Read Biete RIPHUTNA 26 Bible Online

RIPHUTNA 26 - Biete bible

RIPHUTNA 26

¹Abrahama dam lâia ṭâm itla ni no, kha ramah khan iṭâm a zuang tlâk nôk a. Khanchu, Isaka khah Gerar khuaah Filistiahei rêng Abimeleka ziangah a zu fe a.

²PUMAPA chu Isaka ziangah a zuang inlâr a. “Aigupta ramah khan zu fe no roh; nang ki înmu ramah hin om roh.

³Hi ramah hin om inla; khanchu, ni ziangah om ki ta, ṭhat nang vur ki ta; hi ram murdi hih nangmah neh ner chihei ipen, ni pa Abrahama zianga ki ṭonginkung khah ki îndet rang a nit.

⁴Rivâna ârsi zâkan ner chihei chu inpung ki ta, hi ram murdi hih ner chihei kî pêk rang a nit. Nangma richia rithokin rammuala nam tin hamṭhatna la dong an ti.

⁵Abrahaman ki thu a ôi a, ki thurilhei, ki thupêkhei, ki dânhei neh ken riseinahei a zôm sikin ṭhat nang kî vur rang a nit,” a ti a.

⁶Khanchu, Isaka kha Gerar khuaah khan a om mai tâk a.

⁷Kha khua mihei khan a nupui thurchi an ridon a; ani khan, “Ki farnu a nit,” a ti a; Rebeki khah a mêl a ṭhat sikin, “Hi khua mihei hin Rebeki sikin ne that duai an ti,” itin, “Ki nupui a nit,” ai ti ngam ino a nit.

⁸Kha khuaah khan isôt takkah a om nungin, Filistiahei Rêng Abimeleka khan tukvera rithokin a zuk thlîr a, Isakan a nupui Rebeki â riam lâi a zuk mu a.

⁹Khanchu, Abimeleka khan Isaka khah a koi a, “Ni nupui a nit ngêt hi te? Îtho sikin im, ‘Ki farnu a nit,’ ni ti hi?” a ti a. Isaka khan a ziangah, “Ama sikin mîn an ne that duai lôiin iti ki ṭi sika a nit,” a ti a.

¹⁰Abimeleka khan, “Kin chunga ni thiltho hih ingka tliam ai nit tâk? Ki mihei lâia a tukhôk khom hin ni nupui hih a lei izâlpui thei duai kêng ai nit, khangkan ni ta sela kin chungah hin thiamnona ni zuang îthlun ai nit rang a nit,” a ti a.

¹¹Abimeleka ngir khan mi murdi ziangah, “Tukhom hi mi hi manih, a nupui hi manih, â tôn kangân chu ithat ngêt rang a nit,” a ti a.

¹²Isaka khan kha ramah khan chi a chôi a, PUMAPA khan ṭhat a vur sikin kha kumah khan a bâk rizakan a mu a.

¹³Khanchu, a vângsak a hong bei tîr tîr a, richong tak a hong nit tâk a.

¹⁴Bera lômhei, sial lômhei, isomhei a hong nei intam tak tak tâk sikin Filistiahei khan an narsa tâk a.

¹⁵Khanchu, a pa Abrahama dam lâia, a pa suakhein tuisunsua an ichoi murdihei khah Filistiahei khan an nêl a, ipilin an nêl insip zit tâk a.

¹⁶Khanungchu, Abimeleka khan Isaka ziangah, “Kin ziang ata hih rithon ta roh, keimani nêkan nî rât ual ok tâk a nit,” a ti a.

¹⁷Khanchu, Isaka kha khantak ata khah a suak a, Gerar phâiah om mun a khuar a, amakhan a om tâk a.

¹⁸Isaka khan a pa Abrahama dam lâia an tuisunsua choih, Abrahama thi nunga Filistiahein an lei inêl insiphei kha a choih nôk a; a pân riming a lei be lam angkah takah khan riming ân riput nôk riai a.

¹⁹Isaka suakhein an omna phâia tuisunsua an ichoiah khan tui a om inṭhat tak tak a.

²⁰Khanchu, Gerar khuaa berapuhei khan, “Tui hih kin ta a nit,” itin, Isaka berapuhei kha an zuang rikhalpui a; khanchu, amah an zuang irkhalpui a nit sikin tuisunsua riming kha “Esek” (Rikhalna) a be tâk a.

²¹Tuisunsua dang an choih nôk a, kha khom khah isut itumin an rikhalpui nôk a; khanchu arming kha Sitna[52] (Ritûrna) a be nôk a.

²²Khantak ata khah arthon a, tuisunsua dang a choih nôk a; amakhah chu isut itumin ringopui khâi mak a, arming kha Rehobot (Zalenna) a be tâk a. Khanchu, “Atûn chu PUMAPA khan ei omna rang mun rizat tak a ne siam pêk tâk a, hi ramah hin vângsak tâng ei ti,” a ti a.

²³Khan taka rithokah khan Beersebaah a hang rithon a.

²⁴Kha zân ngêiah khan PUMAPA chu a ziangah a zuang inlâr a, “Keimah hi ni pa Abrahama Pathian chu ki nit. Ṭi no roh, nang kî ompui mai a nit. Ṭhat nang vur ki ta, ki suak Abrahama sikin ner chihei chu itam takkan ki la înpung rang a nit,” a ti a.

²⁵Khanchu, kha munah khan Isakan mâichâm a siam a, PUMAPA riming arlam a. Kha munah khan a puan in a dâng a; â somhei khan kha mun khomah khan tuisunsua an choih nôk a.

²⁶Gerar khuaa rithokin Abimeleka khah a malpa Ahuzatha neh a sipai ruaitu Fikola ṭhuiin Isaka mu rangin an fe a.

²⁷Isaka khan an ziangah, “Nin ne nel a, nin ziang ata nin ne ûm pai a, îtho sik im ki ziangah nin ihong hi?” a ti a.

²⁸Anni khan, “PUMAPA chu ni ziangah a om iti ifel takkan kin riat a; khasika khan, ni ningsiat kin isin ngai ino angkan neh thil iṭha ti no chu ni chungah îte rêng rêng tho loi a, iṭha takka nang kin înfe angka khan, keini khom kin siatna rang rêng rêng ni tho nona rangin ei kârah, keimani neh nangma kâr ngêiah hin ṭongrikhâmna om sela, ei kârah ringeina thuthlung ne thlungpui roh, kin iti a nit; atûnah hin nang chu PUMAPA ṭhatvur idongtu ni hong nit tâk a,” an ti a.

³⁰Isaka khan an rang ruai â ṭhe a; khanchu, an fâkin, an in tâk a.

³¹Atûk zîngah chu zîng takah an thoi a, ṭong an rikhâm seng seng a; Isakan anni chu â thla a; khanchu, rualrichanin an inṭhen tâk a.

³²Kha nî ngirah khan Isaka somhei khah an hong a, an tuisunsua choiah khan, “Tui kin mu tâk,” an hong ti a.

³³Khanchu, kha tuisunsua khah Seba [53] a be a; khasika khan kha khua riming khah atûn tenan Beerseba an lai ti a nit.

³⁴Esauva chu kum sômilika mi a nitin, Hit mi Beeria nainu Judithi neh Hit mi Elona nainu Basemathi hei kha nupuiin a nei a.

³⁵Kha mihei khah Isaka neh Rebeki lungril insôltu chu an nit.