Read Biblia Sacra juxta Vulgatam Clementinam Ecclesiasticus 24 Bible Online

Ecclesiasticus 24 - Biblia Sacra juxta Vulgatam Clementinam bible

Ecclesiasticus 24

¹Sapientia laudabit animam suam, et in Deo honorabitur, et in medio populi sui gloriabitur,

²et in ecclesiis Altissimi aperiet os suum, et in conspectu virtutis illius gloriabitur,

³et in medio populi sui exaltabitur, et in plenitudine sancta admirabitur,

⁴et in multitudine electorum habebit laudem, et inter benedictos benedicetur, dicens :

⁵Ego ex ore Altissimi prodivi, primogenita ante omnem creaturam.

⁶Ego feci in cælis ut oriretur lumen indeficiens, et sicut nebula texi omnem terram.

⁷Ego in altissimis habitavi, et thronus meus in columna nubis.

⁸Gyrum cæli circuivi sola, et profundum abyssi penetravi : in fluctibus maris ambulavi.

⁹Et in omni terra steti : et in omni populo,

¹⁰et in omni gente primatum habui :

¹¹et omnium excellentium et humilium corda virtute calcavi. Et in his omnibus requiem quæsivi, et in hæreditate Domini morabor.

¹²Tunc præcepit, et dixit mihi Creator omnium : et qui creavit me, requievit in tabernaculo meo.

¹³Et dixit mihi : In Jacob inhabita, et in Israël hæreditare, et in electis meis mitte radices.

¹⁴Ab initio et ante sæcula creata sum, et usque ad futurum sæculum non desinam : et in habitatione sancta coram ipso ministravi.

¹⁵Et sic in Sion firmata sum, et in civitate sanctificata similiter requievi, et in Jerusalem potestas mea.

¹⁶Et radicavi in populo honorificato, et in parte Dei mei hæreditas illius, et in plenitudine sanctorum detentio mea.

¹⁷Quasi cedrus exaltata sum in Libano, et quasi cypressus in monte Sion :

¹⁸quasi palma exaltata sum in Cades, et quasi plantatio rosæ in Jericho :

¹⁹quasi oliva speciosa in campis, et quasi platanus exaltata sum juxta aquam in plateis.

²⁰Sicut cinnamomum et balsamum aromatizans odorem dedi ; quasi myrrha electa dedi suavitatem odoris :

²¹et quasi storax, et galbanus, et ungula, et gutta, et quasi Libanus non incisus vaporavi habitationem meam, et quasi balsamum non mistum odor meus.

²²Ego quasi terebinthus extendi ramos meos, et rami mei honoris et gratiæ.

²³Ego quasi vitis fructificavi suavitatem odoris : et flores mei fructus honoris et honestatis.

²⁴Ego mater pulchræ dilectionis, et timoris, et agnitionis, et sanctæ spei.

²⁵In me gratia omnis viæ et veritatis : in me omnis spes vitæ et virtutis.

²⁶Transite ad me, omnes qui concupiscitis me, et a generationibus meis implemini :

²⁷spiritus enim meus super mel dulcis, et hæreditas mea super mel et favum.

²⁸Memoria mea in generationes sæculorum.

²⁹Qui edunt me, adhuc esurient, et qui bibunt me, adhuc sitient.

³⁰Qui audit me non confundetur, et qui operantur in me non peccabunt :

³¹qui elucidant me, vitam æternam habebunt.

³²Hæc omnia liber vitæ, et testamentum Altissimi, et agnitio veritatis.

³³Legem mandavit Moyses in præceptis justitiarum, et hæreditatem domui Jacob, et Israël promissiones.

³⁴Posuit David, puero suo, excitare regem ex ipso fortissimum, et in throno honoris sedentem in sempiternum.

³⁵Qui implet quasi Phison sapientiam, et sicut Tigris in diebus novorum :

³⁶qui adimplet quasi Euphrates sensum, qui multiplicat quasi Jordanis in tempore messis :

³⁷qui mittit disciplinam sicut lucem, et assistens quasi Gehon in die vindemiæ.

³⁸Qui perficit primus scire ipsam, et infirmior non investigabit eam.

³⁹A mari enim abundavit cogitatio ejus, et consilium illius ab abysso magna.

⁴⁰Ego sapientia effudi flumina :

⁴¹ego quasi trames aquæ immensæ de fluvio : ego quasi fluvii dioryx, et sicut aquæductus exivi de paradiso.

⁴²Dixi : Rigabo hortum meum plantationum, et inebriabo prati mei fructum.

⁴³Et ecce factus est mihi trames abundans, et fluvius meus appropinquavit ad mare :

⁴⁴quoniam doctrinam quasi antelucanum illumino omnibus, et enarrabo illam usque ad longinquum.

⁴⁵Penetrabo omnes inferiores partes terræ, et inspiciam omnes dormientes, et illuminabo omnes sperantes in Domino.

⁴⁶Adhuc doctrinam quasi prophetiam effundam, et relinquam illam quærentibus sapientiam, et non desinam in progenies illorum usque in ævum sanctum.

⁴⁷Videte quoniam non soli mihi laboravi, sed omnibus exquirentibus veritatem.