Read Biete RIPHUTNA 20 Bible Online

RIPHUTNA 20 - Biete bible

RIPHUTNA 20

¹Abrahama khah Mamrea rithoka khan Kanan sim ram tiang ipanin arthon thiai a, Kades neh Sur kârah khan om mun a khuar a. Gerar khuaah a om lâiah khan,

²Abrahaman a nupui Sari khah, “Ki farnu a nit,” a ti a. Khanchu, Gerar rêng Abimeleka khan mi a tir a, Sari khah a vân ṭhui a.

³Zânkah chu Abimeleka rimangah khan Pathian khah a zuang inlâr a, a ziangah, “Ringai roh, ni nupang va ṭhui hih mi nupui kêng ai nit; khasikin, nî thi rang a nit,” a ti a.

⁴Nikhomsela, Abimeleka khan a kut môr khomin la tôn mak a; khanchu, a ziangah, “Rêngpa, mi fel khom ni înrimang rang mani?

⁵Abrahama ngêiin ki ziangah, ‘Ki farnu a nit,’ a ti a; khabanah, a nupang khomin, ‘Ki ṭâpa a nit,’ a ti sa a; lungril rithiang tak neh idik tak riput puma amahih kî tho a nit,” a ti a.

⁶Pathianin armangah khan a sâm a, “A nit, amahih lungril iṭha tak riput puma nî tho a nit iti ki riat; khasika khan kei khomin ki chunga thil thonsual ni tho rang khah nang kî khap a nit a, ni kut môr khoma ni tôn rang kî phal ino a nit.

⁷Khasikin, atûnah hin mi nupui khah a pasal ziangah pe kîr nôk roh. Ani khah zânthla a nit a, nang ṭongṭai pêk a ta; khanchu, thi no tin e. Nikhomsela, ni pêk kîr nôk non chu nî thi ngêt rang a nit, ni mihei murdi khom an ithi rang a nit iti reh roh,” a ti a.

⁸Khanchu, a tûk zîng takah Abimeleka khah a thoi a, a milianhei murdi a koi a, thil omdân murdi â sîr pêk a, anni khan an ṭi tak tak a.

⁹Khanungchu, Abimeleka khan Abrahama kha a koi a, a ziangah, “Kin chunga ni sintho hih ingka tliam ai nit tâk? Im ni chungah thil ki thonsual a, keimah neh ki ram chungah thil ṭhano natinsat tak ni hong îthlun tâk hi? Thil tho no rua tak kêng ki chungah nî tho tâk hi?” a ti a.

¹⁰Abimeleka ngir khan Abrahama ziangah, “Îtho sik im ki chungah hingkana thil nî tho tâk hi,” a ti a.

¹¹Abrahama khan, “Hi khuaah hin Pathian ṭina nei mi tute om viat no ni a, ki nupui sika hin ne that duai an ti ki iam sika a nit.

¹²Khapenah, ki farnu khom a nit ngêi a, nu dang ata ki pa nainu a nit a, nupuia kî nei tâk a nit.

¹³Pathianin ki pa in ata ram dangah rithon ranga a ne tir isua lâiah khan, a ziangah, ‘Amahih ni lungkhamna ki chungah nen lang rang chu a nit; ei tlungna mun ikipah, ki ṭâpa a nit, ti mai ngai roh,’ kî ti pêk a nit,” a ti a.

¹⁴Khanungchu, Abimeleka khan Sari khah Abrahama ziangah a pêk kîr nôk tâk a; khabanah berahei, sialhei, isomhei khom a pêk sa a.

¹⁵Abimeleka khan Abrahama ziangah, “En roh, ki ram rizat tak a om, ni nuamna tiang tiang om roh,” a ti a.

¹⁶Sari ziang khomah khan, “En roh, ni ṭapa hih tangka sângkah kî pêk a nit, ni zianga om murdihei maah ni felzia inlangna ranga kî pêk a nit. Mi tin riatah ni irthiang a nit,” a ti a.

¹⁷Abrahama nupui Sari sikah khan PUMAPA khan Abimeleka nupui neh a insung mihei murdi khah nai nei loi rangin a înching a nit. Khanchu, Abrahama khan Abimeleka rangin Pathian ziangah a ṭongṭai pêk a, Pathianin Abimeleka chu, a nupui neh â somnuhei neh ân dam nôk a, naihei an nei nôk thei tâk a.