Read Biblia Sacra juxta Vulgatam Clementinam Ecclesiasticus 34 Bible Online

Ecclesiasticus 34 - Biblia Sacra juxta Vulgatam Clementinam bible

Ecclesiasticus 34

¹Vana spes et mendacium viro insensato : et somnia extollunt imprudentes.

²Quasi qui apprehendit umbram et persequitur ventum, sic et qui attendit ad visa mendacia.

³Hoc secundum hoc visio somniorum, ante faciem hominis similitudo hominis.

⁴Ab immundo, quid mundabitur ? et a mendace, quid verum dicetur ?

⁵Divinatio erroris, et auguria mendacia, et somnia malefacientium, vanitas est :

⁶et sicut parturientis, cor tuum phantasias patitur. Nisi ab Altissimo fuerit emissa visitatio, ne dederis in illis cor tuum :

⁷multos enim errare fecerunt somnia, et exciderunt sperantes in illis.

⁸Sine mendacio consummabitur verbum legis, et sapientia in ore fidelis complanabitur.

⁹Qui non est tentatus quid scit ? vir in multis expertus cogitabit multa : et qui multa didicit enarrabit intellectum.

¹⁰Qui non est expertus pauca recognoscit : qui autem in multis factus est, multiplicat malitiam.

¹¹Qui tentatus non est qualia scit ? qui implanatus est abundabit nequitia.

¹²Multa vidi errando, et plurimas verborum consuetudines.

¹³Aliquoties usque ad mortem periclitatus sum horum causa, et liberatus sum gratia Dei.

¹⁴Spiritus timentium Deum quæritur, et in respectu illius benedicetur.

¹⁵Spes enim illorum in salvantem illos, et oculi Dei in diligentes se.

¹⁶Qui timet Dominum nihil trepidabit : et non pavebit, quoniam ipse est spes ejus.

¹⁷Timentis Dominum, beata est anima ejus.

¹⁸Ad quem respicit, et quis est fortitudo ejus ?

¹⁹Oculi Domini super timentes eum : protector potentiæ, firmamentum virtutis, tegimen ardoris, et umbraculum meridiani :

²⁰deprecatio offensionis, et adjutorium casus : exaltans animam, et illuminans oculos, dans sanitatem, et vitam, et benedictionem.

²¹Immolantis ex iniquo oblatio est maculata, et non sunt beneplacitæ subsannationes injustorum.

²²Dominus solus sustinentibus se in via veritatis et justitiæ.

²³Dona iniquorum non probat Altissimus, nec respicit in oblationes iniquorum, nec in multitudine sacrificiorum eorum propitiabitur peccatis.

²⁴Qui offert sacrificium ex substantia pauperum, quasi qui victimat filium in conspectu patris sui.

²⁵Panis egentium vita pauperum est : qui defraudat illum homo sanguinis est.

²⁶Qui aufert in sudore panem, quasi qui occidit proximum suum.

²⁷Qui effundit sanguinem, et qui fraudem facit mercenario, fratres sunt.

²⁸Unus ædificans, et unus destruens : quid prodest illis, nisi labor ?

²⁹Unus orans, et unus maledicens : cujus vocem exaudiet Deus ?

³⁰Qui baptizatur a mortuo, et iterum tangit eum, quid proficit lavatio illius ?

³¹Sic homo qui jejunat in peccatis suis, et iterum eadem faciens : quid proficit humiliando se ? orationem illius quis exaudiet ?