Read Biete RIPHUTNA 24 Bible Online

RIPHUTNA 24 - Biete bible

RIPHUTNA 24

¹Abrahama khah a hong ûnlian a, a hong tar ok tâk a; PUMAPA khan ani khah lam tinrêngah ṭhat a vur a.

²Abrahama khan â som ulian tak, a thil nei murdi enkoltu ziangah khan, “Ringai ihoi takkan ni kut khah ki malpui kârah hin sian la, PUMAPA rinêng neh rivân Pathian riming ichingin ṭong nang ki înrikhâm rang a nit.

³Ki omna ram, Kanan nungâkhei lâia mi hih, ki naipa Isaka nupuiin nen nei rang ni mak e.

⁴Ki suakna ramah fêng ni ta, ki suapuihei lâia rithokin ki naipa Isaka nupui rang chu ni va ṭhui rang a nit,” a ti a.

⁵Nikhomsela â som khan a ziangah, “Nupang khan hi ramah hin ne hong zui nuamno duai ta sela, ni naipa hih ni hong rithokna ram tiangah khan kî ṭhui kîr nôk rang im ai nit?” a ti a.

⁶Abrahama khan a ziangah, “Ki naipa hih kha ramah khan ni ṭhui kîr nôk rang ni tlak mak.

⁷PUMAPA rivân Pathian, ki pa in ata neh ki suakna ram ata ne ṭhui suaktu neh ne sôntu neh, ‘Hi ram hih ner chihei la pêng ki ti,’ iti a, ki zianga ṭongrikhâmtu khan, amah ngêiin a vântirtôn khah ni maah tir a ta, kha muna rithoka khan ki naipa nupui rang chu ni hong iṭhui thei rang a nit.

⁸Nikhomsela, nupang khan nang a zui nuam non chu ki zianga ni ṭong rikhâm chungchângah chu ni lulîm nî zôk rang a nit. Îkhom ni sela, ki naipa hih kha munah khan ni ṭhui kîr nôk tlak rang ni mak e,” a ti a.

⁹Khanchu, isom khan a kut khah a pu Abrahama malpui kârah a sia a, Abrahama he be lam takka tho rangin ṭong arkhâm tâk a.

¹⁰Isom khan a pu saringsei sômkah a ṭhui a, lômna thilpêk rang chi tinrêng ichôiin a suak a, Mesopotamia rama Nahora omna khuaah khan a fe tâk a.

¹¹A tlungah khan kholoi tianga, nupanghei tui ichôi ranga an suak ngai zoro lâi tak a nit tâk a, khopui dâikunga tuikuang kôlah khan a saringseihei khah ân bok a.

¹²Hingka hin a ti a, “O PUMAPA, ki pu Abrahama Pathian, ki pu Abrahama chungah ni lungkhamlianna inlang inla, vuanah hin lo nen tluk roh.

¹³En ta, tuikuang kôlah ki îding a nit, khosung nungâkhei khom tui ichôi rangin an ihong a nit hi.

¹⁴Nungâk tukhôk zianga manih, ‘Ringai ihoi takkan ni tui bêl khah inriniam inla, tui lei in rong,’ tîng ki ta; khante, ani khan, ‘O in roh, ni saringseihei in rang khom tui la hong chôi pêk rong,’ ititu tak khah; kha mi tak khah ni suak Isaka ranga ni nungâk inkung chu ni riseh, amakhah ki pu chungah ni lungkhamlianna ni înlang a nit iti riang ki ti,” itin a ṭongṭai a.

¹⁵Hingka hin a nit a, a ṭongṭai mong maah khan Rebeki khah a dâra tuibêl riputin a hong tlung a. Ani khah Abrahama unaipa Nahora neh Milkaii naipa Bethuela nainu a nit.

¹⁶Rebeki khah nungâk mêl iṭha tak, nungâk rithiang, ipa rêng rêngin an lai tôn tlak ngai ino a nit. Tuikuangah khan a fe a, a tuibêl khah a thâl insip a, a hong kîr nôk a.

¹⁷Isom khan lei var tongpui rangin â tlân a, a ziangah, “Ringaiihoi takkan ni tuibêla tui khah nen in ta,” a ti a.

¹⁸Ani khan, “Epu, in roh,” a ti a; Khanchu, irang takkan a tuibêl khah a kutah a zuang iṭhum a, ân in tâk a.

¹⁹Ân in zoiin chu a ziangah, “Ni saringseihei khom an khopka an in rang tui la zu chôi pêk rong,” a ti a.

²⁰Khanchu, irang takkan a tuibêl khah serkuangah khan ân rong a, tuisunsua tiang â tlân nôk a, saringseihei murdi an khop khopka in rang tui khah a zu chôi a.

²¹Kha sungah khan a vân zinna bi khah PUMAPA khan lo ân tluk neh ân tluk no ngaitua pumin isom khan idâirek kan a en ṭian a.

