Read Biete RIPHUTNA 11 Bible Online

RIPHUTNA 11 - Biete bible

RIPHUTNA 11

¹A tîrah khan chu rinênga mi murdi khah ṭong khatkah bang an mang a, kha ṭong khah munkan an imang a nit.

²Khosak tiang an rithon thiai lâiah khan Babilon rama phâizôl[20] an hong tlung a, amakhan om mun an khuar tâk a.

³An rêngkan “Tho rei, rolung siam ei ta, iṭha takkan lei hâlinkhir rei,” an riti risak a. Khanchu, lung rithûlin rolung an mang a, ipil rinât an inriman a.

⁴“Tho rei, khopui siam ei ta, in risâng tak a sîpin rivân isun rangin sin ei ta; khanchu, ei riming inthangin siam ei ta, rinêng chung murdiah rithek indarin om no min e,” an ti a.

⁵PUMAPA khah Manmasi naihei khopui siam neh an in risâng sin kha ien rangin a zuang ṭum a.

⁶Khanchu, ani khan, “Ringai ta u, mihei hih pumkah an nit a, an rêngkan ṭong khatkan an ṭong a; khasikin, hi thil hih isin an iphut a nit hih; sôt ino ten an inuam nuam an itho thei rang a nit hite!

⁷Tho zu fêng ei ta, ṭong an ririat risak thei nona rangin an ṭong la zûn danglam pêk chit rei,” a ti a.

⁸Khanungchu, PUMAPA khan annihei khah khantaka rithoka khan rinêng chung murdiah â thek indar a; khanchu, an kho siam khom khah an bâng tâk a.

⁹Khasikin, kha khopui riming khah Babel[21] iti a nit tâk a; PUMAPA khan kha munah khan rinênga mi murdi ṭong khah ân danglam chit tâk sikin Babel an iti a nit; khantaka rithoka khan PUMAPA khan annihei chu rinêng chung murdiah khan â ṭhêi indar tâk a.

¹⁰Hihei hih Sema richihei chu an nit: Sema khah kum rizaka mi a nit a, tui lian nung kum inika tenah khan naipa Arpaksada a nei a;

¹¹Arpaksada a nei nungah khan Sema khah kum rizarngakah a la dam a, nainu neh naipa danghei a la nei a.

¹²Arpaksada khan kum sômithumka ringakah a nitin naipa Sela a nei a;

¹³Sela a nei nungah khan Arpaksada khah kum rizalikah ithumkah a la dam a, nainu neh naipa danghei a la nei a.

¹⁴Sela khan kum sômithumkah a nitin naipa Ebera a nei a;

¹⁵Ebera a nei nungah khan Sela khah kum rizalikah ithumkah a la dam a, nainu neh naipa danghei a la nei a.

¹⁶Ebera khan kum sômithumka ilikah a nitin naipa Pelega a nei a;

¹⁷Pelega a nei nungah khan Ebera khah kum rizalikah sômithumkah a la dam a, nainu neh naipa danghei a la nei a.

¹⁸Pelega khan kum sômithumkah a nitin naipa Reua a nei a;

¹⁹Reua a nei nungah khan Pelega khah kum rizanikah ikuakkah a la dam a, nainu neh naipa danghei a la nei a.

²⁰Reua khan kum sômithumkah inikah a nitin naipa Seruga a nei a;

²¹Seruga a nei nungah khan Reua khah kum rizanikah sarikah a la dam a, nainu neh naipa danghei a la nei a.

²²Seruga khan kum sômithumkah a nitin naipa Nahora a nei a;

²³Nahora a nei nungah khan Seruga khah kum rizanikah a la dam a, nainu neh naipa danghei a la nei a.

²⁴Nahora khan kum sôminika ikuakkah a nitin naipa Tera a nei a;

²⁵Tera a nei nungah khan Nahora khah kum rizalei sômleiikuakkah a la dam a, nainu neh naipa danghei a la nei a.

²⁶Tera khan kum sômsarikah a nitin naipa Abrama, Nahora, Harana hei a nei a.

²⁷Hihei hih Tera richihei chu an nit: Tera khan naiipa Abrama, Nahora, Harana hei a nei a. Harana khan naipa Lota a nei a.

²⁸Harana chu a suakna khua Babilon rama Ur khuaah khan a pa Tera la dam lâi ngêiah khan a thi tâk a.

²⁹Abrama neh Nahora khan nupui an nei a; Abrama nupui chu Saraii a nit a; Nahora nupui chu Harana nainu Milkaii a nit a, Harana khan nai nupang dang Iskaii a nei sa a.

³⁰Saraii khah â ching a nit a, nai nei mak a.

³¹Tera khan a naipa Abrama, a tupa Lota, Harana naipa neh â moinu, Abrama nupui Saraii hei khah a ṭhui a; Kanan rama fe rangin Babilon ram a Ur khua khah an mâk a. Haran khua an dênin chu amakhan om mun an khuar tâk a.

³²Tera khah kum rizanikah ringakah a nit tenan chu Haran khuah khan a thi tâk a.