Read Biete RIPHUTNA 14 Bible Online

RIPHUTNA 14 - Biete bible

RIPHUTNA 14

¹Rêng ilîkahei: Sinar khua rêng Amrafela hei, Elasar khua rêng Arioka hei, Elam khua rêng Kedorlaomera hei, Goim khua rêng Tidala hei khan,

²rêng ringaka dang Sodom khua rêng Bera hei, Gomora khua rêng Birsa hei, Adma khua rêng Sinaba hei, Zeboim khua rêng Semebera hei, Bela khua rêng hei khah an hong rûn a. Bela khua chu Zoar a nit.

³Hi rêng ringakahei hih rizomna an siam a, Sidim phâiruam, atûna Tuipui Ithi an iti a khan munkan an ṭang rilom a.

⁴Annihei khah kum sômlei kum inika sung Kedorlaomera thu nuaiah an om a, a kum sômleiithumna a khan chu an irhel tâk a nit.

⁵Khanchu, a kum sômleiilina kumah khan Kedorlaomera neh a thun rualpui rênghei khah an sipaihei neh khan an hong a, Asterot-Karnaim khuaa Refaim mihei, Ham khuaa Zuzim mihei, Kiriathaim phâia Enim mihei,

⁶Edom tlânga Hor mihei khah El-paran idênin an ûm rizûl a, an rêngkan an rûn inê vang a. El-paran chu ramchâr idepa om a nit.

⁷Khanungchu, an kîr nôk tiangah khan Kades an iti tâk En-mispat tiang an rikual a, Amalekhei ram murdi neh Hazazon Tamara om Amorhei murdi an rûn infâi riai a.

⁸Khasika khan Sodom khua rêng hei, Gomora khua rêng hei, Adma khua rêng hei, Zeboim khua rêng hei, Bela khua rêng hei khan Sidim phâiruama ridoi rangin an sipaihei an bûm a,

⁹Khanchu, rêng ilika hei, Elam khua rêng hei, Goim khua rêng hei, Sinar khua rêng hei, Elasar khua rêng hei khah an doi tâk a. Rêng ringakan rêng ilîkah an idoi a nit.

¹⁰Sidim phâiruam khah alkatara khura sip a nit a; Sodom neh Gomora khua rênghei khah lâizâm an tho a, khurah khan an tlâk a; rêng dang ithumkahei kha chu itlângheia lâizâm an tho tâk a.

¹¹Khanchu, rêng ilîkahei khan Sodom neh Gomora mihei thil nei murdi neh an bu bâl murdi an lâk vang a, an rot tâk a.

¹²Abrama naipa Lota, Sodom khuaa om khom khah, a neinun murdi an lâk pêk banah amah khom an ṭhui sa a.

¹³Nikhomsela, mi khatkah ridoina ata lâizâm itho khan Hebrai mi Abrama khah thil tinrêng â ril a; kha lâiah khan Abrama chu Mamrea saso kung kôlah a om a. Amor mi Mamrea chu a unaihei Eskola neh Anera neh an inthumkan Abrama risanpuihei an nit a.

¹⁴Abraman a unaipa nai Lota khah suakin an ṭhui iti a riatin chu a ina om, risual ithiam mi rizalei sômleiiriatkah a ṭhui suak a, Dan khua dênin rêng ilîkahei khah an rizûl tâk a.

¹⁵Kha munah khan amah neh a mihei khah a lôm lômin an inṭhen dar a, an irâlhei khah zânah an rûn a, an that tâk a. Khanchu, Damaska khua mâr tianga om Hoba khua dênin an ûm rizûl a.

¹⁶Neinun an lei ilâk tâk murdihei khah an lâk kîr nôk riai a. A unaipa nai Lota neh a neinunhei khom an hong lâk kîr nôk a, nupanghei neh suak an iṭhuihei murdi khom an hong ṭhui kîr nôk riai a.

¹⁷Abrama khah Kedorlaomera neh a thunrualpui rêng danghei inê zoia a hong kîr nôkah khan Sodom rêng khan Save phâiah khan a lei don a; Save phâi khah Rêng Phâi khom an ti ngai.

¹⁸Salem rêng Melkisedeka[27] khomin ibai neh uain ichôiin Abrama khah a lei don sa a; ani khah Pathian Chungnungtaka thiampu a nit a.

¹⁹Ani khan Abrama kha ṭhat a lei vur a, “Rinêng neh rivân isiamtu Pathian Chungnungtaka khan Abrama hi ṭhat vur riseh.

²⁰Ne râlhei chunga nêna nang ipetu, Pathian Chungnungtaka chu inpâkin om riseh,” a ti a. Abrama khan Melkisedeka chu a râllâk neinun murdia rithokin sômka khatkah a pêk a.

²¹Sodom khua rêng khan Abrama ziangah, “Ki miriamhei hih ne pe kîr inla, neinunhei hi chu nangman dong roh,” a ti a.

²²Nikhomsela, Abrama khan Sodom khua rêng ziangah khan, “Rinêng neh rivân isiamtu PUMAPA Pathian Chungnungtaka[28] ziangah ki irkhâm a nit,

²³‘Pat zâi khatka te khom, pheikok rui khatka te khom, ni ta rêng rêng la no ning e,’ khanonchu, ‘Abrama khah keima înrichong im ki ta,’ ni ti duai lôiin.

²⁴Khasikin, ki mihein an lei ifâk tâk neh an lei imang tâk ti no chu îte la no ning e. Nikhomsela, Anera hei, Eskola hei, Mamrea hei khan chu an dongtum khah la riseh,” a ti a.