Read Biete RIPHUTNA 25 Bible Online

RIPHUTNA 25 - Biete bible

RIPHUTNA 25

¹Abrahama khan nupui dang a nei a, arming chu Keturi a nit a.

²Ani khan Zimrana, Joksana, Medana, Midiana, Isbaka, Suaha hei a nei pêk a.

³Joksana khan naipa Seba neh Dedana a nei a. Dedana naipahei chu Asurhei, Letushei, Leumhei an nit.

⁴Midiana naipa hei chu Efa, Efera, Hanoka, Abida, Elda hei an nit. Khahei murdi khah Keturi naihei chu an nit.

⁵Abrahama khan ai nei murdi Isaka a pêk a.

⁶A thâikêmnu naipahei kha chu Abrahama khan a la dam lâi ngêiah khan thilpêkhei a pêk a; khanungchu, a naipa Isaka an chîm inbuai nona rangin anni chu khosak tiang ramah ân fe riai tâk a.

⁷Abrahama dam sung chu kum riza lei sômsarika ringakah a nit a.

⁸Abrahama kha tar ikhûna damin a thi tâk a, a chipuihei ziangah iṭhuiin ai om sa tâk a nit.

⁹A naipahei Isaka neh Ismaela khan Hit mi Zohara naipa Efrona ram Mamre sak tianga Makpela pûkah khan an phûm tâk a;

¹⁰Kha mun khah Abrahaman Hit mihei ziang ata a irchôk a nit. Amakhan Abrahama neh Sari chu munkan an iphûm a nit.

¹¹Abrahama thi nungah khan Pathianin a naipa Isaka chu ṭhat a vur a; Isaka chu Beer-lahai-roi kôlah khan a om mai tâk a.

¹²Hihei hih Abrahama naipa Ismaela, Sari suaknu, Aigupta mi Hagarin Abrahama ai nei pêk richihei riming chu a nit.

¹³Hihei hih Ismaela naipahei a ûnlian indôna riming chu a nit: Ismaela nai lutîr chu Nabaiota a nit a; a unaihei chu Kedara, Adbeela, Mibsama,

¹⁴Misma, Duma, Masa,

¹⁵Hadada, Tema, Jetura, Nafisa neh Kedema hei an nit.

¹⁶Khahei khah Ismaela naipahei an nit a; an khua neh an riabuk chit an riming riput tâk chu a nit a, annihei kha nam sôm lei nam inika richibulhei chu an nit.

¹⁷Ismaela damsung chu kum riza lei sômithumka sarikah a nit a; khanchu, a thi a, a chipuihei ziangah khan iṭhuiin a om tâk a.

¹⁸Ismaela naipahei chu Havila rama rithoka Asuria ram isonga Aigupta ram ridîn Sur idênin an om a. Abrahama richi dangheia rithokin a ranin an iom a nit.

¹⁹Hihei hih Abrahama naipa Isaka richihei chu an nit:

²⁰Isaka khan kum sômilika mi a nitin Mesopotamia rithoka Suria mi Bethuela nainu, Labana farnu Rebeki chu nupuiin a nei a.

²¹Rebeki khah a ching sikin Isaka khan PUMAPA ziangah a ṭongṭai pêk a. PUMAPA khan a ngênna khah arngai pêk a; khanchu, a nupui Rebeki khan nai a vong tâk a.

²²Nai inphîr a vong a, a naihei khah an la suak ma, sungah an om lâi rengin an risual ngai a. Ani khan, “Hingka hin a nit rangin teh ring zoi ki tîma o?” a ti a. Khanchu, PUMAPA isôn rangin a fe tâk a.

²³PUMAPA khan a ziangah, “Ni sûlah khan nam inikah an om a, Ni sunga rithok ngêiah khan chi inikah ringei ino tak an om; Nam khatkah kha nam khatka nêkan rât ual a ta; A ulian ual khan a naipang ual sin thông a ti,” a ti a.

²⁴A nai nei zoro a hong nitin chu nai inphîr ipa a hong nei tâk a.

²⁵A masa ual chu a sen vung a, puan rimul angkana rimul thûtin a zuang suak a; khanchu, arming kha “Esauva” [49] an sak a.

²⁶Kha rizoiah khan a unai khah a zuang suak nôk a, a kutin Esauva ke khah â tûk khap a; khanchu, arming kha Jakoba[50] an sak a. Rebekin annihei khah a nei lâiah khan Isaka chu kum sômirukka mi a nit a.

²⁷Naipanghei khah an hong thuar a; Esauva kha sa kâp ithiam tak, ramvatualtla tak a hong nit a; Jakoba kha chu mi tak inning, insung ngaisak mi tak a nit.

²⁸Isaka khan Esauva kha sa kâp ithiam tak a nit sikin a kan ual a; Rebeki rêk khan chu Jakoba khah a kan ual a.

²⁹Sûnkah chu Jakoba khan itika a but a; Esauva khah ram tianga rithokin rizal nengkan a hong suak a.

³⁰Esauva khan Jakoba ziangah, “Ringaiihoi takkan ni itika sen but khah nen fah ta; ṭâmsôl ne itho kêng,” a ti a. Khasika khan arming khah Edoma[51] an ibe sa tâk a nit.

³¹Jakoba khan, “Ni nai lutîr nitna ni ne pêkin chu nang pêng ki ti,” a ti a.

³²Esauva khan, “O a ṭhat, voniṭâmin kî thi rang kêng; nai lutîr nitna hih ki rangin im arfena a om rang?” a ti a.

³³Jakoba khan, “Ni nai lutîr nitna nang ki lan iti ṭongrikhâm bak roh,” a ti a. Khanchu, Esauva khan ṭong arkhâm a; a nai lutîr nitna khah Jakoba ziangah a zuar tâk a.

³⁴Khanungchu, Jakoba khan Esauva khah ibai neh an ibut a pêk a, a fâk a, a in a, a thoi a, a fe tâk a. Khangkah khan Esauva khan a nai lutîr nitna khah ai ngainêp a nit.