Read Biete RIPHUTNA 27 Bible Online

RIPHUTNA 27 - Biete bible

RIPHUTNA 27

¹Isaka chu a hong tar a, a mithei a hong zîng nungah khan a naipa ulian ual Esauva khah a koi a, a ziangah, “Ki naipa” a ti a. Ani khan “Hin ki om,” a ti a.

²Isaka khan, “En ta, ki tar ok tâk a, ki thina rang khom a nâi tâk a.

³Khasikin, ni thalhei neh ni phel lan la, ram va chai inla, sakhi ne va kâp pêk roh.

⁴Ke du lam takkan, an itui tak ne suang[54] pêk inla, ki fâk rang ki ziangah hong do roh. Khanchu, fâng ki ta, ki thi ma ngêiah hin ki ṭhatvurna nî dong rang a nit,” a ti a.

⁵Isakan a naipa Esauva â sôn lâi khah Rebeki khan a lei ringai ṭian a. Khanchu, Esauva khah sa kâp ranga ramah a fe kaneh,

⁶Rebeki khan a naipa Jakoba ziangah, “Ringai roh, ni pa khan ni u Esauva ziangah,

⁷‘Sakhi ne hong that pêk inla, ne suang pêk roh, fâng ki ta; ki thi ma ngêiin PUMAPA maah ki ṭhatvurna nî dong rang a nit,’ a ti pêk lâi ki riat a.

⁸Khasikin, ki naipa, atûnah hin thu nang ki pêk lam takkan tho roh.

⁹Kêl lôm lâiah va fen la, an lâia a tuai rinoi iṭha tak kêlte inikah hong chôi roh; amakhah ni pa nuamlam takkan an itui tak suang pêk ki ti.

¹⁰Ni pa fâk rangin a ziangah chôi ni ta; khanchu, a thi maah khan ṭhat nang ai vur rang a nit” itin he a be a.

¹¹Nikhomsela, Jakoba khan a nu Rebeki ziangah, “Ki u Esauva chu mi rimulthût a nit a, keimah lak mul nei ino, mi nâm ki nit a.

¹²Ki pa khan a ne lei ituai duai a, kî lêm a nit iti a riat suak duaiin chu ṭhativur nêkan vânisâm ilo ka kêng kî nit rang,” a ti a.

¹³A nu khan a ziangah, “Ki naipa, ni vânisâm dong rang murdi chu ki chungah la ṭum riseh, ki thu zôm inla, kêl chu ne va la pêk roh,” a ti a.

¹⁴Khanchu, a fe a, a va lâk a, a nu ziangah a hong chôi a; khanchu, a nu khan a pa dû lam takkan a suang pêk a.

¹⁵Rebeki khan a nai ulian ual Esauva silbom iṭha tak, ina a zianga om khah a lâk a, a nai naipang ual Jakoba khah ân hâk a.

¹⁶Kêl vunhei khah â bân neh a ring mul omnonaheiah khan a tuam pêk a.

¹⁷Khanchu, an itui tak neh ibai ai siamhei khah a naipa Jakoba kutah a pêk a.

¹⁸Khanungchu, Jakoba khah a pa ziangah a fe a, “Epa” a ti a. Ani khan, “Hin ki om, ki naipa a tukhôk im nî nit?” a ti a.

¹⁹Jakoba khan a pa ziangah, “Ni naipa ulian ual Esauva ki nit; ni ne tir lam angka khan, ki tho zoi tâk a, ringaiihoi takkan thoi inla, iṭhung inla, ki sakhi sa hi fah roh; khanchu, ni ṭhatvurna kî dong rang a nit,” a ti a.

²⁰Isaka khan a naipa ziangah, “Ki naipa, ingkan im lo ni va tluk imat bâk tâk a?” a ti a. Jakoba khan, “PUMAPA ni Pathian khan lo a nen tluk sika a nit,” itin a sâm a.

²¹Isaka khan Jakoba ziangah, “Ki naipa, ringaiihoi takkan ne hong nâi ta, nang lei ituai vêl rong, ki naipa Esauva chu ni nit titak im a,” a ti a.

²²Jakoba khan a pa Isaka chu a va nâi a; ani khan a lei ituai vêl a, “A rôl irî chu Jakoba rôl irî a nit a, a kuthei lak chu Esauva kut a nit a,” a ti a.

²³A kut khah a u Esauva kut angkan armul sikin ani khan Jakoba a nit iti khah ai riat thei ino a nit. Ṭhatvurna a pêk ma takin,

²⁴â thar pialin, “Esauva chu ni nit titak na,” a ti nôk a. Ani khan “O, ki nit,” a ti a.

²⁵Isaka khan, “Hin ki ziangah hong chôi roh; khanchu, ki naipa ni sa that chu fâng ki ta, ṭhat nang lei vur rong,” a ti a. Jakoba khan a hong chôi a, ani khan a fâk tâk a; uain khom a hong chôi pêk a, a in sa tâk a.

²⁶Khanungchu, a pa Isaka khan a ziangah, “Ki naipa, hong nâi inla, ke biang tum roh,” a ti a.

