Read Biete RIPHUTNA 18 Bible Online

RIPHUTNA 18 - Biete bible

RIPHUTNA 18

¹Mamrea saso thinghei kôla a puan in kotbâiah, sûn inî lum lâi takin Abrahama kha â ṭhung a, a ziangah PUMAPA chu a zuang inlâr a.

²A hang tang a, a hang enin chu a kôl zelah khan mi ithumkah lei iding mai a mu a; a mu kaneh a puan in kotbâi ata khah anmani don rangin â tlân a, lingisikin rinêngah â bok a,

³an ziangah, “Epuhei, ringaiihoi takkan ki inah ringam loiin chu thleng thal no rei; nangni don rangin hin kî om a nit hih.

⁴Tui va lâng ki ta, nin ke risuh unla, thingkung dâilîmah hin ringam dop hi rei.

⁵Nin suak hi nin zuang îthlo a nit a; khasikin, ibai ichînteka lua va lâng ki ta; amakhan ritha thar la nôk hi unla; khanchu, nin fena ranga khan la fe nôk rei,” a ti a. Anni khan, “Kin lôm, ni ti lam angkan va tho roh,” an ti a.

⁶Khanchu, Abrahama khah puan insungah a lût a, Sari ziangah khan, “Rimot takkan ibaidi ṭha tak khah khamlu thumkah lan la, imet inla, ibai thliamin siam vak vak roh,” a ti a.

⁷Abrahama khah sial lôm omnaah khan a va tlân a, Serât tuaite ṭha tak a hong kâi a, â som khatkah ân that a, ani khan a lei suang inmin vak vak a.

⁸Serât sa suang khah dût neh dût thâi kanghei neh khan a hong chôi a, an makungah khalai a va do a. Thingkung dâilîma khalai an rikhîl lâiah khan Abrahama chu annihei ienkolin an kôlah a ngâk ṭian a.

⁹Anni khan, “Ni nupui Sari taktiang im ai om?” an ti a. Ani khan, “Soa puan inah son,” a ti a.

¹⁰Anni lâia khatkah khan, “Atûna rithoka thla kuakka[38] nungah chu ni ziangah zuang nôk ki ta, ni nupui Sari khan naipa nei a ti,” a ti a. Â nunga puan in kotbâi kôla rithoka khan Sari khan a lei ringai ṭian a.

¹¹Abrahama neh Sari khah ûnlian tak, itar tak an nit tâk a, nupang balam ngai pial khom khah Sari chungah khan arngam pial tâk a nit a.

¹²Sari khah â nui â zat a, a lungrilin, “Keimah tar izûr tâk hin ririam lômna ki lai nei rang mani? Ki pasal lak khom itar tak a nit tâk a,” a ti a.

¹³PUMAPA khan Abrahama ziangah, “Ithôm Sari nui â zat a, ‘Keimah tar izûr tâk hin nai ki lai nei rang na,’ ai ti?

¹⁴PUMAPA rangin thil tho thei ino ai om mani? Atûna rithoka thla kuakka nungah zuang nôk ki ta, Sari khan nai ipa nei tâng a ti,” a ti a.

¹⁵Nikhomsela, Sari khan a ṭi sikin riphialna a zong a, “Inui mang e,” a ti a. Ani khan “Ne nui, ne nui ngêt kha te!” a ti a.

¹⁶Kha mihei khah an thoi a, Sodom khua an zuk thlîr theina rang munah khan an fe a; Abrahama khom khah anmani thla rangin an ziangah a fe sa a.

¹⁷PUMAPA khan a lungrilin, “Ki thil tho rang hih Abrahama ziangah hin kî ip rang mani o?

¹⁸Abrahama richihei chu nam roinpui neh inthang tak an la hong init ngêt rang a nit, ama rithoka khan rammuala nam pumpui hi ṭhat la vur ki ti.

¹⁹A naihei neh archihei khan ki lampui an zui theina rang neh idik neh ifel takka sin an tho theina ranga thu a pêk theina rangin ani chu ki lei irthlang tâk a nit a. Khangkan sin an thoa a nitin chu a zianga ki ṭonginkung tinrêng len ki ti,” a ti a.

²⁰Khanchu, PUMAPA khan Abrahama ziangah khan, “Sodom neh Gomora khua sual thu neh an sintho porinche tak thu ke beng a hong tlung tâk a;

²¹atûnah hin zu fêng ki ta, â dik neh â dikno zu en infel ki ti,” a ti a.

²²Khanungchu, mi pasal inikahei khah an rithok a, Sodom khua tiang khah an pan tâk a; nikhomsela, PUMAPA kha chu Abrahama ziangah khan a om mai a.

²³Abrahama khan PUMAPA kha a va nâi a, a ziangah, “Mi sualhei lâia om mi felhei khah ni înrimang sa rang mani?

²⁴Khosungah khan mi fel sômringaka lua la om duai sela, kha mi fel sômringaka omhei sikah khan khua khah zua no tin im a? Khate ni înrimang ngêt rang mani?

²⁵Nangman chu mi felhei khah mi sualhei lâiah that sa tlak no tin e. Khangkan ni thon chu mi felhei khah mi sualhei lâiah inrimang sa an init rang a nit a; khasikin, nangman chu tho tlak no tin e. Rinêng chung pumpuia roirêltu khan ifel takkan thông ni ti,” a ti a.

²⁶PUMAPA khan, “Sodom khosungah khan mi fel sômringaka lua ki mun chu anmani sikah khan khua kha zuang ki ti,” a ti a.

²⁷Abrahama khan, “O Rêngpa, atûnah hin keimah ipil neh meirivâm pai hin ni ziangah ṭong ikhir tak ki ti mai sikin arngai ne thiam roh.

²⁸Mi fel khah sômringakah ni loiin sômilika ringakah bang ni ta sela, ringakan an tluk no sikin kho pumpui kha ni înrimang rang mani?” a ti nôk a. PUMAPA khan, “Mi fel sômilika ringakah khom kha khuaah khan kin mun chu inrimang no ning e,” a ti a.

²⁹Abrahama khan, “Mi fel sômilikah bang khom an om thei a,” a ti nôk mai a. PUMAPA khan, “Sômilikah khom an omin chu inrimang no ning e,” a ti a.

³⁰Abrahama khan, “O Rêngpa, ni ning nen thik no roh, la hang ti nôk ki ti; kha khuaah khan sômithumkah bang om ta sela,” a ti a. Ani khan, “Sômithumkah khom ki mun chu inrimang no ning e,” a ti a.

³¹Abrahama khan, “Arngai ne thiam roh, Rêngpa nang la ngên nôk ki ti, mi sôminikah bang imu ni ta sela,” a ti a. Ani khan, “Sôminikah khom ki mun chu khua khah inrimang no ning e,” a ti a.

³²Abrahama khan, “O Rêngpa, ringaiihoi takkan ni ning nen thik no roh, voikah mâng mâng la hang ṭong nôk ki ti; kha munah khan mi sômkah bang mu ta duai inla?” a ti a. Ani khan, “Sômka sik khomin inrimang no ning e,” a ti a.

³³PUMAPA chu Abrahama neh an risôn zoi kaneh chu a fe tâk a; Abrahama khom a in tiang a kîr nôk tâk a.