Read Biete RIPHUTNA 2 Bible Online

RIPHUTNA 2 - Biete bible

RIPHUTNA 2

¹Khanchu, rinêng neh rivân chu a sunga om murdihei neh khan isiam zoi vang a nit tâk a.

²Pathianin a sûn sarinî a khan chu a thilsiam tinrêng a zoi a, sin itho kha arngam tâk a.

³Pathianin a thilsiam murdi a zoi a, arngam tâk sikin a sûn sarinî chu ṭhat a vur a, a ser tâk a.

⁴Rinêng neh rivân siam dân thurchi chu khangkah khan a nit. PUMAPA Pathianin rinêng neh rivân a siam lâiah khan,

⁵rinêngah khan thingkung loisûl rêng rêng la om mak a, chimu khom la ṭoi mak a; PUMAPA[6] Pathianin rinêng chungah rua a lân sûr no sikin neh loi itho rang miriam khom an la om no sikin a nit.

⁶Nikhomsela rinêng nuaia rithokin tui a hong suak a, amakhan rinêng kha ân rizil a.

⁷PUMAPA Pathianin rinênga ipil khah a lâk a, miriam a siam a, a nârah ringna rithuak khah a mût a; khanchu, miriam kha a hong ring tâk a.

⁸PUMAPA Pathianin sak ram, Edena khan rikul a siam a, amakhan a miriam siam kha ân om tâk a.

⁹Rinênga rithokinPUMAPA Pathianin thing mit ila tak neh â râ ifa thei tinrêng ân ṭoi a. Rikul inlâina takah khan ringna thing neh â sia â ṭha riatna thing khom ân ṭoi sa a.

¹⁰Khante, Edena rithokin rikul ifâ rangin vadung ân luang a; rikul pêntiang chu vadung ilikan a luang indar a.

¹¹Vadung â khatna riming kha Pison a nit a; rângkachak tamna Havila ram pumpui ihuala luang a nit.

¹²Kha ramah khan rângkachak iṭha tak banah riak namhoi neh oniks lungilu khom a om a.

¹³Vadung â nikna riming khah Gihon a nit a; amakhah Kus ram pumpui ihuala luang a nit.

¹⁴Vadung â thumna riming khah Hidekal [7] a nit a; amakhah Asuria ram sua tiang a luang a. Vadung â lina khah Eufratis a nit.

¹⁵PUMAPA Pathian khan miriam khah a ṭhui a, Eden rikulah khan â donsui neh â enkol rangin a sia tâk a.

¹⁶Khanchu, PUMAPA Pathian khan, “Rikula thing tinrêng irâhei hih ni nuam lam takkan ni fâk thei;

¹⁷sia neh ṭha riatna thing irâ hih chu ni fâk rang ni mak e; ni fâkin chu ni fâk nî zelin nî thi ngêt rang a nit,” itin thu a pêk a.

¹⁸PUMAPA Pathian khan, “Miriam ama khât banga om hih ṭha mak e, ama risanpuia arkoppui rang itluk mi siam pêk ki ti,” a ti a.

¹⁹Khanchu, PUMAPA Pathian khan rinênga pilin, ramsa tinrêng neh chunga vuang iva tinrêng khah a siam a; khanungchu, an riming îm a be rang iti riat nan Adama ziangah a ṭhui a. Adaman riming tinrênghei a lei ibe khah an riming a hong nit thal tâk a.

²⁰Khanchu, Adama khan mîring tinrêng, chunga vuang ivahei neh ramsahei tinrêng khah riming a be chit a; nikhomsela, Adama risanpuia arkoppui rang itluk mi chu la omak a.

²¹Khanchu, PUMAPA Pathian khan Adama khah inrimu nik takkan ân in thlar a, a in thlar lâiin a kângru khatkah a lâk a, kha mun khah taksan ân bit nôk a.

²²PUMAPA Pathian khan Adama kângru ai lâka rithoka khan nupang a siam a, Adama ziangah a ṭhui tâk a.

²³Adama khan, “Amahih chu ker angpui, ki ru ata ru nei, ki taksa ata taksa nei chu a nit hiteh. Ipa ata lâk isua a nit sikin ‘Nupang’ itih rang a nit hi,” a ti a.

²⁴Khasikin kêng ipân a nu neh a pa mâng a ta, a nupui rikoppui a ta; khanchu, takpum khatkah ni tâng an ti.

²⁵Adama neh a nupui khah korongboin an om a; nikhomsela, izak ual mak e.