Read Biete RIPHUTNA 16 Bible Online

RIPHUTNA 16 - Biete bible

RIPHUTNA 16

¹Abrama nupui Saraii khan nai rêng rêng nei pêk mak a. Nikhomsela, Saraii khan Aigupta mi, suaknu khatkah arming Hagari a nei a.

²Saraii khan Abrama ziangah, “PUMAPA lakin nai inei rangin ne phal mak a; khasikin, ringaiihoi takkan ki suaknu hih zâlpui inla, ki rang nai a ne nei pêka rang,” a ti a. Abrama khan Saraii thu khah a zôm tâk a.

³Khanchu, Saraii khan a suaknu Aigupta mi, Hagari khah a ṭhui a, a pasal Abrama ziangah khan a thâikêm rangin a pêk tâk a. Hi thil hih Abrama kha Kanan ramah kum sômkah a om nunga tlung a nit.

⁴Abrama khan Hagari khah a lei zâlpui a; Hagari khan nai a vong tâk a; nai a vong iti a riat kaneh chu a pi khah a musit zel tâk a.

⁵Khanchu, Saraii khan Abrama ziangah, “Hingka taka Hagari hin a ne imusit hih nangma thonsual a nit. Ki suaknu hih keimah ngêiin ni thâikêm rangin nang kî pêk a nit kha; nikhomsela, nai a vong iti a riat kaneh chu a ne imusit tâk a nit. PUMAPA khan nangmah neh keima kâr thu hih tûm â dik ei init ngaitua riseh,” a ti a.

⁶Abrama khan Saraii kha a sâm a, “A ṭhat, ni suaknu a nit a, ni thu nuaia om a nit, ni nuam lam angka takin a chungah tho roh,” a ti a. Khanungchu, Saraii khan Hagari khah deng ân thei tâk a, khasika khan Hagari khah ai rot tâk a nit.

⁷PUMAPA Vântirtôn khan Hagari khah ramchârah Sur panna lampui tuikuang kôlah khan artongpui a.

⁸A ziangah, “Hagar, Saraii suaknu, taka rithoka nî hong im? Taktiang ipan rang tâk chêm?” a ti a. Ani khan “Ki pi Saraii ziang ata kî rot a nit,” a ti a.

⁹PUMAPA Vântirtôn khan a ziangah, “Ni pi ziangah kîr nôk inla, a thu thun va om roh,” a ti a.

¹⁰PUMAPA Vântirtôn ngir khan a ziangah, “Ner chihei khah tep zoi loi rakka tamin lân pung ki ti.

¹¹Ringai roh, nai ni vong tâk a, naipa nei ni ta; PUMAPA khan ni dengthei tuang khêk irî a lei riat tâk sikin ni naipa riming kha Ismaela[30] ni sak rang a nit.

¹²Nikhomsela, ni naipa khah ram sakuartung angka nîng a ta; mi tu khom doi a ta, ani khom khah mi tinin doi an ti. Ani chu a suapuihei lâi ata a ranin om a ti,” a ti a.

¹³Hagari khan a lungrilin, “Pathian ki mu ti tak a, ki mu nung khomin ki thuhei hih la sîr rangin ki lai ring mai a nit hi te,” a ti a. Khanchu, ama risônpuitu PUMAPA riming khah “El-roi,” [31] a be a. “Ne mutu Pathian chu kî mu tâk a nit hi,” a ti a.

¹⁴Khasika khan, kha tuikuang khah “Beer-lahai-roi”[32] ibe a nit tâk a, Kades neh Bered khua kâra om a nit.

¹⁵Hagari khan Abrama khah naiipa a nei pêk a; khanchu, Abrama khan a naipa riming khah “Ismaela” a sak tâk a.

¹⁶Abrama khah Hagarin Ismaela a nei pêk lâiah khan kum sômiriatkah kum irukkah mi a nit.