Read Biete RIPHUTNA 12 Bible Online

RIPHUTNA 12 - Biete bible

RIPHUTNA 12

¹PUMAPA khan Abrama ziangah khan, “Ni omna ram neh ni suapuihei neh ni pa in ata suak inla, ram nang ki la în-en rang tiang fe roh.

²Richi suanpâr itam takah nang pêng ki ta, anni khah nam roinpui tak la hong nîng an ti. Ṭhat nang vur ki ta, ner ming inthang takkan siam ki ta; khanchu, nangmah ṭhatvurna[22] hong ni roh.

³“Ṭhat nang ivurhei kangân chu ṭhat vur ki ta; Vâni nang isâmhei chu vâni sâm ki ti. Nangmaah khan rinênga nam tin, Ṭhativurin[23] la om an ti,” a ti a.

⁴PUMAPA thupêk lam angkan Haran ata a suak a; Lota khom a ziangah a fe sa a. Haran ata a suakah khan Abrama khah kum sômsarika ringakah a nit.

⁵Abrama khan a nupui Saraii neh a unaipa nai Lota kha a ṭhui a, Haran khuaa an om lâia richon ai nei murdi ichôiin, â som murdihei neh khan Kanan rama fe rangin an rithok tâk a. Kanan ram khah a tlung tâk a;

⁶Kha ramah khan Abrama chu a fe mai a Sekem muna Morea saso kung[24] omna mun a tlung tâk a. Kha lâiah khan Kanan mihei khah kha ramah khan an lai om mai a nit.

⁷PUMAPA khah Abrama ziangah ân lâr a, “Hi ram hih a nit ner chihei ki pêk rang ram chu,” a ti a. Khanungchu, Abrama khan kha munah khan a zianga inlâr PUMAPA rang mâichâm a siam tâk a.

⁸Kha rizoiin chu khantak ata kha sim tiang, Bethel sak tianga tlângramah khan arthon a, amakhan ripuk a siam a; tlâk tianga khan Bethel khah a om a, sua tianga khan Ai khua khah a om a. Kha mun khomah khan Abraman mâichâm a siam nôk a, PUMAPA chu chubai a ûn a.

⁹Abrama khah Kanan sim ram[25] tiang ipanin arthon thiai mai a.

¹⁰Kanan ramah khan iṭâm a hong tlâk a; kha rama ṭâm khah a natinsat ok sikin Abrama khah Aigupta ramah itôitekah zu om rangin a fe tâk a.

¹¹Aigupta ram a lût rang to takin chu a nupui Saraii ziangah khan, “Nupang mêliṭha tak ni nit a;

¹²Aigupta mihein nang an mu tikin chu, ‘Amah hih a nupui a nit hih,’ tîng an ta; keimah chu ne that an ta, nangmah chu nang zua an ta;

¹³khasikin, nangma zâra ki ringna an ne zua theina rang neh ihoi takka an nen om theina rangin, ringaiihoi takkan, ‘A farnu ki nit,’ ti pêk ngai roh,” a ti a.

¹⁴Abrama khah Aigupta ram a lûtah khan, Aigupta mi ṭhenkahei khan a nupui khah an mu a, a mêl khah a ṭhat an ti tak tak a.

¹⁵Faroa milianhei khomin an mu a, a mêl ṭhatzia khah rêng an isîr pêk a; khanchu, Faroa inah an ṭhui lût tâk a.

¹⁶Rêng khan Saraii sikin Abrama khah iṭha takkan a don a; khanchu, berahei, kêlhei, sialhei, sakuartunghei, isomhei, saringseihei a pêk a.

¹⁷PUMAPA khan Abrama nupui Saraii sikin Faroa neh a rêng ina omhei murdi chungah khan rî ṭhano tak iṭhumin deng ân thei tâk a.

¹⁸Khanungchu, Faroa khan Abrama khah a koi a, “Ki chunga ni thil tho hih îtho sik im ai nit tâk? Ni nupui a nit iti ithôm ni ne ril no?

¹⁹‘Ki farnu a nit’ îtho sik im nî ti; khasika khan kêng nupuiin ki lei iṭhui tâk? Ni nupui hih ṭhui inla, suak roh,” a ti a.

²⁰Faroa khan a mihei khah thu a pêk a, Abrama kha an ṭhui a, a nupui neh a thil nei murdi neh an ram putiang an hang thak tâk a.