Read Biete RIPHUTNA 29 Bible Online

RIPHUTNA 29 - Biete bible

RIPHUTNA 29

¹Kha rizoiah khan Jakoba khah a fe mai a, khosak mihei ram khah a tlung tâk a.

²A hang en a, phûlah hin tuisunsua a mu a, a kôlah khan berahei lôm ithumkah an lêng a; kha tuisunsua ata khah bera lômhei khah tui an în-in ngai a nit. Tuisunsua sîngna lung khah a lian ok a.

³Kha munah khan bera lômhei murdi an ribuk ngai a; berapuhei khan tuisunsua sîngna lung khah an inlum a, berahei khah tui an in-in a, khanungchu, tuisunsua bâi khah lungah khan an isîng inṭhat nôk ngai a nit.

⁴Jakoba khan berapuhei ziangah, “Suapuihei, tak kho mi tak im nin init?” a ti a. Anni khan, “Haran kho mi kin nit,” an ti a.

⁵Ani khan an ziangah, “Nahora tûpa Labana kha nin riat im?” a ti a. Anni khan, “O kin riat,” an ti a.

⁶Ani khan an ziangah, “Khate, a dam lâi chu a nit im?” a ti a. Anni khan, “O a dam; en roh, a nainu Rakili khom a bera lômhei neh a hong soh,” an ti a.

⁷Khanchu, ani khan “En ta u, inî lak a lar sâng vit a, bera lômhei hôl bûm zoro khom la ni tak mak a, berahei hih tui in-in unla, vân lêng nôk rei khan,” a ti a.

⁸Nikhomsela, anni khan, “Bera lôm murdi an hong ribûm rikip riai tikin, tuisunsua khur sîngna lung hih inlum pai kin ta, kha nung bangah khan bera lômhei tui kin în-in ngai a nit,” an ti a.

⁹Jakoba khan anmani a la sôn lâiah khan, Rakili chu a pa berahei hong iṭhuiin a hong tlung a; ani khan berahei khah ai enkol ngai a nit.

¹⁰Jakoba khan a nu ṭâpa Labana nainu Rakili neh, a nu ṭâpa Labana bera lôm khah a mun chu Jakoba khan tuisunsua kha a va nâi a, a sîngna lung khah a thîn pai a, a nu ṭâpa berahei khah tui ân in tâk a.

¹¹Khanungchu, Jakoba khan Rakili kha â riam a, a lôm rai sikin iring takkan a ṭap tâk a.

¹²Jakoba khan, “Ni pa tûpa, Rebeki naipa ki nit hi,” itin Rakili kha â ril a. Khanchu, Rakili khah a pa va ril rangin â tlân zel tâk a.

¹³Labana khan a farnu naipa Jakoba thurchi a riat kaneh â don rangin â hong itlân a, â pom a, â riam a, a inah a ṭhui tâk a. Jakoba khan a thurchi murdi khah Labana â ril tâk a.

¹⁴Khanchu, Labana khan a ziangah, “A nit, ki thisen rizompui ni nit hi,” a ti a. Khante, Jakoba khah a ziangah thlakah a om tâk a.

¹⁵Labana khan Jakoba ziangah, “Ki tupa ni nit sikin â tlongin ki sin ni thona rang thu omak. Im ni thalo ai nit rang, tho ne ril roh,” a ti a.

¹⁶Labana khan nainu inikah a nei a; a ulian ual riming khah Leaii a nit a, a naipang ual riming khah Rakili a nit.

¹⁷Leaii kha a mit meng a pârsap a, Rakili chu tuaizâi iṭha tak a nit a, a mêl khom a ṭhat tak tak a.

¹⁸Jakoba khan Rakili khah lung a thlung a; khanchu, “Ni nainu naipang ual Rakili ni nen nei rangin chu kum sarikah ni sin thông ki ti,” a ti a.

¹⁹Labana khan, “Ani khah mi dang daih innei nêkan chu nang ki înnei chu ṭha ual a ti, hin ki ziangah om roh,” a ti a.

²⁰Khanchu, Jakoba khan Rakili nei ranga khan kum sarikah sin a tho a; nikhomsela, lung a thlung tak tak sikin sûn sôt ino te angkan zoro khah a riat a.

²¹Jakoba khan Labana ziangah, “Ki zoro ke tluk tâk a; ni nainu chu nen nei ta roh,” a ti a.

²²Khanchu, Labana khan kha khua mi murdihei a fial bûm a, ruai â ṭhe tâk a.

²³Nikhomsela, zân a zîng tenan chu a nainu Leaii khah a ṭhui a, Jakoba ziangah a ṭhui lût a; ani khan a lei zâlpui tâk a.

²⁴Labana khan a bôinu Zilpaii khah a nainu Leaii ziangah a bôinu rangin a pêk a.

²⁵Hingka hin a nit a, atûk zîng a hong nitin chu Leaii pial kêng a lei nit tâk a; khanchu, Jakoba khan Labana ziangah, “Ki chunga ni sintho hih ingka tliam ai nit tâk hi, Rakili nei rangin ni sin kî tho ni mak im a? Îtho sikin im ni ne ilêm tâk hi?” a ti a.

²⁶Labana khan, “Kin ramah hin nai ulian ikhêla a naipang ual inrinei hih dân ni ngai mak a.

²⁷Hi rinei lômna sûn sarikah[57] hih hang rizoi hi sela; khanchu, kum sarika dang ki sin ni tho nôk rangin chu Rakili khom hih nang pêng ki ti,” a ti a.

²⁸Khanchu, Jakoba khan ṭha a ti a, rinei lômna sûn sarikah ân hek zoi tenan chu Labana khan a nainu Rakili khom khah nupuiin ân nei tâk a.

²⁹Labana khan a bôinu Bilhaii khah a nainu Rakili bôinu rangin a pêk a.

³⁰Jakoba khan Rakili khom khah a zâlpui a, Leaii nêka khan Rakili khah lung a thlung ual a. Khanungchu, Labana sin khah kum sarika dang a tho nôk tâk a.

³¹PUMAPA khan Leaii khah iheng viatin a om iti a riat a; khanchu, a sûl â ong pêk a; Rakili kha chu nai nei thei mak a.

³²Leaii khan nai a vong a, naiipa a nei a, arming Reubena a sak a. “PUMAPA khan ki dengtheizia a mu,” tina a nit. “Atûn chu ki pasalin lung ne thlung ual tâng a ti,” a ti a.

³³Nai a vong nôk a, naiipa ngir a nei nôk a; “PUMAPA khan lungthlungna dong mang iti a riat sikin hi khom hih a ne ipêk a nit hi,” a ti a; khanchu, arming kha Simeona a sak a.

³⁴Nai a vong nôk a, naiipa ngir a nei nôk a, “Atûn chu naiipa pasal ithumkah ki nei pêk tâk a, ki pasal khomin ne kan tâng a ti,” a ti a; arming kha Levia a sak a.

³⁵Nai a vong nôk a, naiipa a nei nôk a; “Atûna ṭumah hin chu PUMAPA inpâk ki ti,” a ti a; khasikin, arming kha Juda[58] a sak a. Kha nungah khan chu nai nei khâi mak e.