²⁸nam qui sine timore est non poterit justificari : iracundia enim animositatis illius subversio illius est.

²⁹Usque in tempus sustinebit patiens, et postea redditio jucunditatis.

³⁰Bonus sensus usque in tempus abscondet verba illius, et labia multorum enarrabunt sensum illius.

³¹In thesauris sapientiæ significatio disciplinæ :

³²execratio autem peccatori cultura Dei.

³³Fili, concupiscens sapientiam, conserva justitiam, et Deus præbebit illam tibi.

³⁴Sapientia enim et disciplina timor Domini : et quod beneplacitum est illi,

³⁵fides et mansuetudo, et adimplebit thesauros illius.

³⁶Ne sis incredibilis timori Domini, et ne accesseris ad illum duplici corde.

³⁷Ne fueris hypocrita in conspectu hominum, et non scandalizeris in labiis tuis.

³⁸Attende in illis, ne forte cadas, et adducas animæ tuæ inhonorationem :

³⁹et revelet Deus absconsa tua, et in medio synagogæ elidat te :

⁴⁰quoniam accessisti maligne ad Dominum, et cor tuum plenum est dolo et fallacia.