Read Biblia Sacra juxta Vulgatam Clementinam Ecclesiasticus 31 Bible Online

Ecclesiasticus 31 - Biblia Sacra juxta Vulgatam Clementinam bible

Ecclesiasticus 31

¹Vigilia honestatis tabefaciet carnes, et cogitatus illius auferet somnum.

²Cogitatus præscientiæ avertit sensum, et infirmitas gravis sobriam facit animam.

³Laboravit dives in congregatione substantiæ, et in requie sua replebitur bonis suis.

⁴Laboravit pauper in diminutione victus, et in fine inops fit.

⁵Qui aurum diligit non justificabitur, et qui insequitur consumptionem replebitur ex ea.

⁶Multi dati sunt in auri casus, et facta est in specie ipsius perditio illorum.

⁷Lignum offensionis est aurum sacrificantium : væ illis qui sectantur illud ! et omnis imprudens deperiet in illo.

⁸Beatus dives qui inventus est sine macula, et qui post aurum non abiit, nec speravit in pecunia et thesauris.

⁹Quis est hic ? et laudabimus eum : fecit enim mirabilia in vita sua.

¹⁰Qui probatus est in illo, et perfectus est, erit illi gloria æterna : qui potuit transgredi, et non est transgressus ; facere mala, et non fecit.

¹¹Ideo stabilita sunt bona illius in Domino, et eleemosynas illius enarrabit omnis ecclesia sanctorum.

¹²Supra mensam magnam sedisti ? non aperias super illam faucem tuam prior.

¹³Non dicas sic : Multa sunt, quæ super illam sunt.

¹⁴Memento quoniam malus est oculus nequam.

¹⁵Nequius oculo quid creatum est ? ideo ab omni facie sua lacrimabitur, cum viderit.

¹⁶Ne extendas manum tuam prior, et invidia contaminatus erubescas.

¹⁷Ne comprimaris in convivio.

¹⁸Intellige quæ sunt proximi tui ex teipso.

¹⁹Utere quasi homo frugi his quæ tibi apponuntur : ne, cum manducas multum, odio habearis.

²⁰Cessa prior causa disciplinæ : et noli nimius esse, ne forte offendas.

²¹Et si in medio multorum sedisti, prior illis ne extendas manum tuam, nec prior poscas bibere.

²²Quam sufficiens est homini erudito vinum exiguum ! et in dormiendo non laborabis ab illo, et non senties dolorem.

²³Vigilia, cholera et tortura viro infrunito,

²⁴somnus sanitatis in homine parco : dormiet usque mane, et anima illius cum ipso delectabitur.

²⁵Et si coactus fueris in edendo multum, surge e medio, evome, et refrigerabit te, et non adduces corpori tuo infirmitatem.

²⁶Audi me, fili, et ne spernas me, et in novissimo invenies verba mea.

²⁷In omnibus operibus tuis esto velox, et omnis infirmitas non occurret tibi.

²⁸Splendidum in panibus benedicent labia multorum, et testimonium veritatis illius fidele.

²⁹Nequissimo in pane murmurabit civitas, et testimonium nequitiæ illius verum est.

³⁰Diligentes in vino noli provocare : multos enim exterminavit vinum.

³¹Ignis probat ferrum durum : sic vinum corda superborum arguet in ebrietate potatum.

³²Æqua vita hominibus vinum in sobrietate : si bibas illud moderate, eris sobrius.

³³Quæ vita est ei qui minuitur vino ?

³⁴Quid defraudat vitam ? mors.

³⁵Vinum in jucunditatem creatum est, et non in ebrietatem ab initio.

³⁶Exsultatio animæ et cordis vinum moderate potatum.

³⁷Sanitas est animæ et corpori sobrius potus.

³⁸Vinum multum potatum irritationem, et iram, et ruinas multas facit.

³⁹Amaritudo animæ vinum multum potatum.

⁴⁰Ebrietatis animositas, imprudentis offensio, minorans virtutem, et faciens vulnera.

⁴¹In convivio vini non arguas proximum, et non despicias eum in jucunditate illius.

⁴²Verba improperii non dicas illi, et non premas illum repetendo.