²²Saringseihei khan an khop dôrah tui an in nungah khan, isom khan rângkachak nârbet sekel rizâtka rik neh rângkachak bânbun inikah, sekel sômka rik ân bun a.

²³A ziangah, “Tu nainu tak im nî nit, ringaiihoi takkan ne ril ta, keimah neh ki champuihei zân riakna rang ni pa inah mun om thei a tîm?” a ti a.

²⁴Ani khan a ziangah, “Nahora neh Milkaii naipa Bethuela nainu ki nit,” a ti a.

²⁵Amah ngirin a ziangah, “Bupôl neh sebu kin nei a, riakna mun khom kin nei,” a ti a.

²⁶Isom khah arkhûk a dil a, PUMAPA chubai a ûn a.

²⁷“Ki pu chunga a lungkhamlianna neh a iamomna danglam ngai ino, ki pu Abrahama Pathian, PUMAPA chu inpâkin om riseh. Kei khom PUMAPA khan ki pu suapuihei insungah a ne iṭhui inlût tâk a nit hi,” a ti a.

²⁸Kha thu khah a nuhei va ril rangin nungâk khah â tlân a.

²⁹Rebeki khan ṭâpa Labana a nei a, Labana khah tuisunsua kôla Abrahama som ziang ipanin â tlân a.

³⁰Labana khan a farnu nâra nârbet neh a kuta bânbun khah a mu a, “Mi khan khangkan chungkan a ne ti,” a ti a, a farnu Rebeki thusîrhei khah a riat kaneh khan Abrahama sompu ziangah khan ai fe zel a nit. Ani khah tuikuanga saringseihei kôlah khan a lei iding ṭian mai a.

³¹Labana khan, “Nangmah, PUMAPA ṭhatvurna dongtu, ithôm hi munah hin ni îding ṭian? Hong inla, ki inah hong lût roh; ni tlungna rang neh saringseihei omna rang khom mun ki înrifûk diam tâk a nit,” a ti a.

³²Khanchu, ani kha Labana inah khan a lût a, Labana khan saringseihei puak khah â ṭhum a, saringseihei khah bupôl neh sebuhei a pêk a. Khanungchu, Abrahama som neh a champuihei ke risûkna rang tui a hong pêk a.

³³Khalai a hong do lâiah khan Abrahama som khan, “Ki hongna bi ke sîr rang tum ke sîr zoi mâkah chu îte fah no ning e,” a ti a. Labana khan, “Khateh, tho isîr roh,” a ti a.

³⁴Ani khan, “Abrahama som ki nit a.

³⁵Ki pu chu PUMAPA khan ṭhat a vur tak tak a, mi richong tak a hong nit a, PUMAPA khan bera hei, kêl hei, sial hei, tangkarua hei, rângkachak hei, suakpa hei, suaknu hei, saringsei hei, sakuartung hei a pêk a.

³⁶Ki pu nupui Sari khan a tar nungin naiipa a nei pêk a; ani kha ai nei murdi a pêk riai tâk a.

³⁷Ki pu khan ṭong a nen rikhâm a, ‘Ki omna rama Kanan mihei nungâkhei lâia mi hih, ki naipa nupuiin nen nei rang ni mak e;

³⁸Ki pa insungkuahei, ki suapuihei ziangah ifen ki naipa rang nupui ni zong pêk rang a nit,’ a ne ti a.

³⁹Keiman ki pu ziangah khan, ‘Nupang khan ne zui nuam no ta sela ingkam ai nit rang?’ ki ti a.

⁴⁰Ani khan ki ziangah, ‘PUMAPA, a thu kî zôm mai ngai khan a vântirtôn khah ni ziangah tir a ta, ni fena ranga khan thluan nang intlung a ti. Ki naipa rang ki suapuihei, ki pa insungkuahei lâi ata nupui ni va zong rang a nit.

⁴¹Ni ṭongrikhâmna ata zôk theina lampui khatkah bang nî nei a nit; ki suapuihei in ni tlung a, nungâk khah nang an pêk nuam non chu ki zianga ni ṭongrikhâm ata chu ni irthiang a nit,’ a ne ti,” a ti a.

⁴²“Vuansûna tuikuang ki hong tlungah khan, ki ṭongṭai a, ‘O PUMAPA, ki pu Abrahama Pathian, ki thil tho rangah hin thluan tlungna ni ne pêk titak rangin chu hingka hin ni riseh,

⁴³tuikuang kôlah ki iding a nit hih; nungâk tui ichôi ranga an hongin, ringaiihoi takkan ni tuibêla tui khah nen in ta,’ tîng ki ta.

⁴⁴Ani khan ki ziangah, ‘In roh, ni saringseihei in rang khom chôi sâng ki ti ititu tak kha ki pu naipa nupui ranga PUMAPA înkung nupang chu ni riseh,’ ki ti a.

