Read Biblia Sacra juxta Vulgatam Clementinam Ecclesiasticus 22 Bible Online

Ecclesiasticus 22 - Biblia Sacra juxta Vulgatam Clementinam bible

Ecclesiasticus 22

¹In lapide luteo lapidatus est piger : et omnes loquentur super aspernationem illius.

²De stercore boum lapidatus est piger : et omnis qui tetigerit eum excutiet manus.

³Confusio patris est de filio indisciplinato : filia autem in deminoratione fiet.

⁴Filia prudens hæreditas viro suo : nam quæ confundit, in contumeliam fit genitoris.

⁵Patrem et virum confundit audax, et ab impiis non minorabitur : ab utrisque autem inhonorabitur.

⁶Musica in luctu importuna narratio : flagella et doctrina in omni tempore sapientia.

⁷Qui docet fatuum, quasi qui conglutinat testam.

⁸Qui narrat verbum non audienti, quasi qui excitat dormientem de gravi somno.

⁹Cum dormiente loquitur qui enarrat stulto sapientiam : et in fine narrationis dicit : Quis est hic ?

¹⁰Supra mortuum plora, defecit enim lux ejus : et supra fatuum plora, defecit enim sensus.

¹¹Modicum plora super mortuum, quoniam requievit :

¹²nequissimi enim nequissima vita super mortem fatui.

¹³Luctus mortui septem dies : fatui autem et impii omnes dies vitæ illorum.

¹⁴Cum stulto ne multum loquaris, et cum insensato ne abieris.

¹⁵Serva te ab illo, ut non molestiam habeas, et non coinquinaberis peccato illius.

¹⁶Deflecte ab illo, et invenies requiem, et non acediaberis in stultitia illius.

¹⁷Super plumbum quid gravabitur ? et quod illi aliud nomen quam fatuus ?

¹⁸Arenam, et salem, et massam ferri facilius est ferre quam hominem imprudentem, et fatuum, et impium.

¹⁹Loramentum ligneum colligatum in fundamento ædificii non dissolvetur, sic et cor confirmatum in cogitatione consilii.

²⁰Cogitatus sensati in omni tempore metu non depravabitur.

²¹Sicut pali in excelsis, et cæmenta sine impensa posita, contra faciem venti non permanebunt :

²²sic et cor timidum in cogitatione stulti contra impetum timoris non resistet.

²³Sicut cor trepidum in cogitatione fatui omni tempore non metuet, sic et qui in præceptis Dei permanet semper.

²⁴Pungens oculum deducit lacrimas, et qui pungit cor profert sensum.

²⁵Mittens lapidem in volatilia, dejiciet illa : sic et qui conviciatur amico, dissolvit amicitiam.

²⁶Ad amicum etsi produxeris gladium, non desperes : est enim regressus. Ad amicum

²⁷si aperueris os triste, non timeas : est enim concordatio : excepto convitio, et improperio, et superbia, et mysterii revelatione, et plaga dolosa : in his omnibus effugiet amicus.

²⁸Fidem posside cum amico in paupertate illius, ut et in bonis illius læteris.

²⁹In tempore tribulationis illius permane illi fidelis, ut et in hæreditate illius cohæres sis.

³⁰Ante ignem camini vapor et fumus ignis inaltatur : sic et ante sanguinem maledicta, et contumeliæ, et minæ.

³¹Amicum salutare non confundar, a facie illius non me abscondam : et si mala mihi evenerint per illum, sustinebo.

³²Omnis qui audiet cavebit se ab eo.

³³Quis dabit ori meo custodiam, et super labia mea signaculum certum, ut non cadam ab ipsis, et lingua mea perdat me ?