Read Biete RIPHUTNA 1 Bible Online

RIPHUTNA 1 - Biete bible

RIPHUTNA 1

¹Pathianin a tîra rinêng neh rivân a siamah khan,

²rinêng hi mêl riput dân îte la nei mak a, a korong ringot a nit a; tui inthûk[1] tak chung khom a zîng khap a. Pathian Rithla[2] khan tui chunghei chu a op mai a.

³Pathianin “Ivâr hong om riseh,” a ti a; khanchu, ivâr a hong om tâk a.

⁴Pathianin ivâr khah a en a, ṭha a ti ok a; khanchu, ivâr neh izîng kha a ṭhen tâk a.

⁵Pathianin ivâr kha sûn a be a, izîng kha zân a be a. Khanchu, kholoi tiang a om a, zîng tiang khom a om a; amakhah a sûn khat nî chu a nit.

⁶Pathianin, “Tui neh tui â ṭhen rangin boiruak rizat tak om riseh,” a ti a.

⁷Khanchu, Pathianin boiruak[3] rizat tak chu a siam a, boiruak rizat tak nuaia tui iomhei neh boiruak rizat tak chunga tui iomhei khah a ṭhen tâk a. Khanchu, khangkah khan a hong nit tâk a.

⁸Pathianin boiruak rizat tak khah “Rivân” a be a. Khanchu, kholoi tiang a om a, zîng tiang khom a om a; amakhah a sûn nik nî chu a nit.

⁹Pathianin, “Rivân nuaia tuihei mun khatkatah richin zit sela, imuang chu ilang riseh,” a ti a. Khanchu, khangkah khan a hong nit tâk a.

¹⁰Pathianin imuang khah “Rinêng” a be a; tui richinhei kha Tuikhanglian a be a. Pathianin amakhah a en a, ṭha a ti ok a.

¹¹Pathian khan, “Rinêngin chimu rimal ineia râ ngai chi tinrênghei, thei â râ sunga a chi om ngai tinrênghei[4] khah isua riseh,” a ti a. Khanchu, khangkah khan a hong nit tâk a.

¹²Khanchu, rinênga rithokin chimu an chi om rang dân angkana rimal ineia â râ ngai chi tinrênghei, thei â râ sunga a chi om ngai dang danghei kha a hong ṭoi tâk a; Pathianin a en a, ṭha a ti ok a.

¹³Khanchu, kholoi tiang a om a, zîng tiang khom a om a; amakhah a sûn thumnî chu a nit.

¹⁴Pathianin, “Sûn neh zân ṭhenna rangin rivân rizat takah khin ivârhei om sela, khahei khah hunbihei, sûnhei neh kumhei richik theina rang ni sela,

¹⁵khahei khah rinêng elinvâr rangin rivân rizatah khin om riseh,” a ti a. Khanchu, khangkah khan a hong nit tâk a.

¹⁶Pathianin ivâr ilian ual inikah neh ârsihei a siam a; inî a vâr irât ual khah sûna vâr rangin a ti a, ithla a vâr idôk ual khah zâna vâr rangin a ti a.

¹⁷Pathianin khahei khah rinêng chung elinvâr rang neh,

¹⁸izîng neh ivâr iṭhen a, sûna vâr rang neh zâna vâr rangin rivân rizat tak a khin a sia tâk a. Pathianin a en a ṭha a ti ok a.

¹⁹Khanchu, kholoi tiang a om a, zîng tiang khom a om a; amakhah a sûn li nî chu a nit.

²⁰Pathianin, “Tuihei kha ringna nei chi tinrênghein sip sela, ivahei khom vânlâizôl rizat tak rinêng chungah khin vuang sup sup riseh,” a ti a.

²¹Khanchu, Pathianin tuikhangliana sarâng inrît tak tak hei, tui sunga mîring chi tinrênghei neh chunga vuang iva chi tinrênghei a siam tâk a; Pathianin khahei khah a en a, ṭha a ti ok a.

²²Pathianin ṭhat a vur a, “Chi tam takka neiin hong pung rei, tuikhanglian sip zit unla, ivahei khom rinêngah hong pung riseh,” a ti a.

²³Khanchu, kholoi tiang a om a, zîng tiang khom a om a; amakhah a sûn ringa nî chu a nit.

²⁴Pathianin, “Rinêng khan mîring chi tinrêng an om rang dân angka chitin ramsahei, insungsahei, sa lianhei, sa chînhei, an chi om rang dân angka chitin isua riseh,” a ti a. Khanchu, khangkah khan a hong nit tâk a.

²⁵Pathianin ramsahei, insungsahei neh rinênga bokrivâka lôn murdihei, mîring tinrêng an chi om rang dân angka takin a siam a; Pathianin khahei khah a en a, ṭha a ti ok a.

²⁶Pathianin, “Ei ri-angpuiin, eimani ang zekkan miriam[5] siam ei la, ani khah tuikhangliana ingahei, chunga vuang ivahei, insungsahei, ramsahei neh mîring rinênga bokrivâka lôn murdi chungah thu innei ei ti u,” a ti a.

²⁷Khanchu, Pathianin ama ri-angpuiin miriam, ipa neh nupang a siam a; Pathianin ama ang zekkan ai siam a nit.

²⁸Pathianin anni kha ṭhat a vur a; an ziangah, “Chi tam takka neia hong ipungin, rinêng chung hih luan sip unla, nin thunuaiah in-om rei; tuikhangliana ingahei, chunga vuang ivahei, rinêng chunga mîring murdi chungah thuneina nangni kî pêk a nit,” a ti a.

²⁹Pathian ngirin, “Ringai rei, rinêng chunga chimu tinrênghei neh thei chi tinrênghei chu bua nin rin rangin nangni kî pêk a nit.

³⁰Rinênga sa murdihei, chunga vuang iva murdihei neh nuaia bokrivâka lôn, ringna nei tinrênghei fâk rangin loisûl murdi kî pêk a nit,” a ti a. Khanchu, khangkah khan a hong nit tâk a.

³¹Pathianin a thil siam murdi chu a en a, ṭha a ti ok a. Khanchu, kholoi tiang a om a, zîng tiang khom a om a; amakhah a sûn ruk nî chu a nit,