Read Biete RIPHUTNA 3 Bible Online

RIPHUTNA 3 - Biete bible

RIPHUTNA 3

¹PUMAPA Pathian isiam ramsa murdi lâiah irûl hih vârrilet tak a nit a, nupangnu ziangah khan “Pathianin rikula thing irâ murdi hih nin fâk rang ni mak e, ai ti mani?” itin ardon a.

²Nupangnu khan irûl ziangah khan, “Ti mak e, rikula thing irâhei hih kin fâk thei riai;

³rikul inlâina taka thing iom irâ bang hih Pathianin, ‘Nin fâk rang ni mak a, itôn khom nin tôn rang ni mak; khanonchu, nin ithi rang a nit,’ ai ti a nit,” a ti a.

⁴Irûl khan nupangnu ziangah khan, “Thi tlak no tin u!

⁵Nin fâk nî zelah khan nin mit hong vâr a ta, â sia â ṭha rian Pathian i-ang nin hong init rang iti Pathianin ai riat ṭian a nit kha,” a ti a.

⁶Khanchu, nupangnu khan thing irâ khah ifarua neh, mit iladap, mi invâr ranga thing irâ rizuk iom tak a nit iti a riatin chu â râ ṭhenkah kha armal a, a fâk a; a pasal khom a pêk a, ani khomin a fâk tâk a.

⁷Khan zel an ruaikah khan an mit a hong vâr a, korongboi an nit iti an hong ririat tâk a; khanchu, theichâng nâ an iṭhui inrikop a, silbomin an mang a.

⁸Khante, PUMAPA Pathian khah kholoi ni tlâkrikâia[8] rikula a lêng irî khah an lei riat a; Adama neh a nupui khan rikula thingkung kârah khan PUMAPA Pathian chu an lei ribîk pêk tâk a.

⁹Nikhomsela, PUMAPA Pathian khan Adama khah a koi a, a ziangah, “Adam, taktiang im nî om tâk?” a ti a.

¹⁰Ani khan, “Rikulah ner hu ki riat a, korongboia om ki nit sikin nang ki ṭi a, ki irbîk tâk a nit,” itin a sâm a.

¹¹Pathianin, “Korongboi ni nit iti tûm nang iril? Thei irâ fah loi rang kî ti khah nî fâk tâk a nit na?” a ti a.

¹²Adama khan, “Ne ompui ranga ni nupang ne pêk khan thei irâ khah a ne pêk a, kî fâk tâk a nit,” a ti a.

¹³PUMAPA Pathian khan nupangnu ziangah khan, “Îtho sika hingkana sin hih nî tho tâk im?” a ti a. Nupangnu khan, “Irûlin a ne lêm a, kî fâk tâk a nit,” a ti a.

¹⁴PUMAPA Pathian khan irûl ziangah khan, “Hi thil hih ni tho sikin mîring tinrêng lâiah hin vânisalin om bîk ni ta, ni phûng itâtin lôn mai tâng ni ta, ni damsung kârkah ipil fah tâng ni ti.

¹⁵Nangmah neh nupangnu hih nangni inridoi ki ta, nangma richihei neh ama richihei khom lân ridoi mai ki ti. Ama richi khan ni lu lâ to khoi a ta, nangman a ke ârtui la chuk ni ti,” a ti a.

¹⁶Nupang ziangah khan, “Ni nai vonga ni dengtheina neh ni nai neia naihasê chu natinsat takkan inpung ki ta, dengithei takkan nai nei ngai ni ti; nikhomsela, ni nuamna chu ni pasal tiang nîng a ta, ani khan ni chungah thu nei mai a ti,” a ti a.

¹⁷Adama ziangah khan, “Ni nupui thu ni zôm a, thing khatkah, â râ ni fâk rang ni mak kî ti khah ni fâk sikin rinêng hih nangma sikin vânisalin ai om tâk a nit; ni damsung kârkah isôl taka sinithon â râ kha fah tâng ni ti.

¹⁸Riling neh ibuarhei hong ṭoi a ta; rinênga loisûl loinâ kha fah tâng ni ti.

¹⁹Rinêng ata ila suak nî nit angkan rinêng ngirah ni kîr nôk mâkah chu ni mâia rithlantui iluang ngûi ngûia sin ithon fâk fah tâng ni ti. Ipila siam ni nit a, ipil ngirah nî kîr nôk rang a nit,” a ti a.

²⁰Adama[9] khan a nupui khah miriam naihei murdi nu a nit sikin arming Evi a be a.

²¹Khante, PUMAPA Pathian khan, Adama rang neh a nupui rang savun zakorfual a siam pêk a, ân hâk tâk a.

²²Khanungchu, PUMAPA Pathian khan, “Ringai ta u, miriam khah â sia â ṭha rian eimani ang a hong nit tâk a; atûn chu a kuta banin, ringna thing irâ khah lei va fan, kumkhuan a ring duai lôiin,” a ti a.

²³Khasikin, PUMAPA Pathian khan amah a lâk suakna rinênga loisin itho rangin Eden rikul ata khah a ûm isua tâk a.

²⁴Khanungchu, miriam khah a ûm isua tâk a; khante, ringna thing lampui irung rangin, Eden rikul sua tiang pangah khan Cherubhei neh mei khandai rihel lap khah a sia a.