Read Biblia Sacra juxta Vulgatam Clementinam Joannis II 1 Bible Online

Joannis II 1 - Biblia Sacra juxta Vulgatam Clementinam bible

Joannis II 1

¹Senior Electæ dominæ, et natis ejus, quos ego diligo in veritate, et non ego solus, sed et omnes qui cognoverunt veritatem,

²propter veritatem, quæ permanet in nobis, et nobiscum erit in æternum.

³Sit vobiscum gratia, misericordia, pax a Deo Patre, et a Christo Jesu Filio Patris in veritate, et caritate.

⁴Gavisus sum valde, quoniam inveni de filiis tuis ambulantes in veritate, sicut mandatum accepimus a Patre.

⁵Et nunc rogo te domina, non tamquam mandatum novum scribens tibi, sed quod habuimus ab initio, ut diligamus alterutrum.

⁶Et hæc est caritas, ut ambulemus secundum mandata ejus. Hoc est enim mandatum, ut quemadmodum audistis ab initio, in eo ambuletis.

⁷Quoniam multi seductores exierunt in mundum, qui non confitentur Jesum Christum venisse in carnem : hic est seductor, et antichristus.

⁸Videte vosmetipsos, ne perdatis quæ operati estis : sed ut mercedem plenam accipiatis.

⁹Omnis qui recedit, et non permanet in doctrina Christi, Deum non habet : qui permanet in doctrina, hic et Patrem et Filium habet.

¹⁰Si quis venit ad vos, et hanc doctrinam non affert, nolite recipere eum in domum, nec Ave ei dixeritis.

¹¹Qui enim dicit illi Ave, communicat operibus ejus malignis.

¹²Plura habens vobis scribere, nolui per cartam et atramentum : spero enim me futurum apud vos, et os ad os loqui : ut gaudium vestrum plenum sit.

¹³Salutant te filii sororis tuæ Electæ.