Read Biblia Sacra juxta Vulgatam Clementinam Ecclesiasticus 12 Bible Online

Ecclesiasticus 12 - Biblia Sacra juxta Vulgatam Clementinam bible

Ecclesiasticus 12

¹Si benefeceris, scito cui feceris, et erit gratia in bonis tuis multa.

²Benefac justo, et invenies retributionem magnam : et si non ab ipso, certe a Domino.

³Non est enim ei bene qui assiduus est in malis, et eleemosynas non danti : quoniam et Altissimus odio habet peccatores, et misertus est pœnitentibus.

⁴Da misericordi, et ne suscipias peccatorem : et impiis et peccatoribus reddet vindictam, custodiens eos in diem vindictæ.

⁵Da bono, et non receperis peccatorem.

⁶Benefac humili, et non dederis impio : prohibe panes illi dari, ne in ipsis potentior te sit :

⁷nam duplicia mala invenies in omnibus bonis quæcumque feceris illi, quoniam et Altissimus odio habet peccatores, et impiis reddet vindictam.

⁸Non agnoscetur in bonis amicus, et non abscondetur in malis inimicus.

⁹In bonis viri, inimici illius in tristitia : et in malitia illius, amicus agnitus est.

¹⁰Non credas inimico tuo in æternum : sicut enim æramentum æruginat nequitia illius :

¹¹et si humiliatus vadat curvus, adjice animum tuum, et custodi te ab illo.

¹²Non statuas illum penes te, nec sedeat ad dexteram tuam, ne forte conversus in locum tuum, inquirat cathedram tuam, et in novissimo agnosces verba mea, et in sermonibus meis stimuleris.

¹³Quis miserebitur incantatori a serpente percusso, et omnibus qui appropiant bestiis ? et sic qui comitatur cum viro iniquo, et obvolutus est in peccatis ejus.

¹⁴Una hora tecum permanebit : si autem declinaveris, non supportabit.

¹⁵In labiis suis indulcat inimicus, et in corde suo insidiatur ut subvertat te in foveam.

¹⁶In oculis suis lacrimatur inimicus, et si invenerit tempus, non satiabitur sanguine.

¹⁷Et si incurrerint tibi mala, invenies eum illic priorem.

¹⁸In oculis suis lacrimatur inimicus, et quasi adjuvans suffodiet plantas tuas.

¹⁹Caput suum movebit, et plaudet manu, et multa susurrans commutabit vultum suum.