Read Biete RIPHUTNA 17 Bible Online

RIPHUTNA 17 - Biete bible

RIPHUTNA 17

¹Abrama khah kum sômikuakka ikuakkah mi a nit tenah khan, PUMAPA kha a ziangah a zuang inlâr a, “El-Sadaia[33] ki nit hih, ki thu zôm inla, ṭhat rikipin om roh.

²Khanchu, nangmah neh ei kârah thu thlung ki ta, richi suanpâr itam takka nang pêng ki ti,” a ti a.

³Abrama khah lingisikin rinêngah â bok a; Pathianin a ni khah â sôn a,

⁴“Ringai roh, hi thuthlung hih nangmah neh kî thlung a nit; Nang chu nam tin chi tinhei bulpui ni hong init rang tâk a nit iti ki înkung a nit.

⁵Ner ming khom Abrama ni khâi no nih, nam tin chi tinhei richibulin nang ki siam sikin Abrahama[34] nî nit tâk a nit.

⁶Richi suanpâr itam takkah nang pêng ki ta, anni lâia a ṭhenhei chu rêng la hong chang an ti. A nit, nangma richi suanpârhei chu namin la hong iding an ti.

⁷“Ki thuthlung hih nangmah neh ne nunga ner chi suanpâr la om ranghei idênin kumkhuaka thuthlung rangin indet mai ki ti. Nangma Pathian neh ner chi suanpârhei Pathian kî nit mai rang a nit.

⁸Ni ziangah neh ne nunga ner chi suanpârhei ziangah khan ni mikhualna ram, Kanan ram hih kumkhuaka nin lua rangin nangni kî pêk a nit; keimah hih an Pathian nîng ki ti,” a ti a.

⁹Pathian khan Abrahama ziangah thu â sîr mai a, “Nangmah khomin ki thuthlung hih ni vong inṭhat rang a nit; ne nunga ner chi suanpârhei murdi khomin an zôm mai rang a nit.

¹⁰Amahih nangmah neh ner chi suanpârhei kâra ki thuthlung nin zôm rang chu a nit: nin lâia ipa kangân chu ser nin tan rang a nit.

¹¹Atûna rithokin naite ipa murdi chu sûn iriatkah a nitin â ser nin tan rang a nit; khapenah, nangmani richi kher nino suak nin ina inzirhei neh nin chipui nino suma nin irchôkhei khom ipa kangân chu an iser nin tan rang a nit. Kha ser nin itan khah nangmani neh keima kâra thuthlung risinsiana nîng a ti.

¹³Tu khatkah khom ipa rêng rêng chu ser itan ngêt rang a nit. Nin taksaah khan ki thuthlung risinsiana khah kumkhuakan a om rang a nit.

¹⁴Ipa tukhom, sertan ino chu, ani khan ki thuthlung a îsiat a nit sikin a suapuihei lâi ata ṭhângsena vôr[35] rang a nit,” a ti a.

¹⁵Pathian ngirin Abrahama ziangah, “Ni nupui khom Saraii itin koi khâi no tin e; atûna rithokin chu arming kha Sari[36] a nit tâk.

¹⁶Ani chu ṭhatvur ki ta, nai ipa nang nei pêk a ti. Ṭhatvur ki ta, nam tin tin nu hong ni tâng a ti; ama richiheia rithokin rênghei la hong suak an ti,” a ti a.

¹⁷Khanchu, Abrahama khah nuaiah â bok a, â nui â zat a, a lungrilin, “Kum riza mi hin nai la nei ki ta, kum sômikuakka mi Sari khan nai a lai vong rang na?” a ti a.

¹⁸Abrahama khan Pathian ziangah, “Ismaela hih ker chon luatu ni zel thei no nîm a?” a ti a.

¹⁹Nikhomsela, Pathian khan a sâm a, “Ni thei no nih. Ni nupui Sari ngêi khan naipa nang nei pêk a ta; arming Isaka[37] nî sak rang a nit. Ki thuthlung hih kumkho thuthlung rangin amah neh â nunga archi suanpârhei ziangah khan kumkhuakan ki îndet rang a nit.

²⁰Ismaela chungchânga ni ngênna khom ki riat tâk; khasikin, ani khom ṭhatvur ki ta, nai itam takka pen, richi suanpâr itam takkah pêng ki ti. Ani chu rêng sômleiinikahei pa nîng a ta, archihei chu nam ilian takin la siam ki ti.

²¹Nikhomsela, ki thuthlung chu ni naipa Isaka, Sarin nakum hingka tik taka nang ai nei pêk rang ziangah khan ki îndet rang a nit,” a ti a.

²²Thu â sîr zoiin chu Pathian khan Abrahama kha a mâk tâk a.

²³Abrahama khan a naipa Ismaela neh a suak, a ina inzir neh suma a irchôk murdihei khom, a ina om ipa rêng rêng kha a ṭhui a, Pathianin a zianga a ti pêk lam angkah takin, kha nî zelah khan an sermôr vun khah a tan pêk tâk a.

²⁴Abrahama khah â sermôr vun a tan lâiah khan kum sômikuakka kuakkah mi a nit tâk a,

²⁵a naipa Ismaela kha chu kum sômlei kum ithumka mi a nitin â sermôr vun itan a nit.

²⁶Kha nî ata khah Abrahama neh a naipa Ismaela chu sertan an hong nit tâk a,

²⁷a ina om suak ipa murdihei khom ama rualin sertan an hong init tâk a nit.