⁴⁵Ki lungrila ṭongṭai ki mong maah khan Rebeki hih tuibêl riputin a hong a, tuikuangah khan a zu fe a, tui a zu thâl a. A ziangah, ‘Ringaiihoi takkan tui nen in roh ba,’ ki ti a.

⁴⁶Ani khan irang takkan a dâra tuibêl khah a zuang iṭhum a, ‘In roh, ni saringseihei in rang khom zu chôi pêk ki ti,’ a ti a. Khanchu, tui khah ki in a, saringseihei khom khan an khop dôrkah an in a.

⁴⁷A ziangah khan, ‘Tu nainu tak im nî nit,’ itin ker don a. Ani hin, ‘Nahora neh Milkaii naipa Bethuela nainu ki nit,’ a ti a. Khanchu, nârbet khah a nârah ken bet a, bânbunhei khah a kuta ken bun tâk a.

⁴⁸Khanchu, ker khûk ki dil a, PUMAPA chu chubai ki ûn a, ki pu Abrahama Pathian PUMAPA chu ken pâk a; ki pu naipa nupui ranga a suapuipa nainu zianga ne ṭhui thal thal a, nen mu suaktu chu ki înpâk a nit.

⁴⁹Atûnah hin ki pu chu lung nin înkham thei rang a nitin chu ne ril rei, lung nin inkham theino rang a nit le khom ne ril rei. Khanchu, ki ngatna tiang tiang la ngat ta rong,” a ti a.

⁵⁰Labana neh Bethuela khan an sâm a, “Hi thil hih PUMAPA zianga rithoka suak a nit, keimanin kin iti thei îte omak e.

⁵¹En roh, Rebeki chu hin a om, ṭhui inla, fe rei; PUMAPA thu angka takin ni pu naipa nupui chang riseh,” an ti a.

⁵²Abrahama som khan an thu khah a riat kaneh rinêngah â bok a, PUMAPA chubai a ûn tâk a.

⁵³Khanungchu, ani khan tangkarua neh rângkachaka siam rivonahei neh silbomhei a sap a, Rebeki khah a pêk a; a ṭâpa neh a nu khom khah thil ilu tak takhei a pêk sa a.

⁵⁴Khanungchu, Abrahama som neh a champuihei khan an fâkin an in a; zân an riak tâk a. A tûk zîngah an thoiin chu, “Ki pu ziangah nen kîr nôk ta rei,” a ti a.

⁵⁵Nikhomsela, Rebeki ṭâpa neh a nu khan, “Sûn sôt ino te, sûn sômka mani lua kin ziangah la om hi sela; kha rizoiah khan la fe rei,” an ti a.

⁵⁶Nikhomsela, ani khan an ziangah, “Nen tlâi khâi no rei, PUMAPA khan ki fenaah hin lo a nen tluk tâk a; ki pu ziangah ki kîr theina rangin nen fe lem ta rei,” a ti a.

⁵⁷Anni khan, “Bongte chu koi ei ta, ama bâi suak ngêi lei reh rei,” an ti a.

⁵⁸Khanchu, Rebeki khah an koi a, a ziangah, “Hi mi ziangah hin fe nuam ni tîm?” an ti a. Ani khan “O ki nuam,” a ti a.

⁵⁹Khanchu, Rebeki neh â dontunu neh Abrahama som neh a champuihei khah an infe tâk a.

⁶⁰Rebeki kha ṭhat an vur a, a ziangah, “Kin farnu, nang chu a sînga sîng têl nu hong nin la, ner chihei khan an irâlhei khopui chu dong pêk riseh,” an ti a.

⁶¹Khanungchu, Rebeki khah a thoi a, â somnuhei neh saringsei chungah khan an chuanga, isom khah an zui tâk a. Abrahama som khan Rebeki khah a ṭhui a, an fe tâk a.

⁶²An thang sungah khan Isaka kha ramchâr, Beer-lahai-roia rithoka khan a hong a, Kanan sim tiang ramah khan om mun a khuar a.

⁶³Isaka khah kholoi tiang phûlah a va lêng[48] suak a; a hang tang a, saringseihei ihong a mu a.

⁶⁴Rebeki khan Isaka a mu kaneh chu saringsei chung ata khah a ṭum a.

⁶⁵Abrahama som ziangah khan, “Phûla ne don ranga hong soh tûm ai nit?” itin ardon a. Isom khan, “Ki pu a nit soh,” a ti a. Khanchu, lukhum mâi rikhûna kha a lâk a, a mâi ân rikhû tâk a.

⁶⁶Isom khan a sintho murdi khah Isaka â ril a.

⁶⁷Isaka khan Rebeki khah a nu Sari puan inah khan a ṭhui lût a; khanchu, Rebeki khah a nei a, a nupui a hong nit tâk a. Isaka khan Rebeki khah lung a thlung tak tak a; a nu thia a beidong khom kha arthla a hong ringam thei tâk a.