Read Biete RIPHUTNA 15 Bible Online

RIPHUTNA 15 - Biete bible

RIPHUTNA 15

¹Kha thilhei rizoiah khan, Abrama khan inlârna a mu a, PUMAPA khan a zuang isôn a, “Abram, ṭi no roh, keimah hi nê pho ki nit hih, loman roinpui tak nang kî pêk rang a nit,” a ti a.

²Nikhomsela, Abrama khan, “O PUMAPA Pathian[29], nai lak nei mang a, ni loman khah ki ta rangin im ṭhatna a om a? Ker chon iluatu rang lak chu Damaska khua mi Eliezera hih a nit a.

³Nai lak ne pe tlak mak che a; en ta, ki ina om ki suak khatkah hih ker chon iluatu rang chu a nit,” a ti a.

⁴Khanchu, PUMAPA thu khah Abrama ziangah a zuang tlung nôk a, “Ringai roh, kha ni suak Eliezera khan ner chon lua no nih, nangma rila râ ni naipa ngêiin ner chon chu ai lua rang a nit,” a ti a.

⁵PUMAPA khan ani khah putiang a ṭhui a, a ziangah “Rivân tiang khi en inla, ârsihei khi ni tep theiin chu tho tep roh. Ner chihei chu khi ârsihei zâkah khi la nîng an ti,” a ti a.

⁶Abrama khan PUMAPA chu a iam a; khasikin, PUMAPA khan a iamna khah a felnaah ai be pêk a nit.

⁷Khanungchu, PUMAPA khan a ziangah, “Hi ram hih ni lua ranga nang ipe rangin Babilon rama Ur khua ata nang iṭhui suaktu PUMAPA chu ki nit,” a ti a.

⁸Nikhomsela, Abrama khan, “O PUMAPA Pathian, ki lua rang a nit iti ingkam ki riat rang?” a ti a.

⁹Ani khan a ziangah, “Serâtchal kum ithumka mi, kêlpui kum ithumka mi neh berachal kum ithumka mi neh vaṭhu neh pharvali tete hong chôi roh,” a ti a.

¹⁰Abraman khahei murdi khah a hong pêk a, artiana takah a khoi chit a, a khoilok khatkah kha a kiangtiang khoilok ridîna khan a sia chit a; ivahei kha chu khoi mak a.

¹¹Sasel ifah ngai ivahei khah saruakheiah khan an zu fûk a; nikhomsela, Abrama khan a lei ûm inrot mai a.

¹²Inî tlâk rang to takin chu Abrama khah a in thlar tâk a; khanchu, ṭina neh rilônthingnan a zuang rikhû tâk a.

¹³Pathian khan Abrama ziangah, “Ner chihei khah riat loi ramah mikhualin om an ta, suakin itâng an ta, kum rizalika sung dengthei intuangin om an ti.

¹⁴Nikhomsela, suaka mang namhei khah deng lân thei ki ta; khanungchu, kha ram ata khah richon itam takkah hong ichôiin la hong suak an ti.

¹⁵Nang khom ne bâ ṭuakin dam ni ta, rithlaringam takkan thîng ni ta, nang phûm an ti.

¹⁶Rikhûk ilîka tenan hi munah hin ner chihei khah hong kîr nôk an ti; Amorhei khah dengthei intuang inrupa an isual mâkah chu ki ûm isua no rang sikin,” a ti a.

¹⁷Inî a zuang tlâk a, zân a zuang zîngin chu, voikazelin meibêl ikhû zûl zûl neh meiser ichok luai luai rilong rilong chu sa khoilokhei kârah khan a zuang om a.

¹⁸Kha zân takah khan PUMAPA khan Abrama ziangah thu a thlung tâk a, “Hi ram hih Aigupta ramrîa rithoka Eufratis vadung idênin ner chihei kî pêk tâk a nit.

¹⁹Kenhei ram, Kenizhei ram, Kadmonhei ram,

²⁰Hithei ram, Perizhei ram, Refaimhei ram,

²¹Amorhei ram, Kananhei ram, Girgashei ram, Jebushei ram khom kî pêk sa a nit,” a ti a.