Read Biete RIPHUTNA 23 Bible Online

RIPHUTNA 23 - Biete bible

RIPHUTNA 23

¹Sari khah kum riza lei sôminika sarikah a dam a; amakhah Sari damsung kum chu a nit.

²Sari khah Kanan rama Kiriat-Arba khua, atûna Hebron an iti tâk khua a khan a thi a. Abrahama khan Sari khah a sûnin a ṭâ tak tak a.

³A nupui ruak zâlna ata khah a thoi a, Hit mihei ziangah a fe a, a va sôn a,

⁴“Nin lâiah khualmi neh milêng pai ki la nit a; nin ramah hin ki nupui ruak ki phûmna rang mun nen richoh rei,” a ti a.

⁵Hit mihei khan Abrahama khah an sâm a, a ziangah,

⁶“Epu, kin thu hi ringai roh, nang chu kin lâiah hin ruaitu lian taka nang kin ien ni nit a; kin ithlân neiheiah hin ni nuamna takah khan ni nupui chu phûm roh; ni nupui ruak phûmna rangin kin lâiah tukhomin thlân mun nang ipe thloi tlak no ning ung e,” an ti a.

⁷Khanchu, Abrahama khah a thoi a, kha ram mi ngêi Hit mihei makungah khan â khûn a,

⁸an ziangah, “Hi munah hin ki nupui iphûm ṭha nin ne tipui a nitin chu ringaiihoi takkan Zohara naipa Efrona ram,

⁹a loi zôla om Makpela pûk khah ne pe rangin ne ngênpui rei. Phûmna mun ki nei theina rangin a man khom â tlukin nin makungah nen richoh riseh,” a ti a.

¹⁰Efrona khah Hit mihei lâiah, khopui kul kotsua ribûmna munah khan â ṭhung sa ṭian a. Khanchu, Hit mi Efrona khan mi tin tin riatah khan,

¹¹“Ni mak e, Epu, ki ṭong hi ringai roh; loi khah a pumin a sunga ipûk iom khom nang kî pêk a nit; ki chipuihei mitmu ngêiah hin nang kî pêk a nit; ni nupui chu phûm roh,” itin Abrahama chu a sâm a.

¹²Nikhomsela, Abrahama chu Hit mihei makungah â khûn a,

¹³mipui riatah khan Efrona ziangah, “Ringaiihoi takkan ki thu ner ngai pêk rangin nang kî ngên a nit; loi man chu nang lei pe rong, ki ziang ata hih lan la, khanungah khan ki nupui chu amakhan la phûm rong,” a ti a.

¹⁴Efrona khan Abrahama khah a sâm a,

¹⁵“Epu, loi mun tangka sekel[47] rizalika man khah, nangmah neh keima rangin tep inrup im a nit a? Ni nupui chu phûm roh,” a ti a.

¹⁶Khanchu, Abrahama khan Hit mipuihei riatah Efronan tangka ai ti zâk, tangka sekel rizalikah, rivaimihein varna an imang ngai kha mangin a var a, Efrona kha a pêk tâk a.

¹⁷Khangkah khan Makpelaa om Efrona ram, Mamre sak tianga ipûk omna ram kha a loi neh a ramrî sunga thing iom murdi neh khan Abrahama khan ai nei tâk a nit.

¹⁸Khua kulkotsua ribûmna muna om Hit mihei murdihei mitmuah khan Abrahama ta a nit tâk iti indetin a om tâk a.

¹⁹Kha rizoiin chu Abrahama khan a nupui Sari khah Makpelaa ipûkah khan a phûm tâk a. Kha mun khah Hebron an iti tâk Mamre kôl, Kanan rama om a nit.

²⁰Kha ram khah a sunga ipûk neh khan Hit mihei kuta rithokin thlânmun rangin Abrahama khan a hong idong thal tâk a nit.