²⁷Khanchu, ani khan a silbom inam khah a lei riat a; khanchu, ṭhat a vur a, “O, ki naipa nam hih, PUMAPA ṭhatvur ram inam a nit.

²⁸Pathianin rivân rido nang pe sela, Rinêng ṭhatna chu nang pe riseh. Bu neh uain itam takkah hong nei roh.

²⁹Nam dang danghei khan ni sin tho sela, Mi tin tinin nang ikhûn riseh. Ni suapuihei chungah ilalin om inla; Ni nu naihein nang ikhûn riseh. Vâni nang isâm kangân chu vâni sâmin om sela, Ṭhat nang ivurtu kangân chu ṭhat ivurin om riseh,” a ti a.

³⁰Hingka hin a nit a, Isakan Jakoba ṭhat a vur zoi a, Jakoba khah a pa Isaka ziang ata a suak zoi chakin, a u Esauva kha a ramrivâk a hong kîr a.

³¹Ani khom khan an itui takkan a suang a, a pa ziangah a hong chôi a; a pa ziangah, “Epa, thoi inla, ni naipa sakhi sa hih fah roh; khanchu, ni ṭhatvurna kî dong rang a nit,” a ti a.

³²A pa Isaka khan a ziangah, “Tûm nî nit?” a ti a. Ani khan, “Ni nai ulian ual Esauva ki nit,” a ti a.

³³Khanungchu, Isaka khah natinsat takkan ân thing a, “Sa kâpa ki zianga a sa ne hong ichôi pêk khah tûm ai nit tâk? Ni hong tlung ma takah khan ki lei fâk a, ṭhat ki lei ivur tâk kha. Ṭhatvurna chu ai dong thal rang tâk chu a nit,” a ti a.

³⁴Esauva khan a pa thuril khah a riatin chu ringaiinseh takkan a ṭap ngûi ngûi a, a pa ziangah, “O Epa, kei khom ṭhat ne vur sa roh,” a ti a.

³⁵Nikhomsela, ani khan, “Ni unaipa khan a ne hong lêm a, ni dongtum ṭhatvurna chu ai lâk tâk a nit,” a ti a.

³⁶Esauva khan, “Arming Jakoba an isak hih chu a îdik a nit. Hih voinikah a ne lêmna a nit tâk; ki nai lutîr nitna khah a ne lâk pêk tâk a; atûnah hin ṭhatvurna ki dong rang khom a ne ilâk pêk nôk tâk a nit hi,” a ti a. Amah ngirin, “Ṭhatvurna ichînteka lua ne zua pêk khâi mak chêm a?” a ti a.

³⁷Isaka khan Esauva kha a sâm a, “Ani chu ni chunga inlal rangin ki lei ti tâk a, a suapuihei murdi khom a suak rangin ki pêk riai a; bu neh uain khom itam takka nei rangin ki lei ti sa tâk a. Khasikin, ki naipa atûn chu nangma rangin îte tho thei nei khâi mang e,” a ti a.

³⁸Esauva khan a pa ziangah, “Epa, ṭhatvurna khatkah bang im nî nei? O, Epa, kei khom ṭhat ne vur sa ngêt roh,” itin a ngên ngit a. Esauva chu iring takkan a ṭap a.

³⁹Khanungchu, a pa Isaka khan a sâm a, a ziangah, “Ringai roh, ni omna chu ram ṭhatna ata ila takah nîng a ta, Chungtiang ata rivân ridohei dong no tin e.

⁴⁰Ni khandai imangin ring ni ta, Ni unai sin nî tho rang a nit. Nikhomsela, ner hel suak tikin chu, A ringkol khah ni ring ata ikhiak tâng ni ti,” a ti a.

⁴¹A pa khan Jakoba khah ṭhat a vur sikin Esauva khan Jakoba kha a nel tâk a. Esauva khan a lungrilin, “Ki pa, kin sûn rang nikhua a nâi tâk a, khanungah khan ki unai Jakoba chu kî that rang a nit,” a ti a.

⁴²Nikhomsela, Rebeki khan a nai ulian Esauva thiltum khah a riatin chu a nai naipang ual Jakoba khah a koi a, a ziangah, “Ringai roh, ni u Esauva hin nang ithat itumin a irsoi mai a nit.

⁴³Khasikah khan, ki naipa, atûna ki thu hih ôi roh; thoi inla, Haran khuaa ki ṭâpa Labana ziangah lâizâm tho roh.

⁴⁴Ni u ningthik hih a ṭuai mâkah chu a ziangah zoro itena sôt manih chu va om hi roh.

⁴⁵Ni u ningthik hih ni chungah a boi a, a chunga ni sintho hih arngil tikah khan mi hong tir ki ta, khantak ata khah nang la hong inṭhui ta rong. Îtho rang im sûn khatkan ki naipahei nin ruaikan nangni ki îchân rim rang hi?” a ti a.

⁴⁶Rebeki khan Isaka ziangah, “Esauva nam dang nupuihei sikah hin ki ringnun khom hih ki chang a dong tak tak tâk. Jakoba hin hi ram nungâk, Hit mihei lâia mi hih nupuiin a nei nôk vângin chu ki rangin iring hih im arfena rang?” a ti a.