Read Biete RIPHUTNA 13 Bible Online

RIPHUTNA 13 - Biete bible

RIPHUTNA 13

¹Abrama khah Aigupta rama rithoka khan a suak a, a nupui neh ai nei murdi neh khan Kanan sim ramah khan a fe tâk a, Lota khom a fe sa a.

²Abrama khan berahei, sialhei, kêlhei, sumhei, rângkachakhei a nei tam tak tak a.

³Sim rama rithoka khan Bethel khua dênin a fe thiai mai a. Bethel neh Ai khua kâra matona om mun a lei khuarna,

⁴mâichâm a lei indingna mun ngêi khah a tlung tâk a. Khanchu, kha munah khan Abrama khan PUMAPA chubai a ûn tâk a.

⁵Lota khom khan berahei, kêlhei, sialhei a nei intam a; khabanah, insungkuahei neh isomhei khom a nei a.

⁶An ruaika munka om rangin ramin dai khâi mak a: an ran nei khah a tam tak tak sikin munkan om thei khâi mak a.

⁷Abrama ran enkoltuhei neh Lota ran enkoltuhei kârah khan ringo rikhalnahei a hong suak tâk a. Kha lâiah khan Kanan mihei neh Periz mihei khah, kha ramah khan an la om a.

⁸Khanchu, Abrama khan Lota ziangah, “Parfâkah ei nit a, nangmah neh keima kârah hoinona omno riseh, nê somhei neh ke somhei kârah khom ringo rikhalna om no riseh.

⁹Ram rizat tak a om a; khasikin, tho inṭhen ei ta, ni nuamna tiang tak ram khah rithlang inla, nangmah voitiang pangah ni fen chu keimah changtiang pangah fêng ki ta; a nit, nangmah changtiang pangah ni fen chu keimah voitiang pangah fêng ki ti,” a ti a.

¹⁰Khanchu, Lota khan a thlîr vêl a, Jordan Phâizôl murdi kha Zoar idênin PUMAPA rikul angka dôr, Aigupta ram angkana ram iṭha, tui tamna ram a nit iti a mu a.PUMAPA khan Sodom neh Gomora khua â siat ma khah a nit.

¹¹Khanchu, Lota khan Jordan Phâizôl murdi khah ama omna rangin arthlang a; sua tiangah khan arthon tâk a. Khangkah khan kha mi pasal inikahei khah an înṭhen a nit.

¹²Abrama chu Kanan ramah khan a om a; Lota chu phâizôl khopui lâia Sodom khua kôla khan mun a khuar tâk a.

¹³Sodom mihei khah PUMAPA mitmun natinsat taka sia neh insual an nit a.

¹⁴Lota a om inran nungah khan PUMAPA khan Abrama ziangah, “Thlîr inla, ni omna rithoka khan mâr tiang hei, sim tiang hei, sak tiang hei, thlang tiang hei en roh;

¹⁵ni ram mu phâk murdi hih nangmah neh ner chihein kumkhuaka nin dong rangin nang kî pêk rang a nit.

¹⁶Ner chihei chu rinênga ṭiai dôra tamin siam ki ta, iṭiai tep zoi zât ino ai nit angkan ner chihei khom tep zoi zât loi nîng an ti.

¹⁷Thoi inla, ram hih a dung a khang rifang suak inla, en roh; an rêngkan nang kî pêk rang a nit,” a ti a.

¹⁸Khanchu, Abrama khan a puan in khah a thon a, Hebrona om Mamre[26] saso kung kôlah khan om mun a va khuar tâk a, kha munah khan PUMAPA rang mâichâm a siam tâk a.